Devidi-Anume 89
89
Sịẹ Ḅụụ-fụka Sakị Ḅụ Su Nume
1Yei KỊNỊNYANAḄỌ, sakị mamgba arị í kuno-a ḅẹlẹma mẹ ḅẹ nume su ḅa;
à ḅioḅẹngbọ kẹ ị́ ḅụụ ḅụ gbana na-iḅim mẹ ḍuko wasama gbamaso ḅa.
2À nimi wararị mịnẹ ị́ ḅẹlẹma mẹ sime mu ḅẹẹ-sakị ḅẹẹ-sakị la ḅa,
mịnẹ ḅioḅẹngbọ kẹ ị́ ḅụụ ḅụ gbana na-iḅim mẹ sime gbamasom, So-tọrụ mẹ sime-ḅara.
3Ị́ ḅẹẹm, “Àrị à sẹlẹ ọkị tẹ tomḅọ ḅe na ọḅọkụ fị tẹẹ;
à ye minini ị̀ fịrịmẹnjịḅọ Devidi pịrị tẹ,
4 #
2 Sam 7.12-16; 1 Pkị 17.11-14; Dev 132.11; Fịr 2.30 ‘Í furo-ḅẹ-ḅọ sakị mamgba ama-da ḅa;
ị́ ama-da ọrụ mẹ arị anị wẹrị kpaịnma mu ḅẹẹ-sakị ḅẹẹ-sakị la ḅa.’ ”
5So ma ị́ kọrịarị ḅụụ-buama-aị ma ḅẹ nume-suarị;
KỊNỊNYANAḄỌ, fịafịa apụ ma ḅioḅẹngbọ kẹ ị́ ḅụụ ḅụ gbana na-iḅim mẹ ḅẹ nume-suarị.
6KỊNỊNYANAḄỌ, So-ḅio gbọrụḅọ-sọ ị́ kịka-a;
So-ḅio ḅẹ apụ ma ḅụ ị́ na gbasị ḅọ ofori.
7Fịafịa apụ ma kobiri mẹ ḅụ ini ị́ mangịmarị;
tẹ inimgba ị́ tọrọkọ ḅụ ḅụụ ḅaa ḅara kẹ sịẹ wararị.
8KỊNỊNYANAḄỌ, kụrọmamgba Nyana Tamụnọ,
gbọrụḅọ-sọ opu kụrọ nyana ị́ na gbasị-a;
Yei KỊNỊNYANAḄỌ, ye mamgba ḅụ ḅioḅẹngbọ kẹ ị́ ḅụụ ḅụ gbana na-iḅim.
9Ị́ ḅẹrẹtọn kụrọ nyana wararị abajị mẹ pịrịarị,
anị ḅụ ọnụngọ ḍụrụkụ sakị í deinmarị.
10Ị́yẹrị Rehabụ, minji ḅio ḅẹ si opu nama ḅe ponoma kọsịma tẹ ọ̀ ḅaam;
í opu kụrọtẹ ịnyọ ḅụ í si kẹ ị́ tọn apụ ma mịẹ tẹ owu ịna ḅara siinm.
11So í nye, kiri mẹ sọ í nye;
tomikiri mẹ na anị ḅio simearị ye goyegoye na tẹmẹm.
12Ị́yẹrị ọgọnọ-jụ mẹ na abajị suku mẹ na tẹmẹm;
Tabọ Tụndụ na Hamọnị Tụndụ na ḍereku ḅụ nume-su í bomarị.
13Í opu kụrọ mẹ la ḅara ḍikii!
Í opu ịnyọ mẹ la ḅara ḍikii!
14Ị́ ama-da ḅẹrẹtọn mẹ karakara mịẹ na karakara ḅẹrẹkọn na ọgọnọ mie anị sịẹsime wararị;
ị́ mịẹarị aị mamgba ḅẹlẹma na ḅioḅẹngbọ kẹ ị́ ḅụụ ḅụ gbana na-iḅim na ḍie-pakamarị.
15Ini ma tẹ nume kẹ sunsin ị́ pịrịarị apụ ma ịn kpọma ḅioḅẹlẹarị ḅara ḍikii,
anie í iḅi-yemịẹ-ḅara ḅụ ḅẹ bele ḅụ angarị apụ ma!
