2Asu 2
2
Eliya Ayambatw'a Ĩtunĩ
1Ĩvinda ya Mwĩai Ngai ya kwambatya Eliya ĩtunĩ e kĩlinginĩ nĩyavikie. Ĩvindanĩ yĩu Eliya na Elisa maĩ nzĩanĩ maumĩte Ngilikali. 2Me nzĩanĩ Eliya nĩwaneenie na Elisa amwĩa atĩĩ, “Ĩkala vaa; Mwĩai Ngai nĩwandũma Mbethi-eli.”
Ĩndĩ Elisa nĩwamũsũngĩie amwĩa atĩĩ, “Nĩngwĩvĩta ĩsyĩtwanĩ ya Mwĩai Ngai ũla wĩ thayũ, na mbee waku kana ndwĩndia.” Kwoou nĩmaendanisye Mbethi-eli.
3Nguthu ya athani ala mekalaa Mbethi-eli nĩyaendie vala ve Elisa na yamũkũlya atĩĩ, “We nĩwĩsĩ kana Mwĩai Ngai nũkwosa mũnene waku aume vala ũĩ ũmũnthĩ?”
Elisa nĩwamasũngĩie amea atĩĩ, “Ĩĩ nĩnĩsĩ ũu, ĩndĩ ekai kũneena ĩũlũ wa ũndũ ũsu.”
4Eliya nĩwaneenie na Elisa o ĩngĩ amwĩa atĩĩ, “Elisa ĩkala vaa; Mwĩai Ngai nĩwandũma Yeliko.”
Ĩndĩ Elisa nĩwamũsũngĩie amwĩa atĩĩ, “Nĩngwĩvĩta ĩsyĩtwanĩ ya Mwĩai Ngai ũla wĩ thayũ, na mbee waku kana ndwĩndia.” Kwoou nĩmaendanisye Yeliko.
5Nguthu ya athani ala mekalaa Yeliko nĩyaendie vala ve Elisa na yamũkũlya atĩĩ, “We nĩwĩsĩ kana Mwĩai Ngai nũkwosa mũnene waku aume vala ũĩ ũmũnthĩ?”
Elisa nĩwamasũngĩie amea atĩĩ, “Ĩĩ nĩnĩsĩ ũu, ĩndĩ ekai kũneena ĩũlũ wa ũndũ ũsu.”
6Eliya nĩwaneenie na Elisa ĩvinda ya katatũ amwĩa atĩĩ, “Ĩkala vaa; Mwĩai Ngai nĩwandũma Ũsĩnĩ wa Yolotani.”
Ĩndĩ Elisa nĩwamũsũngĩie amwĩa atĩĩ, “Nĩngwĩvĩta ĩsyĩtwanĩ ya Mwĩai Ngai ũla wĩ thayũ, na mbee waku kana ndwĩndia.” Kwoou me elĩ nĩmaendeeie na kyalo. 7Athani mĩongo ĩtano kuma ĩla nguthunĩ ya athani, nĩmaatĩĩie Eliya na Elisa na mathi maũngama vaasanga, masyaĩtye vala Eliya na Elisa maĩ manaũngama, ũtee wa Ũsĩ wa Yolotani. 8Nĩvo ĩndĩ Eliya waumisye ngũa yake ya ĩũlũ, amĩkũnza na akũna kĩw'ũ nayo. Kĩw'ũ kĩu nĩkyaanĩkie na Eliya na Elisa makĩlanĩlya mathi mũingo ũla ũngĩ, makinyĩle nthĩ nyũmũ. 9#Kũt 21.17 Me vau mũingo, Eliya nĩweeie Elisa atĩĩ, “Ndavye ũndũ ũkwenda ngwĩke ndanamba kwoswa kuma vala ũĩ.”
Elisa nĩwamũsũngĩie amwĩa atĩĩ, “Eka nĩtiĩwe veva ũla wĩ naw'o kũndũ kwĩlĩ.”#2.9 veva ũla wĩ naw'o kũndũ kwĩlĩ: Elisa endaa anengwe kĩla ĩkithathi yaaĩlĩte kũnengwa nĩ ĩthe ta ũtiĩwa kwĩanana na mĩao (Sisya Kũt. 21.17).
10Eliya nĩwamwĩie atĩĩ, “Ũndũ ũsu wakũlya wĩkwe wĩ vinya, ĩndĩ nũũnengwa kĩla weetya ethĩwa we nũũmbona yĩla ngwĩthĩwa ndyoswa kuma vala ũĩ, ĩndĩ walea kũmbona ndwĩnengwa kĩla weetya.”
