2Sam 23
23
Ndeto sya Mũthya sya Ndeviti
1Ii nĩsyo ndeto sya mũthya sya Ndeviti mwana wa Yese. Ngai nĩwatumĩte Ndeviti anengwa ndaĩa mũno. O ta ũu Ngai wa Yakovo nĩwamũnyuvĩte ethĩwe mũsumbĩ, na aĩ mũtili wa mbathi nzeo kwondũ wa andũ ma Ĩsilaeli.#23.1 Mũtili wa mbathi nzeo kwondũ wa andũ ma Ĩsilaeli: Kana mwini wendetwe mũno nĩ andũ ma Ĩsilaeli.
2“Veva wa Mwĩai Ngai nũneenaa kwĩsĩla vala nĩĩ,
ndeto syake syĩ kanyw'anĩ wakwa.
3Ngai wa Ĩsilaeli nũneenete,
Mũsũvĩi wa Ĩsilaeli nĩwambĩie,
‘Mũsumbĩ ũla ũsumbĩkaa na ũsili wa katĩ,
ũla ũsumbĩkaa aimwĩw'a Ngai,
4ailyĩ ta kyeni kya syũa kĩmulĩkĩte kwakya tene kũte matu,
syũa yĩla yĩtumaa nyeki ĩmea kwamina kua.’
5Ũu nĩw'o Mwĩai Ngai ũkaathima nzyawa syakwa,
nũndũ nũseũvĩtye ũtianĩo wa tene na tene nakwa;
wĩw'ano ũtakanangwa na watho ũtakaalyũka.
Ũsu nĩw'o wendi wakwa;
ũsu nĩw'o ũkethĩwa ũsindi wakwa,
na vate nzika Ngai akatuma nĩthĩwa naw'o.
6Ĩndĩ andũ ala matamũkĩaa Ngai mailyĩ ta mĩw'a ĩla yĩkaw'a ĩtheka;
ĩla mũndũ ũtatonya kũkwata na moko mathei.
7Mũndũ o na wĩva ũla ũkwataa mĩw'a,
no nginya atũmĩe kĩndũ kya kyũma kana mũthya wa ĩtumo;
mĩw'a ĩvĩvĩaw'a vandũnĩ vala ĩvalũkĩte.”
Asikalĩ ma Ndeviti ala maĩ Nguma
(1Mav 11.10-41)
8Aa nĩmo masyĩtwa ma asikalĩ ma Ndeviti ala maĩ nguma; wa mbee eetawa Yosevi-mbesevethi kuma Takemoni, ũla waĩ mũtongoi wa “Ala Atatũ.”#23.8 Ala Atatũ: Kĩthyomo kya Kĩevelania kyaĩtye wa katatũ. Nĩwokitie na asikalĩ maana nyanya aitũmĩa ĩtumo yake, na onthe amoaĩa kaũnĩ ĩvindanĩ yĩmwe.
9Mũsikalĩ wa kelĩ eetawa Eleasali mwana wa Ndotai kuma mũsyĩ wa Aoo. Eleasali aĩ vamwe na Ndeviti yĩla mokitie na kũsinda Avilisiti ala moombanĩte nĩ kana mamokite. Andũ ma Ĩsilaeli nĩmasembie makĩa, 10ĩndĩ Eleasali nĩweelũmilye okita na Avilisiti nginya kw'oko kwake kwanoa eethĩwa atatonya kũlekya ũvyũ. Mũthenyanĩ ũsu Mwĩai Ngai nĩwatumie ethĩwa na ũsindi mũnene. Kaũ wamina kũthela, andũ ma Ĩsilaeli nĩmasyokie kũla kwĩ Eleasali na maumya Avilisiti ala maĩ akw'ũ ngũa sya kaũ.
11Mũsikalĩ wa katatũ eetawa Samama mwana wa Akee kuma Alali. Yĩla Avilisiti moombanĩie Lei, vandũ vaĩ mũũnda wa ndengũ, Asikalĩ ma Ĩsilaeli nĩmamakĩie masemba mathi. 12Ĩndĩ Samama nĩweethĩiwe na ũlũmu na aũngama mũũndanĩ ũsu katĩ. Nĩwaũsiĩĩie na ooaa Avilisiti. Mũthenya ũsu Mwĩai Ngai nĩwamũnengie ũsindi mũnene.
