2Sam 20
20
Sieva Aing'endea Mũsumbĩ Ndeviti
1 #
1Asu 12.16; 2Mav 10.16 Kwaĩ mũndũ ũmwe Ngilikali waĩ ithokoo weetawa Sieva mwana wa Mbikili kuma mbaĩnĩ ya Mbengyameni. Nĩwavuvie soo na aneena na wasya mũnene ayasya atĩĩ,
“Tũi na ngwatanĩo na Ndeviti,
na tũina ũtiĩwa kuma kũla kwĩ mwana wa Yese.
Andũ ma Ĩsilaeli ithyonthe twĩnũkei!”
2Kwoou andũ onthe ma Ĩsilaeli nĩmaekie kũatĩĩa Ndeviti, na maatĩĩa Sieva. Ĩndĩ andũ ma Yuta nĩmaendeeie kwĩthĩwa me aĩkĩĩku kũla kwĩ Ndeviti. Nĩmaendanisye nake kuma Yolotani kũthi kũvika Yelũsalemu.
3 #
2Sam 16.22
Yĩla Ndeviti wavikie Yelũsalemu nyũmbanĩ yake ya kĩ-ũsumbĩ, nĩwoosie ila iveti syake ĩkũmi sya ndũsyo watiĩte nĩ kana isũvĩae nyũmba yake ya kĩ-ũsumbĩ, na asia vandũ nyũmba. Syĩ vau nĩsyasungawa nĩ asikalĩ, na mũsumbĩ nĩwainengae syĩndũ syonthe ila ikwenda. Ĩndĩ ndaamanyana kĩ-mwĩĩ nasyo. Nĩsyekalile vau syĩ mbingĩe iilyĩ ta ndiwa, nginya syesa kũkw'a.
4Mũsumbĩ nĩweeie Amasa atĩĩ, “Enda wũmbany'e andũ onthe ma Yuta, na ũyũkany'a namo vaa nĩĩ mĩthenya ĩtatũ ĩtanathela.” 5Amasa nĩwaendie kwĩta andũ ma Yuta, ĩndĩ ndaasyoka ĩvindanĩ yĩla mũsumbĩ wamwĩĩte. 6Nĩvo ĩndĩ mũsumbĩ weeie Avisai atĩĩ, “Sieva mwana wa Mbikili nũkũtwĩka naĩ mbee wa ũndũ tweekiwe nĩ Avisalomu. Osa asikalĩ makwa na mũithi mũmũatĩĩe. Mwalea kwĩka ũu nũtonya kũthi akalika ndũanĩ mbiĩĩe na ayĩvitha tũikamũkwate.” 7Kwoou Yoavu na andũ meetawa Akelethi na Avelethi ala nĩmo maĩ asikalĩ ma kũsunga mũsumbĩ, vamwe na asikalĩ onthe ala me ũtonyi nĩmaendie matongoew'e nĩ Avisai. Nĩmaendie kuma Yelũsalemu maatĩĩa Sieva mwana wa Mbikili. 8Yĩla mavikie ĩvianĩ ĩnene yĩla yĩ Ngiveoni, Amasa nĩwakomanie namo. Yoavu nĩweekĩĩte ngũa syake sya kaũ eyũmbanĩtye kũkita. Aĩ na ũvyũ waĩ ndoonĩ wooveewe mũsivinĩ. Yĩla wookĩte kũla kwĩ Amasa, ũvyũ wake nĩwaumie ndoonĩ wavalũka. 9Nĩvo ĩndĩ weeie Amasa, “Mũnyanyawa, wĩ mũseo?” Yoavu nĩwamũkwatie kĩng'ee na kw'oko kwake kwa aũme, nĩ kana amũkethye na ngethi ya wendo. 10Amasa ndaamanya kana Yoavu nĩwakwete ũvyũ na kw'oko kũla kũngĩ. Kwoou Yoavu nĩwamũtonyie ĩvu na ũvyũ ũsu na maa make metĩka nthĩ. Akw'ĩĩie vau o na vate vata wa Yoavu kũmũkũna ĩngĩ.
Nĩvo ĩndĩ Yoavu na mwana-a-inyia Avisai maendie maatĩĩe Sieva. 11Ũmwe wa asikalĩ ma Yoavu nĩwaũngamie vakuvĩ na Amasa, na aneena na wasya mũnene ayasya atĩĩ, “Mũndũ o na wĩva ũla wendeeaw'a nĩ Yoavu, na ũla wĩ ngalĩko ya Ndeviti nĩaatĩĩe Yoavu!” 12Mwĩĩ wa Amasa wavalũkĩte nzĩanĩ katĩ wĩ na nthakame kĩla vandũ. Mũndũ ũsu waũngyĩ vakuvĩ na mwĩĩ ũsu nĩwoonie kana asikalĩ onthe mavika vo nĩmaũngamaa. Kwoou nĩwakusisye mwĩĩ ũsu awumya nzĩanĩ aũtwaa vandũ kĩsesinĩ, na aũvw'ĩka ngũa. 13Ĩtina wa mwĩĩ wa Amasa kũvetangwa nzĩanĩ, asikalĩ onthe nĩmaendanisye na Yoavu maatĩĩa Sieva mwana wa Mbikili.
