Devidi-Anume 63
63
Tamụnọ Gotẹ Ḅio-sẹsẹ
1Yei Tamụnọ, anie ị̀ Tamụnọ,
tẹ àrị í gotẹ ḅio-sẹsẹarị.
Ì bebe ḅụụ mamgba ị́ nyana ḅẹ-ḅiiarị,
samụnọ-kpakịkị tẹ minji kala ye sọ
ḅarị ofori kiri ọkụ,
ị́ ị̀ tẹmẹ tarịarị, minji pọkọ-tarị ḅara.
2Mịẹtẹ àrị ị́ ẹrị fịafịa yọ mẹ ḅẹ;
mịẹ tẹ àrị í opu kụrọ na ebube na
nyana la ḅara ẹrị.
3Í kuno-a ḅẹlẹma mẹ iḅi ḍumo
ḅioju sọ nẹngịm,
anịẹrẹsị àrị í tokini ḅa.
4À ḍumo mu la ḅarị ene mamgba ḅụ
àrị ịmịẹtẹ kẹ ị́ ḅẹ ḅa;
àrị ị̀ aḅara saakị-gelema ị́ da tẹ tẹkẹ ḅa.
5Ị̀ tẹmẹ alalị fị tẹ ḅụụ na-iḅi ḅa,
tẹ à ḅioḅẹlẹ anume su-su í tokini ḅa.
6Àrị iḅila ọgọnọ ḅọlọlọ wararị sakị
àrị ị́ kẹ ḅiokoromarị;
bebe ḍin mamgba í ì kuroma ḅụ emi,
7sakị mamgba ị́ ḅarasụa ị̀ pịrịarị ẹrẹsị.
Ị́ pamba suku-ḅio mie à sime tẹ ḍereku nume-suarị.
8Àrị í fịnama sịẹma wararị,
anịsakị ị́ ḅara nwẹnị ì koko kpaịnmarị.
9Ị̀ ḅaa ḅẹ ḅọkọ ḍọkịarị apụ ma
ini ideri Ḍuḅu ḅio mu ḅa.
10Ọmụ ḅio mie ini ịn ḅaa ḅarịye,
tẹ tuu anama ma ịna oju
akpakpa ma kanị pẹị ḅa.
11Amadaḅọ ḅe ḍereku ḅa, Tamụnọ owu-ḅara-iḅi kẹ ọ̀ pịrịarị ẹrẹsị.
Tamụnọ ẹrẹ ḅụ ye mininiarị apụ ma ini ò tokini ḅa,
kụma iruo apụ ma aḅịḅị gbaịn ḅa.
(C) The Bible Society of Nigeria