13Ĩvindanĩ ya ngetha, atatũ katĩ wa ala “Asikalĩ Mĩongo Ĩtatũ me nguma” nĩmatheeie kũla kwĩ Ndeviti ngunganĩ ya Atulamu. Ĩvindanĩ yĩu vaĩ kĩkundi kya Asikalĩ ma Avilisiti mambĩte maeema Mwandanĩ wa Alevai. 14Ndeviti aĩ kĩĩmanĩ vandũ vaiĩĩe, na vaĩ kĩkundi kya Avilisiti moosete ndũa ya Mbetheleemu. 15Ndeviti nĩweewie waũni mwingĩ na asya atĩĩ, “Nenda kethĩwa ve mũndũ ũtonya kũthi akandavĩla kĩw'ũ kuma kĩthimanĩ kĩla kĩ mũvĩanĩ wa ndũa ya Mbetheleemu nganyw'a.” 16Asikalĩ asu atatũ me nguma nĩmavĩtĩle maeemanĩ ma Avilisiti mate na w'ĩa, na mathi kũtava kĩw'ũ kĩthimanĩ kĩla kĩ mũvĩanĩ wa ndũa ya Mbetheleemu. Nĩmaeteie Ndeviti kĩw'ũ kĩu, ĩndĩ alea kũkĩnyw'a. Nĩwetie kĩw'ũ kĩu kĩthĩwe nthembo kũla kwĩ Mwĩai Ngai, 17na asya atĩĩ, “Mwĩai Ngai, nditonya kũnyw'a kĩw'ũ kĩĩ! Kwĩka ũu nĩ ũndũ ũmwe na kũnyw'a nthakame ya asikalĩ aa meĩ mũisyonĩ wa kũawa!” Kwoou Ndeviti nĩwaleile kũnyw'a kĩw'ũ kĩu.
Asu nĩmo maũndũ ala Asikalĩ asu me nguma meekie.
18Avisai mwana-a-inyia wa Yoavu, ala inyia woo weetawa Nzeluia, nĩwe waĩ mũnene wa “Asikalĩ Mĩongo Ĩtatũ ala maĩ nguma.” Nĩwokitie na asikalĩ maana atatũ aitũmĩa ĩtumo yake amoaa, na atw'ĩka mũsikalĩ wĩ nguma mũno katĩ wa “Asikalĩ Mĩongo Ĩtatũ.” 19Avisai nĩwatw'ĩkie mũnene woo, ĩndĩ ndaĩ nguma mbee wa “Ala Asikalĩ Atatũ.”
20Mbenaia mwana wa Yeoiata kuma Kaviseeli aĩ mũsikalĩ ũngĩ waĩ nguma; nĩweekie maũndũ maingĩ ma ũkũmbaũ, vamwe na kũaa asikalĩ elĩ ngũmbaũ ma Amoavi. Mũthenya ũmwe kwĩ mbevo mbingĩ nĩwatheeie alika ĩimanĩ na ooaa mũnyambũ. 21O ta ũu nĩwooaie mũndũ mũnene waĩ Mũmisili na wakwete ĩtumo. Nĩwamũkitie na ndata, amũvena ĩtumo yĩla wakwete, na amũaa nayo. 22Asu nĩmo maũndũ ma ũkũmbaũ ala Mbenaia weekie. Mbenaia aĩ ũmwe wa “Asikalĩ ala Mĩongo Ĩtatũ.” 23Mbenaia nĩwanengetwe ndaĩa mbee wa mũsikalĩ o na wĩva katĩ wa asu “Mĩongo Ĩtatũ,” ĩndĩ ndaĩ nguma mbee wa “Ala Asikalĩ atatũ.” Ndeviti nĩwamũtw'ĩkĩthisye mũtongoi wa asikalĩ ala mamũsũvĩaa.
24Asikalĩ asu “Mĩongo Ĩtatũ” maĩ: Asaeli mwana-a-inyia wa Yoavu, Elianani mwana wa Ndoto kuma Mbetheleemu, 25Samama na Elika kuma Alote, 26Elesu kuma Valiti, Ila mwana wa Ikesi kuma Tekoa, 27Avieseli kuma Anathothi, Mevunai kuma Usathi, 28Nzalimoni kuma Aoo, Maalai kuma Tovathi, 29Eleti mwana wa Mbaana kuma Netovathi, Itai mwana wa Livae kuma Ngivea mbaĩnĩ ya Mbengyameni, 30Mbenaia kuma Vilathoni, Ititai kuma myandanĩ ya Ngaasi, 31Avialivoni kuma Alivathi, Asimavethi kuma Mbalumi, 32Eliava kuma Saalivoni, ana ma Yaseni, Yonathani, 33Samama kuma Alali, Aiamu mwana wa Salali kuma Alali, 34Eliveleti mwana wa Aasivai kuma Maaka, Eliamu mwana wa Aithoveli kuma Ngilo, 35Esolo kuma Kalimeli, Vaalai kuma Alivi, 36Ikali mwana wa Nathani kuma Sova, Mbani kuma Ngati, 37Nzeleki kuma Amimoni, Naalai kuma Mbeelothi ũla wakuĩaa Yoavu mwana wa Nzeluia mĩio ya kaũ, 38Ĩla na Ngalevu kuma Yathili, 39na Ulia ũla waĩ Mũititi.
Onthe maĩ asikalĩ me nguma mĩongo ĩtatũ na mũonza.
BIBLE SOCIETY OF KENYA © 2011