1Ath 4
4
Mwĩkalo ũla Ũmwendeeasya Ngai
1Kũminũkĩlya mbaitũ, nĩtwamũmanyĩisye ũndũ mwaĩlĩte kwĩkala mũmwendeesye Ngai, na nengĩ ũu now'o mũendee na kwĩka. Ĩndĩ yu nĩtũũmwĩsũva, na kũmũthangaasya nthĩnĩ wa Mwĩai Yesũ mwĩke nesa mbee. 2Nĩmũlilikene mĩao ĩla twamũnengie ta aatĩĩi ma Mwĩai Yesũ. 3Ngai eenda mwĩthĩwe mwĩ atheu, na kwoou ĩsiĩĩanei na molaalai. 4Kĩla mũndũ-ũme nĩwaĩlĩte kũmanya ũndũ waĩlĩte kwĩkalany'a na mũka kwa nzĩa ya ũtheu na ya ndaĩa, 5ĩndĩ ti kwa mawendi mathũku ta ma Andũ-ma-mbaĩ-ingĩ, ala matamwĩsĩ Ngai. 6Ũndũnĩ ũsu vai mũndũ waĩlĩte kũvĩtĩsya Mũklĩsto ũla ũngĩ kana kũmũkenga. Nĩkwĩthĩwa nĩtwamũtavisye navu mbeenĩ, kana Ngai akasilĩla andũ ala mekaa maũndũ ma mũthemba ũsu. 7Ngai ndaatwĩta twĩkalae mwĩkalo mũthũku wa ũlaalai; atwĩtie twĩkalae na ũtheu. 8Kwoou mũndũ ũla ũkũleana na ũmanyĩsyo ũũ, ndeũleana na mũndũ; eleana na Ngai ũla ũmũnengae inyw'ĩ Veva Mũtheu wake.
9Ngalĩkonĩ ya kũmenda aĩkĩĩi ala angĩ, inyw'ĩ mũi na vata wa kũandĩkĩwa nĩ mũndũ, nũndũ inyw'ĩ ene nĩmũmanyĩĩtw'e nĩ Ngai ũndũ mwaĩlĩte kwendana. 10Kwa w'o nĩmwendete aĩkĩĩi onthe kĩla vandũ nthĩ ya Masendonia, ĩndĩ mbaitũ nĩtũũmũkũlya mũmende mũno mbee. 11Tatai mũno kwĩkala mũuĩtye, kĩla mũndũ ayĩka maũndũ ala make na kũtethya wĩa we mwene, o tondũ twamwĩaĩie. 12Kwa nzĩa ĩsu mũkanengwa ndaĩa nĩ andũ ala mate aĩkĩĩi, na mũikethĩwa na vata wa kũtethw'a nĩ mũndũ.
Kũka Ĩngĩ kwa Mwĩai
13Mbaitũ, nĩtũkwenda mũmanye ũw'o ĩũlũ wa ala maminĩte kũkw'a, nĩ kana mũikethĩwe na kĩmako ta andũ ala mate na wĩkwatyo. 14Nĩtũĩkĩĩaa kana Yesũ nĩwakwie na athayũũka, na kwoou nĩtũĩkĩĩaa kana Ngai akaete vamwe na Yesũ ala makwie mamũĩkĩĩe.
15 #
1Ako 15.51-52
Kĩla tũũmũtavya yu nĩ ũmanyĩsyo kuma kwa Mwĩai: Ithyĩ ala twĩ thayũ, ala tũkethĩwa tũtiele ĩvindanĩ ya kũka ĩngĩ kwa Mwĩai, tũikathi kũmũkomana mbee wa ala maminĩte kũkw'a. 16Nĩkwĩthĩwa Mwĩai mwene akatheea kuma ĩtunĩ na wasya mũtũlu, na kwĩtana mũno kwa mũlaĩka ũla mũnene, na wasya wa soo wa Ngai, na ĩndĩ ala makwie mamũĩkĩĩe Klĩsto makamba kũthayũũka. 17Nĩvo ĩndĩ ithyĩ ala twĩ thayũ, ala tũkethĩwa tũtiele, tũkoswa vamwe namo mathweonĩ tũkamũthaũe Mwĩai yayayanĩ. Kuma vau tũkeethĩwa vamwe na Mwĩai tene na tene. 18Kwoou ĩndĩ, kiakianasyai na ndeto isu.
BIBLE SOCIETY OF KENYA © 2011