Jɛnɛsis 1
1
Jeŋbɔɔ he sane
1 #
Bɔf 17.24; Kpoj 4.11; Heb 11.3; Yoh 1.1-3 Shishijee mli lɛ Nyɔŋmɔ bɔ ŋwɛi kɛ shikpɔŋ. 2Ni shikpɔŋ lɛ yɛ olɛŋlɛ, ni efee flóŋŋ, ni duŋ ha nu babaoo ni ha shikpɔŋ lɛ nɔ lɛ hiɛ; ni Nyɔŋmɔ Mumɔ lɛ ha nu lɛ hiɛ.
3 #
Lal 33.9; 2 Kor 4.6 Ni Nyɔŋmɔ fã akɛ, “La aba.” Kɛkɛ ni la ba. 4Ni Nyɔŋmɔ na akɛ la lɛ hi. Ni Nyɔŋmɔ gbala la lɛ kɛ duŋ lɛ mli. 5Nyɔŋmɔ tsɛ la lɛ shwane, ni duŋ lɛ etsɛ lɛ nyɔɔŋ. Je na, ni je tsɛre, ni no ji klɛŋklɛŋ gbi lɛ.
6Kɛkɛ ni Nyɔŋmɔ fã akɛ, “Atatu aba koni eja nu lɛ mli enyɔ.” 7No hewɔ lɛ, Nyɔŋmɔ fee atatu lɛ ni eja nu lɛ mli enyɔ koni ana nu yɛ atatu lɛ shishi ni ana nu yɛ atatu lɛ yiteŋ; ni eba mli nakai. 8#2 Pet 3.5 Nyɔŋmɔ tsɛ he ni atatu lɛ yɔɔ lɛ akɛ ŋwɛi. Je na, ni je tsɛre; no ji gbi ni ji enyɔ lɛ.
9Kɛkɛ ni Nyɔŋmɔ fã akɛ, “Nu ni yɔɔ ŋwɛishishi lɛ abua ehe naa yɛ he kome, koni ana shikpɔŋ gbiŋ lɛ!” Ni eba mli nakai. 10#Hiob 38.8-11 Nyɔŋmɔ tsɛ he ni egbi lɛ akɛ shikpɔŋ, ni nu ni ebua ehe naa lɛ etsɛ lɛ ŋshɔ; ni Nyɔŋmɔ na akɛ ehi. 11Kɛkɛ ni Nyɔŋmɔ fã akɛ, “Shikpɔŋ lɛ akwɛ̃ bai kɛ tsei kɛ jwɛi; tsei ni woɔ yibii ni wui yɔɔ mli, kɛ yeli tsei ni woɔ yibii ni wui yɔɔ mli, eko fɛɛ eko lɛ yɛ ehenɔ yɛ shikpɔŋ lɛ nɔ!” Ni eba mli nakai. 12Shikpɔŋ lɛ kwɛ̃ tsei kɛ bai kɛ jwɛi; tsei ni woɔ yibii ni wui yɔɔ mli, kɛ yeli tsei ni woɔ yibii ni wui yɔɔ mli, eko fɛɛ eko kɛ ehenɔ yɛ shikpɔŋ lɛ nɔ. Ni Nyɔŋmɔ na akɛ ehi. 13Ni je na, ni je tsɛre; ni no fee gbi ni ji etɛ̃ lɛ.
14 #
Lal 74.16
Kɛkɛ ni Nyɔŋmɔ fã akɛ, “Kanei aba ŋwɛi atatu lɛ mli koni amɛtsɔ̃ɔ shwane kɛ nyɔɔŋ teŋ srɔto ni amɛtsɔ̃ɔ okadii kɛ bei kɛ gbii kɛ afii, 15ni amɛtsɔ̃mɔ kanei yɛ ŋwɛi atatuiaŋ ni amɛtso yɛ shikpɔŋ lɛ nɔ.” Ni eba mli nakai. 16#Lal 136.7-9 Nyɔŋmɔ bɔ kanei wuji enyɔ lɛ koni ewulu lɛ aye shwane nɔ ni bibioo lɛ aye nyɔɔŋ nɔ, ni ebɔ ŋulamii lɛ hu. 17Nyɔŋmɔ kɛ amɛ wo ŋwɛi atatu lɛ mli koni amɛtso yɛ shikpɔŋ lɛ nɔ, 18koni amɛye shwane kɛ nyɔɔŋ nɔ, ni amɛgbala la lɛ kɛ duŋ lɛ mli. Nyɔŋmɔ na akɛ ehi. 19Ni je na ni je tsɛre ni no fee gbi ni ji ejwɛ lɛ.