16Í gotẹ bebe ene mẹ ḅụ in ḍerekuarị
ịn pịkị í iḅi gotẹ í tokiniarị.
17Í opu owu-ḅara-iḅi-ḅi-ḅi kẹ wa pịrịarị;
ị́ ḅẹlẹma ḅụ ị́ mịẹ tẹ wa owu-kụrọnịapụ sọarị.
18Yei KỊNỊNYANAḄỌ, wa gbaịn-arị ḅọ sẹlẹ wa pịrịm;
Izirẹlị tẹkẹarị Fịafịa Tamụnọ ḅe, wamịna amadaḅọ kẹ wa pịrịm.
Tamụnọ Minini Devidi Pịrị Ye
19Ḍawọ-jụ pembe ḅara ḅụ, alatẹ sakị ḅụ,
ị́ ị́ afịrịmẹnjịapụ, ḅioḅẹngbọ kẹ
ḅụụ ḅụ gbana na-iḅi apụ ma ḅẹẹm:
À ḅarasụa kẹ eresoarị gbọrụ ọmụḅọ pịrị tẹ
arị emine mẹ kẹ tomi ma ogboku
à sẹlẹ pakama-ḅo pịrị tẹ.
20 #
1 Sam 13.14; Fịr 13.22;
1 Sam 16.12
Àrị ị̀ fịrịmẹnjịḅọ Devidi kẹ amadaḅọ mịẹ tẹ
fịafịa olo kẹ ọ̀ sịḅị sara ḅụ.
21Ị̀ ịnyọ sakị mamgba ori na sime ḅa,
ị̀ kụrọ ọ̀ mịẹ kụrọma ḅa.
22Gbala-gbala si kẹ ọ̀ tọn apụ ma ọ̀ ḅụụ in ḅii ye nyana ḅịa;
si-sịḅịḅio-sụapụ ma owu kiri ọ̀ nẹngịma ḅịa.
23Àrị owu kẹ ọ̀ paka apụ ma
gbẹẹ kọsịma tẹ ò ḍiki-ḅioḅuarị ḅọ goḅọ-goḅọ ḅaa ḅa.
24Àrị ọ̀ ḅẹlẹma tẹ à minini ọ̀ pịrị ḅara mịẹ ḅa;
à mịẹ tẹ sakị mamgba owu ọ̀ ḅara iḅi ḅa.
25Àrị ọ̀ daarị anga mẹ ḍụḅama ḅa
Mẹdịterenanị abajị mẹ ḅụ ọkị mu Yuferetisi Tọrụ mẹ la.
26Ori ị̀ ḅẹẹ ḅa:
Ị́yẹrị ị̀ ḍa pịkị ị̀ Tamụnọ;
ị̀ gbaịn-arị ḅọ pịkị ị̀ ḅọrọma ḅọ.
27 #
Mịẹ 1.5
Àrị ọ̀ kẹ ị̀ tarị owiḅọtụḅọ sọma ḅa,
amadapụ mamgba ḅụ tẹịnḅọ.
28Sakị mamgba àrị à minini ọ̀ pịrị ḅara mịẹ ḅa
anịsakị àrị ori na fị wararị ọḅọkụ mẹ sime mu ḅẹẹ-sakị ḅẹẹ-sakị la ḅa.
29Ori ama-da ọrụ mẹ sime-gbamaso ḅa So-tọrụ mẹ sime-ḅara;
ò furo-ḅẹ-ḅọ sakị mamgba ama-da ḅa.
30Kụma ò furo-ḅẹ-apụ ma ì oloko koko
tẹ à tọn kuroma aị ma ḍiki anga-a ḅẹḅẹ,
31ini ịn mịẹ ḅẹ tẹ à ḍuko aị ma
kẹ ye-sịn-a tẹ à tọn aị ma koko-a ḅẹḅẹ,
32anị sakị rẹ mie àrị ịna asi gotẹ fomu-ḅara kẹ ịn pịrị ḅarịye;
à mịẹ tẹ ịna mịẹ-irima ma ḅụ ịn tọrụsiẹrị ḅa.
33Anịsọ à ḅarị Devidi ḅẹlẹma-a so ḅịa,
anịanịa à minini ọ̀ pịrị ḅara mịẹ-a so.
34Àrị ori na fị wararị ọḅọkụ mẹ à kan siin ḅịa
anịanịa à minini ọ̀ pịrịye mẹ ḅẹ gberie ḅụ ḅịḅị ḍima.
