Devidi-Anume 26
26
Iḅi Tomḅọ Kọn-arị Tẹkẹ
1Yei KỊNỊNYANAḄỌ, à mie si ofori mẹ mịẹ tẹ kịnị nimi,
à kụra ye mịẹarị ẹrẹsị,
tẹ à pịkị ị́ kẹ ḅiokpọma fama wararị.
2KỊNỊNYANAḄỌ, ì pekele-ḍikii, pịkị ị̀ tọn ḍikii,
ị̀ tẹmẹ ịgbanịarị aị na ị̀ akuroma na kọn.
3Í kuno-a ḅẹlẹma ị̀ datụkụmarị,
ḅioḅẹngbọ kẹ ị́ ḅụụ ḅụ gbana na-iḅim mẹ nwẹnị sakị mamgba ị̀ tọrọkọ-sụn-arị.
4À papaa atomi na mẹnjị-a,
à mịẹ kịnị ḍie atomi na mịẹ ye nyana-a.
5À si-atomi ma ogbo mẹ ḍiki-ḅioḅuarị,
tẹ si-sịḅịḅio-sụapụ ma kọkọrọarị.
6KỊNỊNYANAḄỌ, ma ị̀ maa ḅara, à mịẹ ye ofori;
tẹ sunsin ị́ pịrị ḅụ mẹnjị-mẹnjị ị́ agba mịẹ anga mẹ ikelemarị.
7Àrị ịmịẹtẹ ḅẹ nume-suarị
tẹ ị́ ḅụụ-buama amịẹaị mamgba ḍuko pakamarị.
8Yei KỊNỊNYANAḄỌ, àrị ị́ angarị warị mẹ ḅẹlẹmarị,
í ebube simearị yọ mẹ.
9Ị̀ kẹ si-mịẹapụ ma na sụa ḅaa guluguluma ma;
ḅo kịnị ḅaa apụ ma la ḅẹ si-so mẹ ḅụ ị̀ wẹrị ḅelemaa;
10si mịẹarị atomi ma
sakị mamgba ịn tẹlẹma sime wararị ini ọḅụ-fị.
11Yẹrị kịngẹ kụma, kuraye mie à mịẹarị;
ì ḍiki tọrụ-kụrụkụrụ tẹ ị̀ ḅọrọma!
12Ye kẹ ị̀ lama ḅẹ gberie-sọ ḅarị ofori;
KỊNỊNYANAḄỌ ḅe atomi ma kobiri wararị anga mẹ ḅụ àrị ò tokini ḅa.
(C) The Bible Society of Nigeria