Amo 7
7
Woni wa Ngie
1Mwĩai Ngai Mũsumbĩ nĩwambonisye woni ũũ: Nĩnoonie ayũmba ngie ĩvindanĩ yĩla ĩia yambĩĩie kũthongooa, ĩtina wa ũĩthyo wa nyeki ya mũsumbĩ wamina kwengwa. 2Ngie isu syamina kũya mĩmea yonthe vyũ, nĩnaneenie nasya atĩĩ, “Ame Mwĩai Ngai Mũsumbĩ nĩngũkwĩsũva, ekea. Andũ ma Ĩsilaeli makavonoka ata? Nĩ anini mũno!”
3Mwĩai Ngai nĩwaekanie na ũu na asya atĩĩ, “Ũndũ ũsu woona ndwĩĩkĩka.”
Woni wa Mwaki
4Mwĩai Ngai Mũsumbĩ nĩwambonisye woni ũngĩ. Woninĩ ũsu Mwĩai Ngai Mũsumbĩ nĩweetie mwaki wũke kũkany'a andũ. Mwaki ũsu nĩwaminie kĩw'ũ kya ũkanga na wavĩvya syĩndũ syonthe ĩũlũ wa nthĩ. 5Nĩvo ĩndĩ naneenie nasya atĩĩ, “Ame Mwĩai Ngai Mũsumbĩ nĩngũkwĩsũva, ekea. Andũ ma Ĩsilaeli makavonoka ata? Nĩ anini mũno!”
6Mwĩai Ngai nĩwaekanie na ũu na asya atĩĩ, “Ũndũ ũsu o naw'o ndwĩĩkĩka”
Woni wa Kavilũ
7Mwĩai Ngai Mũsumbĩ nĩwambonisye woni ũngĩ. Nĩnoonie aũngamĩte ũtee wa ũkũta wakĩtwe wĩ mũthime na kavilũ, akwete kavilũ na kw'oko. Nĩwangũlilye atĩĩ, “Amosi, wĩona kyaũ?” Nakwa namwĩa, “Nĩona kavilũ.”
8Nĩvo ĩndĩ Mwĩai Ngai wambĩie atĩĩ, “Nĩtũmĩa kavilũ kaa kwonany'a kana andũ makwa Ĩsilaeli, mailyĩ ta ũkũta ũte mũlũngalu na ndimaekea ĩngĩ. 9Kũndũ kũla nzyawa sya Isaka ithaithĩaa nĩkũkwanangwa, na kũndũ kũtheu kwa Ĩsilaeli kwĩtiwa kwĩ kwanangĩku. Nĩngwananga ũsumbĩ wa Yelovoamu na kaũ.”
Amosi na Amasia
10Amasia mũthembi wa Mbethi-eli nĩwatũmanie kũla kwĩ Yelovoamu mũsumbĩ wa Ĩsilaeli amwĩĩte atĩĩ, “Amosi nũkũvangĩe mũvango mũthũku andũnĩ ma Ĩsilaeli. Ũneeni wake nũũtuma nthĩ ĩno yĩthĩwa na kĩthokoo. 11Amosi easya atĩĩ, ‘Yelovoamu akakw'ĩĩa kaũnĩ, na andũ ma Ĩsilaeli nĩmeũkwatwa maumw'e nthĩ yoo na kũtwawa nthĩ ya ũeninĩ.’ ”
12Nĩvo ĩndĩ Amasia weeie Amosi atĩĩ, “We mwathani ũkĩla ũkĩe ũthi nthĩ ya Yuta na ũkyathanĩaa kw'o na ũkatuvwa. 13Ndũkatate kwathanĩa vaa Mbethi-eli ĩngĩ, nũndũ vaa nĩvo mũsumbĩ ũthaithĩaa, na nĩvo ve ĩkalũ ya ũsumbĩ wake.”
14Amosi nĩwasũngĩie Amasia amwĩa atĩĩ, “Nyie ndyaĩ mwathani, o na ndyaĩ mwana wa mwathani, ĩndĩ naĩ mũĩthi na mũsũvĩi wa mĩkũyũ. 15Ĩndĩ Mwĩai Ngai ambumya ndĩthyanĩ ya mbũi na malondu na ambĩa atĩĩ, ‘Enda ũkathane andũnĩ makwa Ĩsilaeli.’ 16Yu ĩthukĩĩsye ũndũ Mwĩai Ngai ũkwasya. Wĩmbĩa nĩnĩeke kwathana ĩũlũ wa Ĩsilaeli na nĩeke kwathana ĩũlũ wa nzyawa sya Isaka. 17Kwoou we Amasia, Mwĩai Ngai ekwĩa atĩĩ, ‘Mũka waku nũkũtw'ĩka ĩlwaya ndũanĩ, na ana na eĩtu maku nĩmekũaĩwa kaũnĩ. Nthĩ yaku nĩkũthimwa na kũaanw'a, naku we mwene ũikw'ĩĩa nthĩ ya andũ matamwĩsĩ Ngai. Vate ndĩi andũ ma Ĩsilaeli makatavwa matwawe nthĩ ya ũeninĩ.’ ”
BIBLE SOCIETY OF KENYA © 2011