Devidi-Anume 65
65
Tokini Na Ịmịẹtẹ Ḅẹ Na
1Yei Tamụnọ, anị kuram wa Zayọnị ḅụ
sime tẹ í tokini
tẹ wa minini ị́ pịrị-aị ma mị,
2ị́ tẹkẹ pakịrịarị ẹrẹsị.
Anga, anga ḅụ kịnị sime tẹ ị́ ḍọkụma-ḅo ḅa,
3ịna asi gotẹ.
Wamịna amịẹ-kọn ma wa nẹngịmarị,
kụma arị wẹrịso wa pịrịarị.
4Ị́yẹrị sẹlẹ ọkịarị apụ ma
ḅioḅẹlẹ sime ịn pịrịm
anie ị́ kẹ ḅo tẹ ị́ fịafịa yọ mẹ
ḅụ angarị apụ ma.
Ị́ warị ḅio simearị iḅi aị ma
wamịnị na-iḅi ḅa,
ị́ Fịafịa Warị mẹ ḅẹ aboma ma.
5Ị́ owu-ḅara-iḅi kẹ wa pịrị ḅụ ḅọrọ tẹ wa pakịrịarị,
tẹ ị́ ḅụụ-buama-aị mịẹ-mịẹ tẹ kẹ wa ḅọrọmarị.
Tomikiri ḅẹ apụ mamgba,
pịkị iḅere-iḅerea anga tẹ abajị saḅa ḅụ simearị apụ sọ, ị́ kẹ ḅiokpọmarị
6Ị́ ịnyọ ḅụ ị́ ḅọrọ tẹ tụndụ ma kẹ
ọrụtọn wẹrịm,
kẹ í opu kụrọ mẹ ḍie-pakamarị.
7Abajị ma ḍarịarị sakị
arị deinmarị,
pịkị ọnụngọ ma ḅẹ fie mẹ sọ;
Tomi ma ḍụrụkụarị ye mẹ sọ í deinmarị.
8Bebe tomikiri mẹ ị́ kọrị tẹ opu akọrịnama
ma ḅụ ḅụụ-gbiripu ḅụ sịẹsime wararị.
Ị́ kọrị tẹ aị ma nwẹnị ḍereku
oloku dogi-ḅoarị, tomikiri mẹ ḅẹ gbọrụ ịkọlị ḅụ mu osi jụ la.
9Í eene kẹ fịrịma tẹ ḍie pakamarị
mịnẹ kiri mẹ ḍikiḍikiarị;
ị́ mịẹ tẹ anị iḅiọkụ fịaị pakamarị.
Piri ọgọnọ ḅẹ atọrụ ma ḅụ
í minji sụa ḅinma tẹ;
tẹ ị́ mịẹ tẹ kiri mẹ fịaị pakamarị.
Mie ị́ wẹrị anị kọrịarị ḅara:
10Ye ḍiḅi ḅẹ tẹ soku tẹ aḍụọ ma ḅụ
í gburo-gburoma eene ọsụma sararị,
tẹ minji kẹ arị pisima tẹlẹmarị;
í igirigi kẹ kiri mẹ lọkọmarị,
tẹ mịẹ tẹ ịwọma ḍiḅi asịn ma so-pakarị.
11Í iḅi mẹ mịẹ tẹ fịye soku sakị mẹ ḅụ ye
lolo ḅara kẹ paka-ḅoarị ḅara ḍiki!
Í mu anga, mu anga fịaị ḅakam.
12Nama osuka fị-fị anga ma ḅụ nama ogbo-ogbo ḅin wararị;
tụndụ ma akaka mamgba ḅụ ḍereku ḅin wararị.
13Ḍụọ ma ḅio mamgba anana-anana-anana;
Tụndụ ogboku ma ḅẹ lẹsẹrẹ-akiri ma ḅụ mbịaka sụa sara wararị.
Ye goyegoye oloku-oloku nume su-su tẹ ḍerekuarị.
(C) The Bible Society of Nigeria