Sọlọmọnị Ḅẹlẹtẹịn Nume 2
2
1Yẹrị anie papaa lẹsẹrẹ kiri ḅụ so-pakarị rosi nwẹn-sịn fịlawa,
tụndụ suku so-pakarị lili nwẹn-sịn fịlawa.
Owiḅọ Ḅe
2Nangị asịn ogboku so-pakarị lili
nwẹn-sịn fịlawa mẹ na kịkarị ḅọ
anie ị̀ ḅẹlẹmaḅọ ma ereme ogboku ḅụ.
Ẹrẹḅọ Ma
3Opu piri-ḅio-ḅẹ asịn ogboku ḅụ apụlụ
nwẹn-sịn sịn mẹ sime-ḅara,
mie ị̀ ḅụụ yelatẹịn ḅọ ḅe sime-ḅara,
ọ̀ kẹ ja owiapụ na tọnma ḅụ.
Arị anị ḅẹ sịḅị-kikima-yọ ḅụ lẹgị-sime ḅẹlẹmam,
tẹ anị ḅẹ mgbọlụ mẹ ị̀ ḅịḅị ḅẹlẹm.
4Ori ị̀ kẹ ori alalị fị warị kuḅu mum,
tẹ ḅẹlẹma ḅịtẹ kẹ ị̀ gbaịnm.
5Samụnọtẹ girepu#2.5 Samụnọtẹ girepu anie, rezini ḅekin ḅịḅị ḅụ sịnmgbọlụ kẹ ịwọ ịnyọ kẹ ị̀ pịrịị,
tẹ apụlụ sịnmgbọlụ ma kẹ ì ḅio deinmam.
Ị̀ ḅụụ ịnyọ fa tẹẹ í gotẹ lẹlẹ ḅụ.
6Mimgbe í ere-ḅara#2.6 Mimgbe í ere-ḅara Hiburu Bayịbụlụ ḅụ, mimgbe ori ere-ḅara ị̀ sịḅị saakị tẹ
ị́ ama-ḅara#2.6 Hiburu Bayịbụlụ ḅụ, ori ama-ḅara ì oju mọnị-mọnị tẹẹ.
7Jeruselemu ḅẹ ereme, ó minini ị̀ pịrịị;
ọmịnị ịnwa na tụḅụra na kẹ ye karịị,
mịnẹ ọ́ wamịna ḅẹlẹma ḅụụ-fụkama ḅịa.
Maaịn Karama Nume Mẹ
Ẹrẹḅọ Ma
8Àrị ị̀ ḅẹlẹmaḅọ pọkọ naarị.
Ọ̀ tụndụ ma ọgọnọ ḅụ mangị ma-ḅoarị,
Ọ̀ kala tụndụ ma ọgọnọ ḍosi-ḍosi tẹ bọọma ị̀ dama-ḅoarị.
9Ị̀ ḅẹlẹmaḅọ ḅe sarasara ma mangịarị ḅara gbala ịnwa,
gbala pịkị asambịrịma tụḅụra.
Anị anga ọ̀ warị-akaka sịẹ wararị.
Ori ikiḅa-ḅọkọ ḅụ toluma ḍikiarị,
tẹ foo anga ḅụ iḅi nungu ḅọrọma-ḅọrọma ḍikiarị. 10Ị̀ ḅẹlẹmaḅọ ẹkwẹn ị̀ pịrịarị.
Owiḅọ Ḅe
Ọkọ ẹrẹsị ḅoo, ị̀ ḅẹlẹmaḅọ;
ì iḅi-ḅọ, ị̀ na ḅoo.
11Oḅoku sakị mẹ ḅọrọ tẹẹ; eene daasịẹ tẹẹ;
12piri ọgọnọ-jụ ḅẹ fịlawa ma panga-ḅaa tẹẹ,
mie nume-su sakị mẹ;
ḍụọ-kọrị apiri ma ḅio olosịkịya nume pọkọ fiearị.
13Ịla asịnmgbọlụ saakị ḅịyarị;
kụrọ asịn panga-ḅaa tẹ kụnụ wasarị.
Ọkọ ẹrẹsị ḅoo, ị̀ ḅẹlẹmaḅọ
ì iḅi-ḅọ, ị̀ na ḅoo.
14Ị̀ ḅẹlẹmaḅọ, ị́ ḅọị faam, ịkụ foo wararị yọ ḅụ
olosịkịya ḅọị ḅara.
Yee àrị í iḅi tọrụkuḅu ẹrị,
tẹ ị́ sịḅịḅio sima pọkọ naa.
15Pụnụ ma kuun, ḍọkọḍọkọ apụnụ ma kuun,
tẹrẹmẹ ịn wamịna girepu-ḍụọ ḅio panga-ḅaa tẹ aị ma guluguluma.
Ẹrẹḅọ Ma
16Ị̀ ḅẹlẹmaḅọ sime ị̀ pịrịm, yẹrị sọ sime ọ̀ pịrịm.
Lili nwẹn-sịn afịlawa ogboku mie ò fịye kẹ
ori anana-ogbo pịrị fịarị,
17nwenii dede fẹrụ fie tẹ
kanakana kaan-so.
Ì iḅi-ḅọ, pịkịma-ḅoo, tuu sime-ḅara,
ịnwa Bẹta tụndụ ma ọgọnọ ḅụ sime-ḅara.
(C) The Bible Society of Nigeria