Devidi-Anume 35
35
Ḅarasụa Gotẹ Kọn-arị Tẹkẹ
1KỊNỊNYANAḄỌ, ị̀ na tụḅụrụarị
apụ ma na tụḅụrụụ:
owu kẹ ị̀ pakarị apụ ma na sọ!
2Í ekpeke na owuna-aị na ọkị:
tẹ ḅo ị̀ pụkọ-pakamaḅoo ịna aḅara-ḅio.
3Ị́ ḅẹkẹrẹ na í kumbu na saakị
gelema ì ḍukarị apụ ma da:
Ị̀ ḅẹ ị́ ị̀ ḅọrọma ḅa.
4Yee ị̀ ḅaa ḅẹ ḍọkịarị apụ ma
owu kiri ḅịkị tẹ ḅụụ-jịrị!
Yee ḅẹrẹ-ḅiya ị̀ pịrịarị apụ ma pịkị
ọḅụ da tẹ pikiri-pikiri!
5Yee ịn fẹrụ kẹ fiin soarị samụnọtẹ asịra kịka:
anie KỊNỊNYANAḄỌ ḅe enjẹlị in ḍukarị sakị!
6Yee ịna etela kpiti, pịkị sịnịnị:
KỊNỊNYANAḄỌ ḅe enjẹlị in fomu gbin-arị sakị!
7Gotẹ ọkọ mịẹ-mịẹ ḅọkọ ofori ḅara ḅụ
ini ḍiein tuu ị̀ pịrịm:
ịn pịkị pokolo tẹ olulu soku ị̀ pịrịm
à ḅịkị sọ ḅẹ ḅara.
8Kụma amụ in nimi-a ogbo fịị-faa ḅo
in kuun-sịẹma ḅa:
ini tuu ḍiein mẹ ini ọlọ tẹ ịn ḅịkị
tẹ fịị gulugulu ḅa!
9Anịtẹso KỊNỊNYANAḄỌ ḅe mịẹ tẹ ì ḅioḅẹlẹ ḅa;
à ḅioḅẹlẹ ḅa ori ḅe
ị̀ ḅọrọma tẹ ye mẹ gotẹ.
10Àrị ì ḅioḅẹngbọ mamgba kẹ KỊNỊNYANAḄỌ ḅe ḅẹ ḅa,
“Ị́ kịkaḅọ ofori.
Ị́yẹrị anie kụrọ ḅọ ḅe ḅụ ịnyọ
nyana-a ḅọ ḅe gbaịn-arị,
pịkị igoin ḅọ ḅe gbaịn-arị
ò ponomarị ḅọ ḅe ḅụ.”
11Si atomi ḅẹrẹ ḍuko ị̀ sịḅị sịn-arị:
à ḅụụ ḅụ gberie-sọ nimi-a ye
mie in ḍuko ị̀ ọgọnọ gbanarị.
12In si kẹ ị̀ gbarị à mịẹ iḅi ḅụ,
ì ḅioḅẹngbọ gbọrsịḅị kan sara tẹ à
koro-simearị.
13Kụma ini obi sakị arị ono ịnwaịnm;
fịye sọ à kẹ ḅịḅị lama-a:
àrị ị̀ sịḅị-tuu iderima tẹ tẹkẹm,
14à tẹkẹ ì ikiaḅọ anịanịa ị̀ mịnaḅọ
pịrịarị ye ọkụ.
À tọrụ-tuu tẹ ḍụẹịn ḍuu ḅara kẹ mẹnjịm,
amịna iyingiḅọ ḍuuarị ḅọ ọkụ.
15Kụma ḅụụ-fụka ị̀ la sakị, in ḅioḅẹlẹ tẹ
kobiri ḅo ì gbori tẹ ì kombom:
jen ama ḅẹ apụ ma ì fomum,
dasịẹma-a ḅara mie ịn kẹ ì fomu ye.
