Amo 1
1
1 #
2Asu 15.1-7; 2Mav 26.1-23; 2Asu 14.23-29 Ii nĩsyo ndeto sya Amosi ũmwe wa aĩthi kuma ndũanĩ ya Tekoa. Maũndũ ala woonie makonetye Ĩsilaeli, myaka ĩlĩ mbee wa kĩthingitho kya nthĩ, yĩla Usia waĩ mũsumbĩ wa Yuta, na Yelovoamu mwana wa Yeoasi waĩ mũsumbĩ wa Ĩsilaeli.
2 #
Yoe 3.16
Amosi nĩwaneenie asya atĩĩ,
“Mwĩai Ngai nũlulumaa kuma Kĩĩmanĩ kya Saioni;
wasya wake nũtundumaa kuma Yelũsalemu.
Isesi sya aĩthi nĩsyũmaa,
na nyeki ĩla yĩ Kĩĩmanĩ kya Kalimeli ĩyũma.”
Ũsilĩlo wa Ngai kwa Atũi ma Ĩsilaeli
Ũsilĩlo kwa Andũ ma Nthĩ ya Silia
3 #
Ĩsa 17.1-3; Yel 49.23-27; Nzek 9.1 Mwĩai Ngai easya atĩĩ, “Andũ ma Ndamasikũ nĩmavĩtĩtye ĩngĩ na ĩngĩ, na kwoou ndilea kũmakany'a, nũndũ nĩmavũie andũ ma Ngileati mũno ũndũ ngetha ya mbaa mbeke ĩvũawa. 4Kwoou nĩngũete mwaki ũvĩvye nyũmba ya kĩ-ũsumbĩ ya Mũsumbĩ Aasaeli, na ngĩvĩvya kũndũ kũlũmu kwa kwĩvitha kwa Mũsumbĩ Mbeni-aatati. 5Nĩngwananga mũvĩa wa ndũa ya Ndamasikũ, na kũvetanga andũ ala matwĩe Mwandanĩ wa Aveni, na mũsumbĩ wa Mbethi-eteni. Andũ ma Silia makatwawa nthĩ ya Kili me ove. Nĩasya ũu nyie Mwĩai Ngai.”
Ũsilĩlo kwa Andũ ma Vilisitia
6 #
Ĩsa 14.29-31; Yel 47.1-7; Esek 25.15-17; Yoe 3.4-8; Nzev 2.4-7; Nzek 9.5-7 Mwĩai Ngai easya atĩĩ, “Andũ ma Ngasa nĩmavĩtĩtye ĩngĩ na ĩngĩ na kwoou ndilea kũmakany'a, nĩkwĩthĩwa nĩmakwatie andũ ma nthĩ nima me ove, mathi kũmathoosya kũla kwĩ andũ ma Etomu. 7Nĩngũete mwaki ũvĩvye ngũta sya ndũa ya Ngasa, na ũivĩvya kũndũ kwayo kũlũmu kwa kwĩvitha. 8Nĩngũvetanga andũ ala matwĩe Asitoti, na ngĩvetanga mũsumbĩ wa Asikeloni. Nĩngũkany'a andũ ma ndũa ya Ekeloni, na Avilisiti ala matialĩte nĩmeũkw'a. Nĩasya ũu nyie Mwĩai Ngai Mũsumbĩ.”
Ũsilĩlo kwa Andũ ma Tile
9 #
Ĩsa 23.1-18; Esek 26.1—28.19; Yoe 3.4-8; Nzek 9.1-4; Mat 11.21-22; Lk 10.13-14 Mwĩai Ngai easya atĩĩ, “Andũ ma Tile nĩmavĩtĩtye ĩngĩ na ĩngĩ na kwoou ndilea kũmakany'a. Nĩmakuie andũ ma nthĩ nima me ove mamatwaa nthĩ ya Etomu, na mayaaĩanĩsya ũtianĩo ũla maseũvisye na ana-a-ĩthe. 10Nĩngũete mwaki ũvĩvye ngũta sya ndũa ya Tile, na ũivĩvya kũndũ kwayo kũlũmu kwa kwĩvitha.”
Ũsilĩlo kwa Andũ ma Etomu
11 #
Ĩsa 34.5-17; 63.1-6; Yel 49.7-22; Esek 25.12-14; 35.1-15; Ova 1-14; Mal 1.2-5 Mwĩai Ngai easya atĩĩ, “Andũ ma Etomu nĩmavĩtĩtye ĩngĩ na ĩngĩ na kwoou ndilea kũmakany'a, nũndũ Etomu akwete ũvyũ nĩwaatĩĩie mwana-a-inyia, na ndaĩ na tei. Ũthatu wake waĩ mwingĩ mũno, na ndaaeka kũthata. 12Kwoou nĩngũete mwaki ũvĩvye Temani, na ũivĩvya kũndũ kũlũmu kwa kwĩvitha kwa ndũa ya Mbosila.”
Ũsilĩlo kwa Andũ ma Amimoni
13 #
Yel 49.1-6; Esek 21.28-32; 25.1-7; Nzev 2.8-11 Mwĩai Ngai easya atĩĩ, “Andũ ma Amimoni nĩmavĩtĩtye ĩngĩ na ĩngĩ na kwoou ndilea kũmakany'a, nũndũ ĩvinda yĩla mokitaa nĩ kana manenevye kĩsio kyoo, nĩmataũie mavu ma iveti ngito Ngileati. 14Kwoou nĩngũete mwaki ũvĩvye ngũta sya ndũa ya Lava, na ũivĩvya kũndũ kwayo kũlũmu kwa kwĩvitha. Nĩvo ĩndĩ kwĩĩthĩwa na mawasya manene ma mũthenya wa kaũ, na ĩndĩ kaũ mũkamu ũyũkitwa. 15Mũsumbĩ wa Amimoni na anini make makatwawa nthĩ ĩngĩ me ove. Nĩasya ũu nyie Mwĩai Ngai.”
BIBLE SOCIETY OF KENYA © 2011