Devidi-Anume 77
77
Opu Ḅụụ-fụka Sakị Ḅẹ Ḅiokpọmaye
1Àrị oloku pakama tẹ owu Tamụnọ pịrịarị;
arị oloku pakama tẹ ori ị̀ naarị.
2Ḅụụ-fụka sakị ḅụ à KỊNỊNYANAḄỌ ḅe tẹkẹarị;
bebe ḍin mamgba àrị ị̀ aḅara saakị-gelema tẹ tẹkẹarị,
kụma arị inetẹ ḅiokpọmaye ḍọkị-ẹrịa.
3À Tamụnọ kẹ ḅiokoromarị sakị,
àrị ẹsịmarị;
à Tamụnọ gboloma aị kẹ ì ḅioḅẹngbọ ḅụ pekele
ḍikiarị sakị, ì ḅioḅẹngbọ ḅịkịm.
4Ọ̀ mịẹ tẹ bebe ḍin mẹ ḅụ mono ị̀ tọrụ sọ-a;
à ḅụụ-ḅalaḅala la ḅara ḅụ ẹkwẹn sọ àrị inetẹ ẹkwẹn-a.
5À ḅọrọ tẹ ene ma kẹ kuroma ḅụ suuarị,
tẹ ala lamatẹ akụra ma ḅẹ aị sọ à kẹ ḅiokoromarị.
6Ḍin mẹ à kẹ pokolotẹ kuroma nyanarị;
à ye kẹ ì ḅioḅẹngbọ ḅụ pekele-ḍiki,
tẹ miemẹ kẹ ị̀ ḅụụ gbelarị:
7“KỊNỊNYANAḄỌ ḅe ọ̀ sakị mamgba wa sịkị ḅa aro?
Gbala-gbala ọ̀ ḅarị jen kẹ wa ḍiki-ḅioḅẹlẹ ḅịa aro?
8Wa ḅẹlẹma ḅụ ọ̀ daasịẹ tẹ?
Ò mininiye mẹ ḅarị jen kẹ sịẹ sime-a?
9Tamụnọ ori ọkụrụkụrụ nyana kẹ ḅioḅọrọma tẹ?
Ori ịganị ọ̀ kịnị ḍiki-sịḅịjịrị mẹ tọrụ-ḍima tẹ?”
10Anịtẹso à ḅẹẹm, “Ị̀ ịnọ tẹịn-arị ye anie mie:
mịnẹ Tamụnọ ḅarị jen kẹ kụrọ nyana-a.”
11KỊNỊNYANAḄỌ, àrị ị́ kọrị tẹ opu aị ma kẹ ḅiokoroma ḅa;
ḅọrọ tẹ sakị ḅụ ị́ mịẹ ḅụụ-buama-aị ma à sịn pịkị-ḅo ì ḅioḅẹngbọ suu ḅa.
12Àrị ị́ mịẹ tẹ aị mamgba kẹ kuroma ḅụ suu ḅa;
àrị ị́ kọrị tẹ opu kụrọtẹ aị mamgba pekele-ḍiki ḅa ì ḅioḅẹngbọ ḅụ.
13Yei Tamụnọ, ị̀ mịẹ ye mịẹ ye fịafịam.
Gbọrụ Tamụnọ sọ ḅe ḍụḅa ḅara ḍụḅa-a.
14Ị́yẹrị anie ḅụụ-buama akọrịnama kọrị-kọrị Tamụnọ ḅe;
í í opu kụrọ mẹ ḍie-pakamam sịẹ-sịẹ ma ogboku.
15Ị́ kụrọ ḅụ ị́ ị́ atomi ḅọrọmam,
Jekọbụ na Josẹfụ na furo-ḅẹ-apụ ma.
16Yei Tamụnọ, minji ma ị́ ẹrị sakị arị ḅalafa,
tẹ tọrụ mẹ ḅẹ owolo ma jikemam.
17Oḅuto ma ene ọsụma saram;
so-alagba ḍụrụkụm So-tọrụ ḅụ,
tẹ pakịrị-pakịrị mamgba ḅụ so ḅalapụma kọrị ḅọrọm.
18Í so-alagba mẹ ḍụrụkụ ye mẹ wasamam,
tẹ so-ḅalapụ ye mẹ pịkị bele kẹ tomikiri mẹ pịrịm;
tẹ kiri mẹ jịpụma sọ ḅẹ ḅara kẹ jikem.
19Ị́ ọnụngọ ma ọgọnọ mẹnjị-tolum;
í pokolo tọrụ mẹ saḅa korom,
kụma ị́ mẹnjị ḅọrọ tẹ ị́ aḅụọ tọn elekima sọ kịnị ẹrị-a.
20Ị́yẹrị anana-ḍikiḍikiḅọ ḅara kẹ ị́ atomi ma tọrọkọ-sụn,
Mozizi na Erọnị na ịn kẹ sịḅịda ḅara ḅụ.
(C) The Bible Society of Nigeria