Nda 5
5
Ũandĩko Ũkũtanĩ
1Mũthenya ũmwe Mũsumbĩ Mbelisasa nĩwathokisye anini make ngili ĩmwe moke mbokanĩ nene, na manyw'a ndivai vamwe. 2Mbelisasa aendee kũnyw'a ndivai nĩweeaie ĩla mĩio ya thaavu na silĩva ĩthe wake Nevukatinesa wakuĩte kuma Ĩkalũnĩ ya Yelũsalemu ĩetwe. Mbelisasa amĩtũmanĩte nĩ kana yaetwe, we mwene, anene ma kwa mũsumbĩ, iveti syake na iveti syake sya ndũsyo manyw'e ndivai nayo. 3Nĩvo ĩndĩ mĩio ĩsu ya thaavu na silĩva ĩla yoosetwe kuma Ĩkalũnĩ, nyũmba ya Ngai ĩla yĩ Yelũsalemu yaetiwe. Mũsumbĩ vamwe na anini make, iveti syake na iveti syake sya ndũsyo nĩmambĩĩie kũnyw'a ndivai maitũmĩa mĩio ĩsu. 4Nĩmanywie ndivai na mataĩa ngai iseũvĩtw'e na thaavu, silĩva, mbulonzi, kyũma, mbwaũ na mavia.
5Kavindanĩ kau, nĩvaumĩlile syaa sya kw'oko kwa mũndũ, na kw'oko kũu kwambĩĩa kũandĩka ũkũtanĩ wa nyũmba ya mũsumbĩ, vala taa wamulĩkĩte na kyeni kingĩ. Mũsumbĩ nĩwasyaĩĩisye kw'oko kũu kũendee na kũandĩka. 6Mũsumbĩ nĩwatukisye ũthyũ na akwatwa nĩ w'ĩa mũno, nĩwonzie nginya mau mambĩĩa kũtetema. 7Nĩweetanie na wasya mũnene ayenda awe, Akalitei, na ala mathanaa maũndũ maitũmĩa ndata metwe. Mũsumbĩ nĩwaneenie na andũ oĩ ma Mbavilonĩ amea atĩĩ, “Mũndũ o na wĩva ũla ũkũsoma maandĩko aa na aindavya ũalyũlo wamo, nũkwĩkĩwa ngũa sya langi wa nzambalaũ sya kĩ-ũsumbĩ, ĩsoa ya thaavu ngingonĩ na ayĩthĩwa ewe mũndũ wa katatũ kwa ũtonyi ũsumbĩnĩ ũũ.” 8Nĩvo ĩndĩ atai ma mũsumbĩ mookie, ĩndĩ maemwa nĩ kũsoma ala maandĩko na o ta ũu maemwa nĩ kũtavya mũsumbĩ ũalyũlo wamo. 9Mũsumbĩ Mbelisasa nĩwathĩnĩkie mũno mbeange na atukya ũthyũ. Atai make o namo nĩmavũavũanie.
10Ĩtina wa kwĩw'a mũsumbĩ na anini make maineena nyinyia wa mũsumbĩ nĩwookie nyũmba vala maĩĩaa mboka. Nĩwaneenie asya atĩĩ, “We mũsumbĩ ĩkalaa thayũ tene na tene. Mosũanĩo maku maikakũtelemye kana matume ũtukya ũthyũ waku. 11Ũsumbĩnĩ waku ve mũndũ wĩ na veva wa ngai ila ntheu. Yĩla ĩthe waku wasumbĩkĩte, mũndũ ũsu nĩwoonanisye kana e na kĩlĩko, e na ũmanyi na e na ũĩ ta wa ngai. Ĩthe waku Mũsumbĩ Nevukatinesa nĩwamũtw'ĩkĩthisye mũnene wa eki ma syama, awe, Akalitei, na ala mathanaa maũndũ maitũmĩa ndata. 12Eekie ũu nũndũ mũndũ ũsu aĩ na veva mũseo mũno; aĩ na ũmanyi, nĩweesĩ kũalyũla ndoto, na kũelesya nthimo na kũnengane ũsũngĩo wa maũndũ me vinya. Kwoou tũmana mũndũ ũsu wĩtawa Ndanieli. Mũsumbĩ amwĩtaa Mbelitesasa. Mũndũ ũsu nũkũũtavya ũalyũlo wa maandĩko aa.”
