Devidi-Anume 69
69
Ḅarasụa Gotẹ Kọn Owu
1Yei Tamụnọ, ị̀ ḅọrọmaa!
Minji mẹ seri ḅo ị̀ kọngọ la tẹẹ;
2Ḅụọ sọ mu kụrọ kiri sịẹ-sịẹ-a opou ḅio à sọ faarị,
tẹ kụrọ kiri gbala-gbala ofori;
owolo ḅio àrị emi,
tẹ ọnụngọ ì sombi ḅaa ḅẹ-yearị.
3À ḅarasụa sịn nwenii ịnyọ ị̀ ḅụụ fa tẹẹ,
tẹ ị̀ pọkọ ḅẹ ololo sọ fụkarị,
à tọrụ saakị tẹ kẹ ị́ ḅarasụa ḅoarị ḅoto ḍiki nwenii
ị̀ atọrụngbọ fụka tẹ.
4 #
Dev 35.19; Jọn 15.25 À mịẹ ye ofori tẹ ì ḍiki-ḅioḅuarị apụ ma kịẹn-ḅịḅị
ị̀ sịḅị-ḅẹ-inume kịẹn-ḅịḅị nẹngịm.
Si kẹ ị̀ tọn-arị apụ ma iruo aị ḍuko ị̀ ọgọnọ gbanarị;
ịn kụrọ wararị tẹ ị̀ ḅaa ḅẹ-ḅiiarị.
Ini ì ponoma tẹ arị yẹrị furu-a aị pakama-ḅo ịn pịrịm.
5Yei Tamụnọ, ị̀ asi ma ị́ ḅụ kikima-a,
àrị oḅori-sọ la tẹ ḅara í nimi wararị.
6Ḍụkụ tẹ à ḅụụ-jịrị dogi-ḅo ị́ kẹ
ḅiokpọmarị apụ ma pịrị ma,
kụrọmamgba nyana Opu ama-da KỊNỊNYANAḄỌ!
Ḍụkụ tẹ à sunsin ị́ pịrịarị apụ ma tọrụ tuuma,
Yei Izirẹlị ḅẹ Tamụnọ!
7Ị́ sịḅị ẹrẹsị tomi ị̀ mịẹ-sima tẹ,
tẹ ḅụụ-jịrị ị̀ gbaịn tẹ.
8Ị̀ amịnapụ ma ḅụ à kịnị tọrụ nimi-a ḅọ kịka tẹ,
ị̀ warị-kuḅu ḅẹ apụ ḅụ à jen sịẹ ḅẹ ḅọ kịka tẹ.
9 #
Jọn 2.17;
Rom 15.3
À kẹ ị́ Warị mẹ ọkị ḅara mẹ ị̀ ḅụụ ḅio
sime tẹ fịnị kọrị ḅara kọrịarị;
ịn kẹ ị́ mịẹ simarị aị ma ị̀ ọgọnọ sararị.
10Àrị ị̀ ḅụụ-iderimarị ḅuru-ịmọ ḅụ,
tẹ tomi nwẹnị anị kẹ ì woriarị.
11Àrị ono ḅiri tẹ
tomi ị̀ ḍẹrịarị.
12Etela ogbo ma ḅụ tomi ị̀ kẹ ẹkwẹn-arị,
tẹ iru ḅuu apụ nwẹnị ị̀ kẹ nume-suarị.
13KỊNỊNYANAḄỌ, yẹrị kịngẹ kụma, àrị ị́ tẹkẹ ḅa,
Tamụnọ, ị̀ pakịrịị, ị́ ḅụụ-ḅẹlẹ sakị ḅụ.
Ị́ opu ḅẹlẹma mẹ ẹrẹsị ị̀ pakịrịị,
ị́ kịnị ḅọrọma ḅẹ tẹ minini ye mẹ ị́ mịẹarị ẹrẹsị.
14Opou ḅio sọ mu fa mẹ ḅụ ị̀ ḅọrọma-a;
ḍụkụ tẹ si kẹ ị̀ tọn-arị apụ ma ḅara kẹ ị̀ lama ma;
ḍụkụ tẹ àrị owolo ḅio fa ma.
15Ḍụkụ tẹ ẹgẹnẹ-minji sọ ḅo ị̀ gbaịn ma;
ḍụkụ tẹ à pokolo anga ma ḅio sombi fịị ma
anịanịa mu ḍuḅu ḅio sọ.
16KỊNỊNYANAḄỌ, í kuno-a ḅẹlẹma mẹ ḅẹ iḅi mẹ ḅụ, ị̀ pakịrịị;
í opu ọkụrụkụrụ mẹ ḅụ, iḅi tọrụ kẹ ì ḍikii!
17Ị́ ḅụụ kikima ị́ fịrịmẹnjịḅọ ḅe pịrị ma;
opu ḅụụ-fụka ḅio àrị emii — mịọkụ ị̀ pakịrị!
