Devidi-Anume 74
74
Sịẹ Ḍụa Ḅọrọma Gotẹ Kọn Tẹkẹ
1Yei Tamụnọ, tiye ẹrẹsị ị́ mị-ḅara kẹ wa kẹ gbin kuroma-so?
Ị́ ịganị sime ị́ pịrị apụ ma pịrị gbamaso ḅẹ mụnọọ?
2Ị́ atomi ma kẹ ḅiokoroma, iḅere-iḅerea
kụra-ḅio ị́ sẹlẹ ọkị apụ ma,
omoni ḅara-ḅio ị́ pakama-ḅo tẹ kẹ sime ị́ pịrị furo-ḅẹ-apụ sọma tẹ apụ ma.
Zayọnị Tụndụ kẹ ḅiokoroma-a, sakị ḅẹ gbọrụ
sakị ḅụ ị́ anga yọ mẹ.
3Mịna ye-kọnma-a ḅara kẹ kan gboloki sara wararị aị ma ọgọnọ mẹnjị saḅaa;
si kẹ wa tọn apụ ma ị́ Warị mẹ ḅio sime-ye, sime-ye guluguluma fama tẹ.
4Si kẹ ị́ tọn apụ ma ị́ Warị ḅio sime tẹ olokum owu-ḅara-iḅi ḅụ;
ini ịna arụ pike-ḅịtẹ kẹ anịanga pike tẹ owu-ḅara-iḅi elekima ḅara ḅụ.
5Ḍiki-tọrụ ḅụ ịn kịkaye opu asịn pẹlẹ apụ,
tẹ ịna akumbu kẹ sịn ma pẹlẹ, pẹlẹ-gbin-arị.
6Ḍụḅọ tẹ kẹ warị mẹ ḅirima aị mamgba
ini ịna akumbu na opu amana ma na kẹ fomu kan famam.
7Ịn nwẹnị ị́ Warị mẹ kan kọsịma tẹ fịnị kẹ anị dọkịmam;
tomi sunsin ị́ pịrị-pịrị anga mẹ ini anị pilemam.
8In ḅiim wa gbẹẹ kọsịma fama;
amakiri mẹ ḅụ fịafịa yọ tẹ ịn dọkịma-a anga ofori.
9Fịafịa aị elekima tẹ wa nyana aị mamgba so tẹ;
ịkịankoroapụ ḅụ kọn ḅọ ofori,
tẹ gbọrụḅọ-sọ nimi-a miemẹ sime mu la ḅẹ sakị.
10Yei Tamụnọ, si kẹ wa tọn apụ ma ị́ ḍẹrị nwenii mu tọ sakị la ḅẹ?
Ini ị́ ẹrẹ mẹ guluguluma gbamaso ḅẹ mụnọọ?
11Tiye ẹrẹsị ị́ ḅarasụa wa pịrị ḍụkụ-a?
Tiye ẹrẹsị ị́ ị́ aḅara kẹ ọḅụ pịrị tẹ simearị?
12Yei Tamụnọ, sukuyọ-saakị kụra-ḅio,
kọkọ wamịna amadaḅọ;
ị́ tọnwa asakị kẹ wa ḅọrọma tịya.
13 #
Pks 14.21
Amịna opu kụrọ mẹ kẹ tọrụ mẹ kẹ maa anga puu
tẹ minji ḅio ḅẹ opu anama asịḅị kan, kan kọsịma ḅọ kọkọ ị́yẹrị;
14 #
Job 41.1; Dev 104.26; Ayị 27.1 ị́yẹrị opu nama Lẹvịyatanị ḅe asịḅị kọsịmam,
tẹ nwẹnị ori oju mẹ kẹ ịkpa ḅio ḅẹ anama koko.
15Pịrị ọgọnọ ḅẹ okolo ma na ngụngụḅa ma na ḅụ minji pakamarị ḅọ;
opu atọrụ ma mịẹ tẹ arị kụlụkụlụ-kpaịkpaị ḅọ ị́yẹrị.
16Ị́yẹrị ḍin na eneḅaka na tọnm,
ị́yẹrị ịrụa mẹ na akalụ mẹ na kẹ arị sime anga wẹrị;
17ị́yẹrị kpongbo-kiri mẹ daasịẹ ḅẹ anga tọnm,
ị́yẹrị ịrụa-kụra na fẹngụ na mịẹm.
18Kụma kẹ ḅiokoroma, Yei KỊNỊNYANAḄỌ,
mịnẹ si kẹ ị́ tọn apụ ma ị́ ḍẹrịarị,
mịnẹ ịn Tamụnọ nimi-a, ịn pịkị í ḍiki-simarị.
19Ị́ atomi tẹ ḅarasụa ḅiiarị apụ ma kẹ
gbin kuroma si kẹ ịn tọn-arị tẹ kụrọ-kụrọ
ḅara kẹ ini na mịẹarị apụ ma pịrị ma,
ị́ atomi tẹ kịnị ịn ḅaa ḅẹ ḍọkịarị apụ ma kẹ ḅioḅọrọma ma!
20Ị́ wamịnị na fị tẹ ọḅọkụ mẹ kẹ ḅiokoroma-a.
Amakiri mẹ ḅụ kpiti wararị ịkọlị goyegoye ḅụ gbiri-gbiri-gbiri emi.
21Ḍụkụ tẹ kịnị ponomarị apụ ma ḅụụ-jịrị ḅụ sọma;
yee ini igoin tẹ mịẹ ḅẹ ọkụ ofori apụ ma í tokini.
22Tamụnọ, ị́ ḅụụ jike saakị tẹ ị́ ḅụụ ḍụa!
Kẹ ḅiokoroma mịnẹ Tamụnọ nimi-a apụ ị́ ḍẹrịarị bebe ene mẹ ḅụ.
23Si kẹ ị́ tọn apụ ịganị, ịganị tẹ olokuarị aị ma kẹ ḅioḅọrọma ma;
owu kẹ ị́ na sọarị apụ ma ḍụkụ tẹ ḅeri ḅarịye naa-a gbamasoarị ye mẹ.
(C) The Bible Society of Nigeria