2Sam 1
1
Ndeviti Aimanya ĩũlũ wa Kĩkw'ũ kya Saũlo
1Ĩtina wa kĩkw'ũ kya Saũlo, Ndeviti nĩwasyokie amina kũsinda Aamaleki, na ekala Nzikilaki vandũ va mĩthenya ĩlĩ. 2Mũthenyanĩ wa katatũ, mwanake ũmwe nĩwookie kuma maeemanĩ ma Saũlo. Nĩwatembũangĩte ngũa syake nĩ kyeva, na akeyũmba kĩtoo mũtwe. Yĩla wavikie vala ve Ndeviti, nĩweevalũkilye nthĩ amũnenge ndaĩa. 3Ndeviti nĩwamũkũlilye atĩĩ, “Wauma va?”
Nake amũsũngĩa, “Nakĩa kuma maeemanĩ ma andũ ma Ĩsilaeli.”
4Ndeviti amwĩa, “Ndavye kwĩkĩkie ata.”
Nake amũsũngĩa amwĩa, “Asikalĩ maitũ nĩmakĩie kuma kaũnĩ, na aingĩ moo nĩmoaiwe. O ta ũu Saũlo na mwana wake Yonathani nĩmoaiwe.”
5Ndeviti nĩwakũlilye mwanake ũsu atĩĩ, “Ũmanyie ata kana Saũlo na Yonathani nĩmoaiwe?”
6 #
1Sam 31.1-6; 1Mav 10.1-6 Nake amũsũngĩa amwĩa, “Nĩnaĩ Kĩĩmanĩ kya Ngilivoa, na noona Saũlo eyaĩĩsye ĩtumonĩ yake, na makasya ma kaũ ma Avilisiti na asikalĩ ala malĩsĩte mbalasinĩ maendee kũmũthengeea. 7Yĩla Saũlo ũnavĩndũkie asisya ĩtina na ambona nũnambĩtie, nakwa nasũngĩa nasya, ‘Ĩĩ, mũnene!’ 8Nũnangũlilye atĩĩ, ‘We nue ũũ?’ Nakwa namũsũngĩa, ‘Nyie nĩ Mũamaleki.’ 9Nũnambĩie atĩĩ, ‘Ũka ũmbũae! Nĩmũũmĩsye mũno, na ngilĩlye kũkw'a.’ 10Kwoou nĩnĩnaendie vala ũnaĩ na namũaa, nũndũ nĩnĩneesĩ kana vate nzika amina kũvalũka nũkũkw'a. Nĩvo ĩndĩ nĩnoosie ngovia yake ya kĩ-ũsumbĩ kuma mũtwenĩ wake, na mbangili kuma kw'okonĩ kwake na nĩnakũetee, mũnene.”
11Ndeviti nĩwatembũangie ngũa syake nĩ kyeva, na aũme ala maĩ vamwe nake onthe meeka o ta ũu. 12Nĩmeethĩiwe na kyeva, maĩa na matĩĩa kũya nginya ĩa mawĩoo, nũndũ wa kĩkw'ũ kya Saũlo na Yonathani na andũ ma Ĩsilaeli, ala nĩ andũ ma Mwĩai Ngai, nũndũ aingĩ moo nĩmooaĩiwe kaũnĩ. 13Nĩvo ĩndĩ Ndeviti wakũlilye mwanake ũsu wookie kũmũtavya ũvoo ũsu atĩĩ, “Kwenyu nĩ va?”
Nake amũsũngĩa, “Nyie nĩ mwana wa mũndũ Mũamaleki wĩkalaa ũeninĩ kũũ.”
14Ndeviti amũkũlya atĩĩ, “Ũleile kwĩthĩwa na w'ĩa ũyũkĩlya kw'oko kwaku wũae mũsumbĩ ũla ũnyuvĩtwe nĩ Mwĩai Ngai nĩkĩ?” 15Nĩvo ĩndĩ Ndeviti weetie ũmwe wa aũme ala waĩ namo na amwĩa atĩĩ, “Ũaa mwanake ũũ!” Mũndũ ũsu nĩwakũnie mwanake ũsu Mũamaleki amũaa. 16Ndeviti nĩwamwĩĩte, “Kĩkw'ũ kyaku kĩumana na ĩvĩtyo yaku. Nue we mwene waneena weekũsĩĩa ĩũlũ wa ĩvĩtyo yaku yĩla wasya, ‘Nĩnũaie mwĩtĩkĩw'a mauta wa Mwĩai Ngai.’ ”
Wathi wa Kĩĩo wa Ndeviti nũndũ wa Kĩkw'ũ kya Saũlo na Yonathani
17Ndeviti nĩwainie wathi ũũ wa kĩĩo nũndũ wa kĩkw'ũ kya Saũlo na mwana wake Yonathani, 18#Yos 10.13 na aumya mwĩao wathi ũsu#1.18 wathi ũsu: Kĩthyomo kya Kĩevelania kyaĩtye wathi wa ũta. ũmanyĩw'e andũ ma Yuta. (Wathi ũũ ũandĩkĩtwe Ĩvukunĩ ya Yasali.)
19“Ngũmbaũ syaku ila syĩ nguma we Ĩsilaeli,
nĩsyũaĩwe iĩmanĩ syaku!
Asikalĩ ala ngũmbaũ nĩ avalũku!
20Mũikatavany'e ũndũ ũsu ndũanĩ ya Ngathi,
mũikaũnyaĩĩkye nzĩanĩ nene sya Asikeloni;
nĩ kana mũikese kũtuma eĩtu ma Avilisiti matana,
mũikatume eĩtu ma andũ asu matamwĩsĩ Ngai mew'a mũyo.
21“Mbua ndĩkaaue iĩmanĩ sya Ngilivoa,
kana syĩthĩwe na ĩmwe!
Isesi sya iĩma isu iikaamee kĩndũ,
nĩkwĩthĩwa ngao sya andũ ngũmbaũ ivalũkangĩte kũu ite na ndaĩa;
ngao ya Saũlo ti mbake mauta ĩngĩ.
22Ũta wa Yonathani nĩwooaie andũ aingĩ,
ũvyũ wa Saũlo ndwaĩ na tei,
nĩwatemangie andũ me ũtonyi,
na wooaa amaitha make.
23“Saũlo na Yonathani maĩ endwa na ma kwendeesya;
Meethĩawa vamwe me thayũ,
na maĩ vamwe ĩvindanĩ ya kũkw'a.
Maĩ mĩtũkĩ mbee wa ndiũ,
maĩ na vinya mbee wa mĩnyambũ.
24“Eĩtu ma Ĩsilaeli, ĩai nũndũ wa Saũlo!
Ũla wamũnengie ngũa nzeo ndune mũno,
ũla wamũnengie syĩndũ sya wanake sya kwĩkĩa sya thaavu.
25“Asikalĩ ala ngũmbaũ nĩmanavalũkile,
nĩmanooaĩiwe kaũnĩ.
Yonathani avalũkĩte iĩmanĩ e mũkw'ũ.
26Nĩna kyeva nũndũ waku, mwana-a-asa Yonathani;
waĩ mũnyanyawa wakwa mũnene!
Wendo waku kũla nĩĩ ũnaĩ wa kũseng'ya,
mbee wa wendo wa mũndũ mũka.
27“Asikalĩ ala ngũmbaũ nĩmanavalũkile,
mĩio yoo ya kaũ nĩnatiiwe na ndĩ vata.”
BIBLE SOCIETY OF KENYA © 2011