14Sieva nĩwesĩlile kĩsionĩ kyonthe kya andũ ma Ĩsilaeli athi kũvika ndũanĩ ya Aveli-mbethi-maaka. Andũ onthe ma mũsyĩ wa Mbikili nĩmoombanie na mamũatĩĩa ndũanĩ ĩsu. 15Asikalĩ onthe ma Yoavu nĩmookie na meelingĩla ndũa ĩsu vala Sieva waĩ. Nĩmaakie ngasi ya kũlĩsa ũkũtanĩ ũla wiĩĩe ndũa ĩsu, na mamĩũngamya ũkũtanĩ ũla wĩ ũtee. Nĩmambĩĩie kũkũna ũkũta ũsu waiĩĩe ndũa nĩ kana maũomboe. 16Ndũanĩ ĩsu vaĩ mũndũ mũka ũmwe mũĩ waneenie na wasya mũnene e ũkũtanĩ wa ndũa asya atĩĩ, “Ĩthukĩĩsyei! Ĩthukĩĩsyei! Tavyai Yoavu nĩoke vaa; nĩenda kũneena nake.” 17Yoavu nĩwaendie, na mũndũ mũka ũsu amũkũlya atĩĩ, “Nue Yoavu?”
Nake amũsũngĩa amwĩa, “Ĩĩ ninyie.”
Mũndũ mũka ũsu amwĩa, “Mũnene, ĩthukĩĩsye ũndũ ngũkwĩa.”
Yoavu amwĩa, “Nĩnĩthukĩĩsye.”
18Mũndũ mũka ũsu amwĩa atĩĩ, “Ĩvinda ya tene andũ maneenaa makasya, ‘Ethĩwa wĩenda ũtao, enda ndũanĩ ya Aveli.’ Ũu nĩw'o andũ meekaa. 19Ithyĩ twĩ andũ ma mũuo, na aĩkĩĩku katĩ wa andũ ma Ĩsilaeli. Wĩenda kwananga ndũa ĩno ĩla nĩ ũndũ ũmwe na inyia wa Ĩsilaeli nĩkĩ? Wĩenda kwananga ũtiĩwa wa Mwĩai Ngai nĩkĩ?”
20Yoavu amũsũngĩa, “Ũu ti w'o ngwenda kwĩka. Ndiananga kana nĩomboe ndũa yenyu! 21Ũsu ti w'o mũvango witũ. Mũndũ ũmwe wĩtawa Sieva mwana wa Mbikili, kuma nthĩ yĩ iĩma ya Evalaimu nũng'endeete Mũsumbĩ Ndeviti. Mũnenganei kũla nĩĩ e weka, na nĩngũekana na ndũa yenyu.”
Mũndũ mũka ũsu amwĩa, “Nĩtũũkwĩkĩsya mũtwe wake ĩũlũ wa ũkũta.” 22Nĩvo ĩndĩ mũndũ mũka ũsu waendie kũla kwĩ andũ ma ndũa e na mũvango ũsu, na matila Sieva mũtwe mawĩkĩlya ũkũtanĩ ĩũlũ wathi kũvalũka vala ve Yoavu. Yoavu nĩwavuvie soo amanyĩthye asikalĩ make kana nĩmaĩlĩte kuma ndũanĩ. Nĩmenũkie, na Yoavu asyoka Yelũsalemu kũla kwĩ mũsumbĩ.
Anini ma Mũsumbĩ
23Yoavu nĩwe watongoesye asikalĩ ma Ĩsilaeli onthe; Mbenaia mwana wa Yeoiata nĩwe watongoesye ala andũ meetawa Akelethi na Avelethi ala nĩmo maĩ asikalĩ ma kũsunga mũsumbĩ; 24Atonilamu nĩwe watongoesye andũ ala mathũkũmĩthaw'a na vinya; Yeosavati mwana wa Ailuti nĩwe waiaa maũndũ ala maandĩke. 25Sieva nĩwe waĩ mũandĩki; Nzatoki na Aviathali maĩ athembi. 26Ila kuma ndũanĩ ya Yaili o nake aĩ ũmwe katĩ wa athembi ma Ndeviti.
BIBLE SOCIETY OF KENYA © 2011