20Kɛkɛ ni Nyɔŋmɔ fã akɛ, “Nu lɛ awo loi nyɛŋɛnyɛŋɛ, ni loofɔji afliki yɛ ŋwɛi kɔɔyɔɔ lɛ mli!” 21No hewɔ lɛ, Nyɔŋmɔ bɔ ŋshɔŋ loi wuji lɛ kɛ nɔ fɛɛ nɔ ni hiɛ kã ni tsiɔ ehe ni nu lɛ ewo nyɛŋɛnyɛŋɛ lɛ. Asaŋ ebɔ loofɔji fɛɛ yɛ amɛhenɔ. Nyɔŋmɔ na akɛ ehi. 22Kɛkɛ ni Nyɔŋmɔ jɔɔ amɛ, ni ekɛɛ, “Nyɛfɔa koni nyɛyi afaa ni nyɛyimɔa fai kɛ ŋshɔ mli obɔ̃bɔ̃, ni loofɔji afa yɛ shikpɔŋ lɛ nɔ!” 23Ni je na ni je tsɛre, ni efee gbi ni ji enumɔ lɛ.
24Kɛkɛ ni Nyɔŋmɔ fã akɛ, “Shikpɔŋ lɛ awo bɔɔnii ni hiɛ kã yɛ amɛhenɔ: shĩa kooloi kɛ kooloi ni wamɔɔ kɛ ŋaŋ kooloi yɛ amɛhenɔ!” Ni eba mli nakai. 25Nyɔŋmɔ bɔ ŋaŋ kooloi yɛ amɛhenɔ kɛ shĩaŋ kooloi yɛ amɛhenɔ kɛ nii fɛɛ ni wamɔɔ yɛ shikpɔŋ yɛ amɛhenɔ. Nyɔŋmɔ na akɛ ehi.
26 #
Lal 8.5-8
Kɛkɛ ni Nyɔŋmɔ kɛɛ, “Nyɛhãa wɔbɔa gbɔmɔ adesa yɛ wɔsu nɔ, tamɔ wɔhenɔ, koni eye ŋshɔŋ loi kɛ loofɔji kɛ shĩaŋ kooloi kɛ ŋaŋ kooloi fɛɛ kɛ nɔ fɛɛ nɔ ni wamɔɔ yɛ shikpɔŋ lɛ nɔ lɛ nɔ!” 27#Efes 4.24; Jɛn 2.7; Mat 19.4; Mar 10.6 No hewɔ lɛ, Nyɔŋmɔ bɔ gbɔmɔ adesa yɛ esu nɔ, Nyɔŋmɔ su lɛ nɔ ebɔ lɛ yɛ, ebɔ nuu, ni ebɔ yoo. 28#Bɔf 17.26 Kɛkɛ ni Nyɔŋmɔ jɔɔ amɛ ni ekɛɛ amɛ akɛ, “Nyɛfɔa ni nyɛyi afa. Nyɛyea ŋshɔŋ loi kɛ ŋwɛi loofɔji kɛ nɔ fɛɛ nɔ ni hiɛ kã ni tsiɔ ehe yɛ shikpɔŋ lɛ nɔ lɛ anɔ.” 29Nyɔŋmɔ kɛɛ akɛ, “Naa, mikɛ tsei ni woɔ dumɔwui kɛ tsei ni woɔ yeli yibii ni wui yɔɔ mli ni yɔɔ shikpɔŋ lɛ nɔ lɛ ehã nyɛ koni nyɛye.” 30“Kooloo fɛɛ kooloo ni yɔɔ shikpɔŋ lɛ nɔ kɛ kɔɔyɔŋ loofɔlɔ fɛɛ loofɔlɔ kɛ nɔ fɛɛ nɔ ni wamɔɔ yɛ shikpɔŋ lɛ nɔ ni wala mumɔ yɔɔ emli lɛ, mikɛ baa fɔ fɛɛ baa fɔ ehã lɛ koni eye!” Ni eba mli nakai. 31Kɛkɛ ni Nyɔŋmɔ kwɛ nibii ni efee lɛ fɛɛ, ni naa, ehi naakpa. Ni je na ni je tsɛre; ni no fee gbi ni ji ekpaa.
Valgt i Øjeblikket:
Jɛnɛsis 1: NEGAB
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Bible in Ga Language © Bible Society of Ghana, 2020.