16Ḅụọ ma fịtẹ gbin koro sime wararị ḅọ
kombo ḅara mie ịn kẹ ì kombo ye,
ịn nwẹnị ḍiki-ḅioḅu ḅara kẹ bio-bioma ì ḍiki.
17KỊNỊNYANAḄỌ, ị́ tọrụ, tọrụ kẹ mie
mẹ ḍiki mu tọ-sakị la ḅẹ?
Ini owu kẹ ị̀ paka, paka, pakarị;
mịna ọkụkụ ma ḅara-ḅio ị̀ pụkọ-pakamaḅo!
18Anịtẹso àrị ịmịẹtẹ kẹ ị́ ḅẹ ḅa,
ị́ atomi ma kobiri wararị anga ḅụ:
àrị í tokini ḅa inimgba tọrọkọ ḅụ.
19 #
Dev 69.4; Jọn 15.25 Ḍụkụ tẹ si kẹ ị̀ tọn apụ ma, àrị iruo
apụ ma, owu-kiri à ḅịkị ye kẹ
ì ḍikiḍiki ḅioḅẹlẹ ma.
Ḍụkụ tẹ à mịẹ ye ofori ḅara kẹ ì ḍiki-ḅioḅuarị apụ ma
ì kururu gotẹ ị̀ ḍẹrị-ḍẹrịtẹ tọrụ-ḅẹlẹ ma.
20Ini ikiapụ ḅara kẹ ẹkwẹn-a:
anie nakara iruo aị mie in kuroma ḅo
tẹ kẹ dein ḅẹlẹmarịapụ ma ḅụ ḍukoarị.
21Ini oloku-oloku tẹ ị̀ ḅẹẹarị:
“Ị́ mịẹ ye wa ẹrịm.”
22Kụma, Yei KỊNỊNYANAḄỌ,
í miemẹ ẹrị tẹẹ.
Ọkọẹrẹsị gbọsime ma;
ị́ ḅụụ ḅelema tẹ sime ma!
23Ị́ ḅụụ jike saakị, Yei KỊNỊNYANAḄỌ, tẹ ị̀ ḍụa:
ị̀ Tamụnọ, saakị sịẹ tẹ ị̀ ḅịḅị pakịrị.
24Yei KỊNỊNYANAḄỌ, karakara mịẹ ḅọ,
à mịẹ ye ofori mẹ ḍuko pakama;
ḍụkụ tẹ si kẹ ị̀ tọn apụ ma
ì ḍikiḍiki tẹ ḅioḅẹlẹ ma.
25Ḍụkụ tẹ ini ịna aḅụụ ḅẹẹ ma,
“Wa ọ̀ fama tẹẹ!
Miemẹ kịngẹ mie wa ḅii ye.”
26Yee ị̀ tọrụsiẹrị mẹ ḍikiḍiki
tẹ ḅioḅẹlẹarị apụ ma gbọrsịḅị owu-ḅara-sii
fama tẹ pikiri-pikiri mẹnjị kọn:
yee ọkịarị ini iḅi ị̀ nẹngịm nwẹn ḅẹẹ apụ ma,
gbọrsịḅị ḅụụ-jịrị fama.
27Yee ẹrị ḅẹ-ḅiiarị mịnẹ Tamụnọ kẹ
ị̀ ọgọnọ gbana ye ofori nwẹn ḅẹẹ
apụ ma, ḍereku oloku-oloku tẹ ḅẹẹ,
“KỊNỊNYANAḄỌ ḅe opu la ḅara ḍikii!
Ye ọ̀ fịrịmẹnjịḅọ ḅe na iḅi ḅara mẹ
ọ̀ ḅụụ-ḅẹlẹarị.”
28Anịtẹso àrị ị́ karakara mịẹ mẹ
ḍuko wasama ḅa:
bebe ene mamgba à kẹ í tokini ḅa.
(C) The Bible Society of Nigeria