Devidi-Anume 72
72
Kọn Amadaḅọ Ḅe Pịrị Tẹkẹ
1Yei Tamụnọ, ị́ karakara mịẹ mẹ kẹ amadaḅọ ḅe toluma tẹ ọ̀ kẹ ḅẹrẹkọn;
yee ori ị́ na sọ tẹ aḍụa ofori ḅẹrẹkọn,
2mịẹ tẹ ori aḍụa ofori ḅara kẹ ḅẹrẹtọn ị́ atomi ma pịrị ḅarị ḅara,
pịkị karakara mịẹ ḅụ ja apụ ponomarị apụ ma ḍikiḍiki.
3Yee amakiri mẹ lolo ḅụ ḍereku,
yee inweni-mgba nimi mịnẹ anị ḅio karakara mịẹ emi.
4Yee amadaḅọ ḅe iḅi ḅẹrẹ kọn igoin-apụ ma pịrị;
yee ọ̀ ḅarasụa mịẹ ḅẹ ọkụ ofori apụ ma pịrị
tẹ mịẹ tẹ owu in ponomarị apụ ma ḅara si.
5Yee ị́ atomi ma sunsin ị́ pịrị ịrụa mẹ ḅịyarị sakị goyegoye,
akalụ mẹ ḅịya tẹ bele pịrịarị sakị goyegoye,
mu tọrọkọ-jụ ḅụọ, ḅụọ mamgba la.
6Yee amadaḅọ ḅe ye-ḍiḅi wararị ḍụọ mẹ ọgọnọ koroarị eene kịka,
yee ọ̀ kiri ọgọnọ sararị nwẹịn-nwẹịn eene kịka.
7Yee ori ama-daarị sakị mẹ ḅụ karakara mịẹ ama mẹ ḅio kama,
tẹ lọkọlọkọ pịkị sime akalụ mẹ
ḅịya mu la sakị, la sakị la.
8 #
Zẹk 9.10
Ori ama-daarị anga mẹ gbọrụ abajị ḅụ mu jen abajị la ḅa,
Yuferetisi tọrụ ḅụ ọkị mu kiri kunoma anga ma la ḅa,
9Ịkpa ḅio ḅẹ apụ ma ọ̀ tọrọkọ iḅo ḅa;
si kẹ ọ̀ tọn-arị apụ amịna aḅụụ sẹma-kiri-gbin ḅa.
10Sipeni na sọ, sọ ma na ḅụ ama-daarị apụ ma ḍiepịrị-aị kẹ ọ̀ pịrị ḅa;
Arebịya na Ẹtịyopịya na ḅẹ amadapụ ma agbamịẹ-aị kẹ ḅo ọ̀ pịrị ḅa.
11Amadapụ mamgba ọ̀ tọrọkọ iḅo ḅa;
sịẹ-sịẹ mamgba fịrịmẹnjị ọ̀ pịrị ḅa.
12Ori ọ̀ sịn-arị igoin-apụ ma pụkọ-pakamaḅoarị,
pịkị mịẹ, ḅẹ, ọkụ ofori tẹ gbọrụḅọ-sọ bala-a apụ ma sọ.
13Ịnyọ ḅụụ ḅụ fa tẹ pịkị igoin wararị apụ ma ori ọkụrụkụrụ nyana ịn pịrịarị;
ọ̀ mịẹ ḅẹ ọkụ ofori apụ ma aḍumo ḅọrọmarị.
14Ponoma na gbiri-gbiri-gbiri na ḅio ori ịn pụkọ-pakamaḅoarị;
ịna aḍumo kpọma ọ̀ ḅụụ yela wararị.
15Nangwọ ḍumo sime amadaḅọ ḅe pịrịị!
Yee kịnị Arebịya ḅụ ḅo golu kẹ ọ̀ pịrị;
yee tomi tẹkẹ ọ̀ pịrị sakị mamgba;
yee Tamụnọ aboma ori ọgọnọ sime sakị mamgba!
16Yee amakiri mẹ kpọma tọnwa mbịaka pakama;
yee ḍiḅi pakama-ḅo tẹ soku-ḅẹ afịaị ma tụndụ ma gbaịn,
Lẹbanọnị ḅẹ aị kpọma sụa sara ḅara pembe ḅara.
Yee opu ama ma ḅio tomi ḅin,
ye-ḍiḅi akiri ḅụ osuka paka ḅin ḅara kịka ḅara.
17Yee gbala-gbala kịnị amadaḅọ ḅe ẹrẹ kẹ ḅioḅọrọma ma;
yee ori ereso mu ịrụa ḅịya mu la ene, la ene la.
Yee sịẹ-sịẹ mamgba ò tokini, yee ịn Tamụnọ ḅẹ ori in boma
tẹ yee in ḅii, mịnẹ amadaḅọ ḅe ḅioḅẹlẹ.
18Ọ̀ KỊNỊNYANAḄỌ ḅe tokini, Izirẹlịapụ tẹkẹarị Tamụnọ ḅe!
Ori ngẹrị mie mịna ḅụụ-buama-aị ma mịẹarị.
19Ọmịnị ori ebube ẹrẹ mẹ tokini mu ḅẹẹ-sakị ḅẹẹ-sakị la!
Yee ori ebube bebe tomikiri mẹ ḅin.
Amẹnị! Amẹnị!
20Mie Devidi, Jese tụḅọ ḅe atẹkẹ ma kunoma anga.
(C) The Bible Society of Nigeria