Devidi-Anume 83
83
Si Kẹ Izirẹlị Tọn Apụ Ma Nẹngịma Gotẹ Kọn Tẹkẹ
1Yei Tamụnọ, gbọsime ma;
ḅụụ-jikea ḅara sime ma, yaụ-sime ma!
2Ḍikii! Si kẹ ị́ tọn apụ ma saakị tẹ ị́ na tụḅụrụ tẹ,
tẹ í ḍiki-ḅioḅuarị apụ ma kọngọ kụrọma tẹ.
3In ḅọị ḅara kẹ si-aị tọn ị́ atomi ma ọgọnọ gbanarị;
ịn si ḅẹrẹ-ḅiya ị́ gbaịn-arị apụ ma pịrịarị.
4Ini mẹẹ, “Ó ḅo wa ịna sịẹ mẹ kan sara,
anịsakị tomi Izirẹlị kẹ ḅioḅọrọma gbamaso ḅa.”
5Ịn gbọrụ-ḅịḅị-fie tẹ ịn tọn-arị ye mẹ ḅụ,
tẹ ị́ na tụḅụrụ ḅẹ owu sọ gboloma ogbo sọ tẹ:
6Ọkụkụ na Isimẹlị ḅẹ atomi na;
Mohabụ na Aga ḅẹ apụ na;
7Gẹbalị na, Amọnị na, Amalẹkị na ḅẹ apụ ma,
pịkị Filisiteni na Taya na ḅẹ apụ ma na.
8Asiriya sọ ịna ḅụ sọ tẹ
tẹ Lọtị furo-ḅẹ-apụ ma na
kụrọ tẹ ọmụ gbin gboloma ogbo mịẹ tẹ.
9 #
Ḅẹr 7.1-23;
Ḅẹr 4.6-22
Ị́ kẹ Midiyanị ḅẹ apụ mịẹ ye kẹ ịn mị,
ị́ pịkị kẹ Sisera na Jabini na mịẹ ḅara mẹ Kisọnị Tọrụ akaka ḅụ.
10Ị́ ịn nẹngịmam Ẹndọ ḅụ,
tẹ ịna oju akpakpa ma kiri ọgọnọ sime tẹ ḅụrụm.
11 #
Ḅẹr 7.25;
Ḅẹr 8.12
Ị́ kẹ Orẹbụ na Zibu na mịẹ ḅara kẹ ịna sịḅịdapụ mịẹẹ;
ị́ kẹ Zeba na Zalimuna na mịẹ ḅara kẹ ịna ḅẹrẹtọn-apụ nẹngịma.
12Anie ḅẹẹ apụ ma, “Wa sime Tamụnọ
pịrị amakiri mẹ ọkị nyana ḅa.”
13Yei Tamụnọ, fọọn gala-galama ḅara kẹ ịn gala-galamaa,
gbala fẹrụ samụnọtẹ asịra kẹ fiin-soarị ye ọkụ.
14Gbala fịnị opu pịrị dọkịmarị ye ọkụ,
gbala fịnị-ḅẹlẹ tụndụ ọgọnọ ḅẹ
pịrị ḅụ sọ tẹ bebe tụndụ mẹ kọrịma ḅara,
15ị́ erise kẹ in dee ḅelema
tẹ ị́ kụrọ fẹrụ kẹ ịna tẹmẹ-naịn-naịnmaa.
16Yei KỊNỊNYANAḄỌ, ịna ḅụụ-jịrịmaa,
tẹ mịẹ tẹ ini ị́ kụrọ lekiri tẹ minini.
17Yee owu ịna ḅara si tẹ ịn tẹmẹ-naịn-naịn mu ḅẹẹ-sakị ḅẹẹ-sakị la;
yee ịn tọrụ-tuu ḅụ sime fịị.
18Yee in nimi mịnẹ ị́yẹrị kịngẹ anie KỊNỊNYANAḄỌ ḅẹẹ,
bebe tomikiri mẹ ḅụ ḅẹ tẹịn ḅẹrẹtọnḅọ.
(C) The Bible Society of Nigeria