18Ḅo ị̀ la tẹ ị̀ ḅọrọma-a;
si kẹ ị̀ tọn-arị apụ ma ḅara-ḅio ị̀ pụkọ-pakamaḅo.
19Tomi kẹ ị̀ mịẹ-sima la ḅara í nimi wararị,
ịn kẹ ị̀ tọrụ-tuu tẹ ị̀ kẹ kụn nyana-a kiri ḅụ kuroma la ḅara sọ;
si kẹ ị̀ tọn-arị apụ mamgba ị́ ini ẹrịarị.
20Gọlị-aị ì ḅioḅẹngbọ kan saratẹ tẹ,
à ḅarị tẹmẹ nyana-a.
À ḍiki sịḅị-kụrụkụrụ kẹ ḅiokpọmam,
kụma gberie-sọ àrị ẹrị-a;
à ḅiokpọma ẹkwẹn naa ḅẹ ḅiim,
kụma àrị ọkọ sime ye naa-a.
21 #
Mat 27.48; Mak 15.36; Luk 23.26; Jọn 19.28,29 Ḅuru ị̀ tarị sakị, kịnị-ḅaaḅa ye mie ịn kẹ ị̀ pịrịye;
minji ḅuu ị̀ pọkọ tarị sakị,
ịn tụgbakịtẹ iru kẹ ị̀ pịrịm.
22 #
Rom 11.9,10 Yee alalị sakị ịn fịarị afịaị ma si kẹ ịn mịẹ ḅẹ aị sọ;
yee ịn fịarị fịafịa alalị nwẹn ḅẹẹ aị ma ịn sukuruma-gbin ḅe aị sọ.
23Ịna atọrụngbọ pụnma!
Mịẹtẹ ịna oḅukulo ḅẹ mgbe ma kpọkọrọ-kpọkọrọ.
24Ị́ ịganị ọsụma ịna ọgọnọ sara;
ḍụkụ tẹ ịn mangị í opu ịganị mẹ ḅọrọma.
25 #
Fịr 1.20
Yee ịna akpụrụ-awarị in kobiri tẹ simearị anga mẹ ḅụ kịnị mamgba mangị-so;
yee gbọrụḅọ-sọ ḍumo sime ma ịna akpụrụ-awarị ma ḅio.
26Ị́yẹrị fomu-ḅara kẹ pịrị tẹ so tẹ apụ mie ịn ḅaa-ḅọkọ kẹ ḍọkịarị;
ye kẹ lamatẹ so tẹ apụ ma mie ini ịna ḅụụ-fụka kẹ ẹkwẹn pịrịarị.
27Ịna asi mamgba kẹ elekima sụa;
ḍụkụ tẹ ị́ ḅọrọma ḅụ ịn ḍiekiri nyana ma.
28 #
Pks 32.32; Mịẹ 3.5; 13.8; 17.8 Yee ḍumo wararị apụ ẹrẹ ma simearị ḍiri mẹ ḅio ịna ẹrẹ ma kụrọrọ so;
yee ini ị́ atomi ma kịẹn-ḅịḅị ḅụ sọma.
29Kụma fụka-ye ị̀ ḅaarị, tẹ à ḅarị tẹmẹ nyana-a;
Yei Tamụnọ, ị̀ saakị sịẹma, tẹ ị̀ ḅọrọma-a!
30À nume-su Tamụnọ tokini ḅa;
àrị ori opu mẹ ḍuko wasama ḅa,
ịmịẹtẹ kẹ ọ̀ ḅẹ ḅụ.
31Miemẹ KỊNỊNYANAḄỌ ḅe ḅụụ-ḅẹlẹ asambịrịma anambulo kẹ mịẹ agba nẹngị ḅa,
pịkị ḍụḅa famatẹ nambulo kẹ mịẹ agba sọ nẹngị ḅa.
32Tomi ponomarị apụ ma mie mẹ
ẹrị sakị in ḅioḅẹlẹ ḅa;
sunsin Tamụnọ pịrịarị apụ ma nwẹnị ḅiokpọ nyana ḅa.
33KỊNỊNYANAḄỌ ḅe mịẹ ḅẹ ọkụ ofori apụ ma ḍukoarị aị pokiarị,
ọ̀ pịkị ikoli-warị ḅio simearị apụ ma kẹ ḅioḅọrọma-a.
34Yei So na Kiri na, ọ́ Tamụnọ tokinii,
yee abajị ma na arị aḅio Tamụnọ tẹmẹ
kuroma wararị aị mamgba na sọ ò tokini.
35Ò Jeruselemu ḅọrọma
tẹ siin Juda ḅẹ ama ma nama ḅa.
Ori atomi ma anịanga anga tẹ anị kẹ ịna amakiri sọma ḅa;
36ori afịrịmẹnjịapụ ma furo-ḅẹ-apụ ma anị nyana ọkị ḅa ḍuu ḅara ḅụ,
tẹ ọ̀ ḅẹlẹmarịapụ ma anịanga anga ḅa.
(C) The Bible Society of Nigeria