35“Àrị ị̀ fịafịa ẹrẹ mẹ ḅụ minini ye mẹ à gbọrsịḅị minini fama tẹ:
gbala-gbala arị iruo Devidi pịrị ḅịa.
36Sakị mamgba ori ò furo-ḅẹ-apụ nyana ḅa,
tẹ à tọrụ kẹ ọ̀ daarị ama mẹ ḅụ wẹrị ḅa
ịrụa paa ḅịyarị sakị goyegoye.
37Anị sime gbamaso ḅa akalụ mẹ sime-ḅara,
anie So-tọrụ ḅụ sime tẹ ḅioḅẹngbọ-kẹ-sịrẹrẹ-niḅi ḅẹrẹ-kiri-sime ye sọ wararị ye mẹ.”
Owu Amadaḅọ Ḅe Ḅara-si Ye Gotẹ Kọn Owu
38Kụma ị́ ịganị ị́ sẹlẹ ọkị tẹ amadaḅọ ḅe pịrịarị;
ị́ ọ̀ ḅụ puu so tẹ ọ̀ sịkị tẹ.
39Ị́ ị́ fịrịmẹnjịḅọ ḅe na
fị ọḅọkụ mẹ kan-siin tẹ
ori ama-da sun kẹ lịka ḅio gbin tẹẹ.
40Ori opu ama mẹ onu ma
í sukuruma-gbin tẹ
ọ̀ kụrọnị-anga mamgba wẹrịso
tẹ arị kan sara simearị.
41Mẹnjị-ḅọrọarịapụ mamgba ori aị furuarị
ori na kpeki wararị asịẹ mamgba ọ̀ ḍẹrịarị.
42Ị́ owu-ḅara-iḅi mẹ kẹ si kẹ ọ̀ tọn apụ ma pịrị tẹ;
ị́ mịẹ tẹ inimgba ḅioḅẹlẹ tẹ.
43Ị́ ori owuna-aị ma kẹ
ye-ḅụ-sọ-a aị mịẹ tẹ
owu ọ̀ ḅara si tẹ ọmụ kiri ḅụ.
44Ị́ ọ̀ ḅara ama-da mkpara mẹ ọkị tẹ
ori emine mẹ sukuruma kiri gbin tẹẹ.
45Ị́ mịẹ tẹ ọ̀ la-a sakị kẹ omongi tẹ
ọ̀ tọrụ-tuu tẹ ḅụụ-jịrị ḅụ.
Ḍụa-ḅọrọma Gotẹ Kọn Tẹkẹ
46KỊNỊNYANAḄỌ, ị́ ị́ ḅụụ ḅọị gbamaso ḅẹ?
Ị́ ịganị mẹ fịnị kọrị ḅara kọrị mu tọ sakị la ḅẹ?
47Ì ḍumo kpụlụ la ḅara kẹ ḅiokoroma;
pịkị kẹ ḅiokoroma mịnẹ wamịnị-mgba fịị, fịị oju ḅara mie ị́ kẹ wa tẹmẹ ye.
48Tụḅọ inetẹ ḍumo tẹ gbala-gbala fịị ḅịa?
Ndẹẹ tomi inetẹ ḍuḅu gbarị ḅẹ ḅara?
49KỊNỊNYANAḄỌ, tarị-pịrịpịrị-ḅụ ị́ ḅẹlẹma mẹ ḍie pakama pakama aị ma tọ-anga emi?
Í minini Devidi pịrị-aị ma tọ-anga emi?
50Ịn kẹ yẹrị ị́ fịrịmẹnjịḅọ ḅẹ gulugulumarị ḅara mẹ kẹ ḅioḅọrọma ma,
à kẹ oru nimi apụ ma gbo aị na karị aị ma na inema alama tẹ ḅara mẹ.
51Yei KỊNỊNYANAḄỌ, si kẹ ị́ tọn apụ ma sẹlẹ ọkị amadaḅọ ḅe gulugulumarị!
Ò mu anga, mu anga ini ò gulugulumarị.
52KỊNỊNYANAḄỌ ḅe tokini mu ḅẹẹ-sakị ḅẹẹ-sakị la!
Amẹnị! Amẹnị!
(C) The Bible Society of Nigeria