11Eliya na Elisa maendee kũneena maendanĩtye me elĩ, o kwa mĩtũkĩ nĩvaumĩlile ĩkasya ya mwaki, yĩkusĩtw'e nĩ mbalasi sya mwaki. Ĩkasya yĩu nĩyamataanĩisye, na Eliya ooswa ambatw'a ĩtunĩ e kĩlinginĩ. 12#2Asu 13.14 Elisa oona ũndũ kweekĩka nĩwaneenie na wasya mũnene asya atĩĩ, “Ĩthe wakwa! Ĩthe wakwa! Makasya ma kaũ ma Ĩsilaeli, vamwe na asikalĩ ma kũlĩsa mbalasinĩ ma Ĩsilaeli!” Elisa ndaasyoka kwona Eliya ĩngĩ.
Elisa e na kyeva kingĩ, nĩwakwatie ngũa syake aitembũanĩlya katĩ. 13Nĩvo ĩndĩ woosie ngũa ya Eliya ĩla yavalũkile na asyoka aũngama ũtee wa Ũsĩ wa Yolotani. 14Nĩwakũnie kĩw'ũ na ngũa ĩsu ya Eliya aikũlya, “Aĩva Mwĩai Ngai, Ngai wa Eliya?” Yĩla wakũnie kĩw'ũ kĩu oou, nĩkyaanĩkie na akĩlanĩlya athi mũingo.
15Ala athani mĩongo ĩtano kuma Yeliko mamũsyaĩĩsye nĩmaneenie masya atĩĩ, “Veva wa Eliya wĩ ĩũlũ wa Elisa!” Nĩmaendie makomana nake na makumana matina nthĩ na ũthyũ me mbee wake mamũnenge ndaĩa. 16Nĩmaneenie na Elisa mamwĩa atĩĩ, “Ithyĩ athũkũmi maku twĩ na andũ ngũmbaũ mĩongo ĩtano. Eka mathi makamanthe mũnene waku. No kwĩthĩwa veva wa Mwĩai Ngai wamũkua wamũtwaa, na wamũtiĩla vandũ kĩĩmanĩ kana o vandũ mwandanĩ.”
Elisa nĩwamasũngĩie amea atĩĩ, “Aiee, mũikamatũme.”
17Nĩmathetheeisye nginya Elisa eew'a nthoni sya kũmavata na amea, “Matũmei.” Athani asu nĩmatũmie andũ asu mĩongo ĩtano makamanthe Eliya. Mamũmanthie vandũ va mĩthenya ĩtatũ ĩndĩ mayaamwona. 18Nĩvo ĩndĩ masyokie Yeliko vala Elisa wameteelete. Elisa nĩwamakũlilye atĩĩ, “Ndinamwĩie mũikathi?”
Syama ila Elisa Weekie
19Andũ amwe kuma ndũanĩ ya Yeliko nĩmaendie vala ve Elisa na mamwĩa atĩĩ, “Mũnene, o tondũ we wĩsĩ, ndũa ĩno yaitũ yakĩtwe vandũ vaseo, ĩndĩ kĩw'ũ kyayo nĩ kĩthũku na nĩkĩtumaa nthĩ yĩthĩwa ĩte na ũsyao.”
20Elisa nĩwameie atĩĩ, “Ĩkĩai mũnyũ mbakũlinĩ ĩtaamba kũtũmĩwa na mũindetee.” Kwoou nĩmamũeteie. 21Elisa nĩwaendie kĩthimanĩ na ekya ũla mũnyũ nthĩnĩ wakyo na asya atĩĩ, “Ũũ nĩw'o Mwĩai Ngai ũkwasya: ‘Nĩnatuma kĩw'ũ kĩĩ kĩthĩwa kĩ kĩseo. Kĩikaete kĩkw'ũ ĩngĩ kana kũtuma nthĩ yĩthĩwa ĩte na ũsyao.’ ” 22Kwoou kĩw'ũ kĩu nĩkyaseũvie kuma mũthenya ũsu nginya ũmũnthĩ, kwĩanana na ũndũ Elisa waisye.
23Elisa nĩwaumie Yeliko aende Mbethi-eli. E nzĩanĩ aendete, imwana imwe nĩsyaumie ndũanĩ na syamũthekeea iyasya, “Enda na ku, ũvaa ũũ! Enda na ku, ũvaa ũũ!” 24Yĩla wasyaisye ĩtina na oona imwana isu, nĩwaiumanĩie ĩsyĩtwanĩ ya Mwĩai Ngai. Nĩvo ĩndĩ nyamũ ilĩ nga mbai syĩtawa nduva syaumie mũtitũnĩ, na syatembũanga imwana mĩongo ĩna na ilĩ katĩ wasyo.
25Elisa nĩwaendie nginya Kĩĩmanĩ kya Kalimeli, na kuma vau asyoka Samalia.
BIBLE SOCIETY OF KENYA © 2011