Amo 5
5
Mwĩai Ngai Ayĩta Andũ ma Ĩsilaeli Maalyũle Ngoo
1Andũ ma Ĩsilaeli, ĩthukĩĩsyei ndeto ii sya kĩĩo ngũneena nũndũ wenyu:
2We Ĩsilaeli, mwĩĩtu ũtaamanyana kĩ-mwĩĩ na mũndũ-ũme;
ndũkokĩla ĩngĩ!
Ũtiĩtwe nthĩ yaku wĩ weka,
vai mũndũ ũtonya ũkũkĩlya.
3Mwĩai Ngai Mũsumbĩ easya atĩĩ, “Asikalĩ ngili ĩmwe ma ndũa ĩmwe ya Ĩsilaeli mathi kaũnĩ, ĩana nomo makasyokaa, ndũa ĩngĩ ya Ĩsilaeli yatũma asikalĩ ĩana, ĩkũmi nomo makasyokaa”
4Mwĩai Ngai eĩa andũ ma Ĩsilaeli atĩĩ, “Manthei na mũkekala thayũ. 5Ĩndĩ mũikathi Mbethi-eli kũthaitha. Mũikatate kũthi kũmantha nyie Ngilikali, kana kũinganĩsya mũthi Mbeeli-sieva. Nũndũ andũ ma Ngilikali makatwawa nthĩ ya ũeninĩ me ove, na Mbethi-eli ĩyanangwa vyũ.”
6Manthai Mwĩai Ngai na mũkekala thayũ. Mwalea kwĩka ũu, nũkũmina andũ ma Ĩsilaeli onthe ta mwaki, na mwaki ũsu nũũvĩvya Mbethi-eli vate mũndũ ũtonya kũũvosya.
7Inyw'ĩ ala mwanangaa sila wa katĩ,
na kwosa ũlũngalu ta kĩndũ kya mana!
8 #
Yovu 9.9; 38.31 Mwĩai Ngai nĩwe woombie ndata,
kĩkundi kya ndata mbingĩ, na ndata ingĩ syĩtawa Olioni.
Nũtumaa kwĩ kĩvindu kingĩ kũkya,
na kũtuma kwĩĩ mũthenya kũtuka.
Nũtavaa kĩw'ũ kya ũkanga, na aikĩtulũla ĩũlũ wa nthĩ.
Syĩtwa yake nĩ Mwĩai Ngai.
9Ngai nũtumaa andũ me vinya makwatwa nĩ wanangĩko kwa kĩthũlũmũko,
na wanangĩko ũsu ũilika nyũmbanĩ syoo ndũmu.
10Inyw'ĩ nĩmũmenete mũndũ ũla wumasya sila wa katĩ kĩsilĩlonĩ, na kũvũthya mũndũ ũla ũneenaa ũw'o. 11Nĩmũthĩnasya ngya na kwosa nganũ ya yo na vinya. Nĩmwakĩte nyũmba sya mavia masũvye, ĩndĩ mũikatũa nthĩnĩ wasyo. O na vala nĩmũvandĩte mĩũnda mĩseo ya mĩsavivũ, mũikanyw'a ndivai kuma nzavivũnĩ ya yo. 12Nũndũ nĩnĩsĩ ũndũ mavĩtyo menyu mathũkĩte, na ũndũ naĩ syenyu inenevete. Nĩmũthĩnasya ala alũngalu, mũkosa ĩtuvi ya wendeesyo na kũsiĩĩa athĩni maikasilĩlwe na sila wa katĩ kotinĩ. 13Kwoou ũla wĩ na kĩlĩko akakilya ĩvindanĩ ta yĩu, nũndũ nĩ ĩvinda ũthũku! 14Kethĩwa nĩmũkwenda kwĩkala thayũ, no nginya mũeke kwĩka maũndũ mathũku na mũyĩka maũndũ ala maseo. Nĩvo ĩndĩ Mwĩai Ngai, Ngai Mwene Ũtonyi W'onthe wĩĩthĩwa vamwe nenyu o tondũ mũkwasya e vamwe nenyu. 15Menai ũthũku na kwenda ũseo, na mũiatĩĩa sila wa katĩ isilĩlonĩ syenyu. Nĩvatonyeka Mwĩai Ngai akew'ĩa andũ ma nthĩ ĩno tei, ala matialĩte me thayũ.
16Kwoou Mwĩai Ngai Mũsumbĩ Mwene Ũtonyi W'onthe easya atĩĩ, “Kũkeethĩwa na kĩĩo kĩ woo nzĩanĩ syonthe sya ndũa, kũla andũ mombanĩaa ndũanĩ, andũ makaĩaa mayasya ĩiaa! Ĩiaa! Aĩmi makeetwa maĩe nũndũ wa ala akw'ũ, makĩtetheanĩsya na andũ ala matuvawa maĩe. 17Mĩũndanĩ yonthe ya mĩsavivũ kũkeethĩwa kĩĩo. Maũndũ asu makeekĩka nũndũ nĩnũkĩte kũmũkany'a. Nĩasya ũu nyie Mwĩai Ngai”
Mũthenya wa Mwĩai Ngai
18Kyeva nĩ kwenyu, ala mweteelaa mũthenya wa Mwĩai Ngai. Mweteelaa mũthenya wa Mwĩai Ngai nĩkĩ? Ũkeethĩwa mũthenya wa kĩvindu ti wa kyeni. 19Ũkeethĩwa ũilyĩ ta mũndũ ũkĩĩte mũnyambũ na aikomana na nyamũ mbai yĩtawa nduva, kana alika nyũmba kwake na kwaĩĩsya kw'oko ũkũtanĩ aiũmwa nĩ nzoka! 20Mũthenya wa Mwĩai Ngai ũkaete kĩvindu na ti kyeni. Ũkeethĩwa mũthenya wa kĩvindu kĩnene vate ũtisu o na vanini.
21Mwĩai Ngai easya atĩĩ, “Nĩnĩmenete na ngavũthya mboka syenyu sya kĩ-ũthaithi, o na nditanĩthaw'a nĩ mbũmbano syenyu. 22O na vala nĩmũkũnthembea nthembo sya kũvĩvw'a na sya ngetha ya mbaa mbeke, ndisyĩtĩkĩla. O na mwanthembea nyamũ syenyu nou syĩthĩwe nthembo ya ngwatanĩo, ndisyĩtĩkĩlaa. 23Vetangai mbathi syenyu vala nĩĩ. Mbathi isu nota kĩlonzo kwakwa. Ndikwenda kwĩw'a wasya wa ngitaa syenyu nene. 24Vandũ va ũu, sila wa katĩ ũatĩĩwe kĩla ĩvinda, na ũlũngalu ũyĩthĩawa vo ta ũsĩ ũtang'alaa.
25“Andũ ma Ĩsilaeli, mwaambumĩsya nthembo sya kũvĩvw'a kana nthembo ingĩ ĩvindanĩ yĩla mwaĩ weũnĩ myaka mĩongo ĩna? 26Ĩndĩ yu nĩkwĩthĩwa nĩmũthaithĩte Sakuthi, ngai yenyu ĩla mwĩtaa mũsumbĩ na mũkathaitha Kaiwani ngai yenyu ya ndata, mũkakua mĩvw'anano ĩsu yenyu mweeseũvĩisye, 27yĩla nĩmũtwaa nthĩ ya ũeninĩ ĩla yĩ mbee wa Ndamasikũ.” Easya ũu Mwĩai Ngai ũla ĩsyĩtwa yake nĩ Ngai Mwene Ũtonyi W'onthe.
BIBLE SOCIETY OF KENYA © 2011