Ndanieli Aialyũla Ũandĩko ũla waĩ Ũkũtanĩ
13Nĩvo ĩndĩ Ndanieli waetiwe vala ve mũsumbĩ. Mũsumbĩ nĩwakũlilye Ndanieli atĩĩ, “We nue Ndanieli, ũmwe wa Ayuti ala ĩthe wakwa watavie kuma Yuta amaete kũũ? 14Nĩnĩw'ĩte kana wĩ na veva wa ngai ila ntheu na kana wĩ na kĩlĩko, ũmanyi na ũĩ mwingĩ. 15Andũ oĩ na awe nĩmaetwe vaa nĩĩ nĩ kana masome ũandĩko ũũ na maindavya ũalyũlo waw'o, ĩndĩ nĩmaemwa nĩ kwĩka ũu. 16Nyie nĩnĩw'ĩte kana no ũtonye kũalyũla na kũelesya nthimo. Ethĩwa nũtonya, soma ũandĩko ũũ na ũindavya ũalyũlo waw'o. Weeka ũu nũkwĩkĩwa ngũa sya langi wa nzambalaũ sya kĩ-ũsumbĩ na ĩsoa ya thaavu ngingonĩ, na kũtw'ĩka mũndũ wa katatũ kwa ũtonyi ũsumbĩnĩ ũũ.”
17Ndanieli nĩwasũngĩie mũsumbĩ amwĩa atĩĩ, “Nyie ndikwenda mĩthĩnzĩo yaku, nũtonya kũnenga mũndũ ũngĩ ĩtuvi yĩu. Ĩndĩ nyie nĩngũũsomea ũandĩko ũũ na ngĩũtavya ũalyũlo waw'o.
18“We mũsumbĩ, Ngai Ũla wĩ Ĩũlũ Mũno nĩwanengie ĩthe waku Nevukatinesa ũsumbĩ, ũnene, ũkumyo na ngatho. 19Nũndũ wa ũnene ũla wamũnengie, andũ ma nthĩ syonthe, mbaĩ na ithyomo syonthe nĩmamũkĩaa na kũtetema me mbee wake. Enda kũaa mũndũ, nĩwamũaa. Enda mũndũ ekale thayũ, nĩwamũekaa. Enda kũnenga mũndũ ndaĩa, nĩwamũnengae, enda kũmwĩkĩĩthya nthoni, nĩwamwĩkĩĩthasya. 20Ĩndĩ yĩla ĩthe waku weethĩiwe na ngathĩĩo, oomya ngoo na eethĩwa e mũng'endu nĩwaumiw'e kĩvĩlanĩ kyake kya kĩ-ũsumbĩ na avenwa nguma yake. 21Nĩwalũngilw'e kuma wĩkalonĩ wa andũ, na kĩlĩko kyake kyatw'ĩkĩthw'a ta kya nyamũ ya kĩthekanĩ. Ekalanasya na mang'oi ma kĩthekanĩ, aĩsaa nyeki ta ng'ombe na mwĩĩ wake nĩwetĩkĩawa nĩ ĩmwe kuma ĩtunĩ, nginya esa kũmanya kana Ngai Ũla wĩ Ĩũlũ Mũno nĩwe ũsumbĩkaa mosumbĩ ma andũ, na amanengae mũndũ o na wĩva ũla wanyuva. 22Naku we Mbelisasa mwana wa Nevukatinesa, o na vala nĩwĩĩsĩ maũndũ asu nĩwalea kwĩthĩwa wĩ na wĩnyivyo. 23We nũng'endeete Mwĩai wa ĩtunĩ. Mĩio ya nyũmba yake nĩyaetwe vala ũĩ na we vamwe na anini maku, iveti syaku na iveti syaku sya ndũsyo, mwanyw'a ndivai mũitũmĩa mĩio ĩsu. Nĩmwataĩa ngai iseũvĩtw'e na silĩva, thaavu, mbulonzi, kyũma, mbwaũ na mavia. Ngai isu iyĩw'aa kana kũmanya. Ĩndĩ nĩwalea kũtaĩa Ngai ũla ũtumaa wĩkala thayũ na ũkũnengae vinya wa kwĩka maũndũ onthe. 24Kĩu nĩkyo kyatuma Ngai atũma kw'oko kũla kwaandĩka ũandĩko ũũ. 25Ũandĩko ũũ waĩtye atĩĩ: MENE, MENE, TEKELI, UVALASINI. 26Ũalyũlo wa ndeto ii naw'o nĩ ũũ: MENE: Ngai nũtalĩte mĩthenya ya ũsumbĩ waku na nũminĩte ũsumbĩ ũsu. 27TEKELI: We nũthimĩtwe na kĩthimi na ũkethĩwa ũtaĩlĩte. 28UVALASINI: Ũsumbĩ waku nĩ mũaany'e na ũkanewa andũ ma Metia na Velisia.”
29Nĩvo ĩndĩ Mbelisasa weeaĩie athũkũmi make mekĩe Ndanieli ngũa sya langi wa nzambalaũ sya kĩ-ũsumbĩ, na ĩsoa ya thaavu ngingonĩ. Mũsumbĩ nĩwatavanisye kana Ndanieli nĩwe wa katatũ kwa ũtonyi ũsumbĩnĩ wake. 30Ũtukũ o ũsu, Mbelisasa mũsumbĩ wa Mbavilonĩ nĩwooaiwe. 31Ndalio kuma nthĩ ya Metia nĩwoosie ũsumbĩ ũsu e na ũkũũ wa myaka mĩongo thanthatũ na ĩlĩ.
BIBLE SOCIETY OF KENYA © 2011