2Sam 8
8
Ũsindi wa Ndeviti Kaũnĩ
(1Mav 18.1-17)
1Ĩtina wa maũndũ asu, Ndeviti nĩwokitie na Avilisiti ĩngĩ na amasinda. O ta ũũ nĩwakwatie ndũa ya Mathengi-ama amyumya ũtonyinĩ wa Avilisiti.
2Nĩwasindie Amoavi na amavanga mĩthĩa makomete nthĩ. Katĩ wa kĩla mĩthĩa ĩtatũ nĩwooaa andũ mĩthĩa ĩlĩ na aitialya andũ mũthĩa ũmwe. Kwoou Amoavi nĩmatw'ĩkie athũkũmi ma Ndeviti, na nĩmamumĩasya koti.
3O ta ũu Ndeviti nĩwasindie Atateseli mwana wa Leovu, mũsumbĩ wa Sova, ĩvindanĩ yĩla Atateseli waendete kũtũnga kĩsio kĩla kĩ ĩũlũ wa Ũsĩ wa Euvalati kĩthĩwe ungu wa ũtonyi wake. 4Ndeviti nĩwakwatie asikalĩ ngili ĩmwe na maana mũonza ma mũsumbĩ ũsu ala malĩsaa mbalasinĩ, na angĩ ngili mĩongo ĩlĩ ala maendaa na maũũ. Nĩwoosie mbalasi syĩanĩe kũkusya makasya ma kaũ ĩana, na atilanga ila ingĩ syonthe maũũ ma ĩtina.
5Yĩla Asilia kuma Ndamasikũ mookie kũtetheesya Atateseli mũsumbĩ wa Sova, Ndeviti nĩwooaie Asilia ngili mĩongo ĩlĩ na ilĩ. 6Nĩvo ĩndĩ Ndeviti waakie maeema ma kwĩkala asikalĩ kĩsionĩ kyoo Ndamasikũ, na Asilia matw'ĩka athũkũmi make, na mambĩĩa kũmumĩsya koti. Mwĩai Ngai nĩwanengae Ndeviti ũsindi kũndũ kw'onthe kũla waendaa. 7Ndeviti nĩwoosie ngao sya thaavu, ila syaĩ sya anini ma Atateseli aitwaa Yelũsalemu. 8O ta ũu nĩwoosie mbulonzi mbingĩ kuma ndũanĩ ya Mbeta na ya Mbelothai, ila syasumbĩkĩtwe nĩ Atateseli.
9Yĩla Toi mũsumbĩ wa Amathi weewie kana Ndeviti nũnasindie asikalĩ onthe ma Atateseli, 10nĩwatũmie Yolamu mwana wake athi akakethye Mũsumbĩ Ndeviti, na aimũkathĩĩa nũndũ wa kũsinda Atateseli, ũla wokitĩte na Toi mavinda maingĩ. Yolamu nĩwaeteie Ndeviti mĩthĩnzĩo mingĩ ĩseũvĩtw'e na thaavu, silĩva na mbulonzi. 11Mũsumbĩ Ndeviti nĩwavathie syĩndũ isu kwondũ wa Mwĩai Ngai, o tondũ weekanĩte na thaavu na silĩva kuma nthĩ syonthe ila wokitĩte akasinda. 12Nthĩ isu nĩ Etomu, Moavi, nthĩ ya Aamimoni, ya Avilisiti na nthĩ ya Aamaleki. O ta ũu nĩwavathie syĩndũ ila watavie kuma kwa Atateseli mwana wa Leovu, mũsumbĩ wa Sova.
13 #
Sav 60.1
Ndeviti nĩwaendeeie kwĩthĩwa na nguma nene, yĩla wasyokie amina kũaĩa Aetomu ngili ĩkũmi na nyanya Mwandanĩ wa Mũnyũ. 14Nĩwaakie maeema ma kwĩkala asikalĩ kĩla vandũ nthĩ ya Etomu, na Aetomu onthe matw'ĩka athũkũmi make. Mwĩai Ngai nĩwanengae Ndeviti ũsindi kũndũ kw'onthe kũla waendaa.
15Ndeviti nĩwasumbĩkie Ĩsilaeli yonthe, na nĩwaatĩĩaa ũsili wa katĩ na ũw'o kwondũ wa andũ make onthe. 16Yoavu ũla inyia wake weetawa Nzeluia nĩwe waũngamĩe asikalĩ ma kaũ, nake Yeosavati mwana wa Ailuti nĩwe waiaa maũndũ ala maandĩke. 17Nzatoki mwana wa Aituvu na Aimeleki mwana wa Aviathali maĩ athembi, nake Seleia nĩwe waĩ mũandĩki. 18Mbenaia mwana wa Yeoiata nĩwe waũngamĩe andũ meetawa Akelethi na Avelethi ala nĩmo maĩ asikalĩ ma kũsunga mũsumbĩ. Namo ana ma Ndeviti maĩ atai ma kĩ-ũsumbĩ.#8.18 maĩ atai ma kĩ-ũsumbĩ: Maandĩko amwe maĩtye maĩ athembi.
BIBLE SOCIETY OF KENYA © 2011