Makị 3
3
Jizọsị Gbọrụ Ḅara Fịtẹ Tomḅọ Gwọm
(Mat 12.9-14; Luk 6.6-11)
1Anịtẹso Jizọsị pịkịma ama-warị mẹ mu tẹ anịanga ḅara kpọlịtẹ gbọrụ owiḅọ ẹrịm. 2Anịanga sime apụ ma ḅẹ ja apụ mịẹkọn kẹ Jizọsị sịḅị sẹịn ḅẹ tẹ simem; mie ḅụ ini ori ẹbị lamam Ịnyọsara-Ene mẹ ḅụ ò tomḅọ ḅe gwọ ḅarị ḅoto. 3Jizọsị nwẹnị tomḅọ ḅe ḅẹẹ, “Iwo mịanga tọrọkọ ḅoo.” 4Anịtẹso ò tomi ma gbelam, “Ịnyọsara-Ene mẹ ḅụ wamịna Oloko minini wa pịrị tẹ wa mịẹ ḅẹ ye tiye? Ḅarasụa mụnọọ, ye kẹ kịnị lama? Tomḅọ ḍumo ḅọrọma mụnọọ, anị guluguluma?”
Kụma gberie-sọ in ḍuko-a. 5Jizọsị in ḍiki ikelema tẹso, ọ̀ nwẹnị ịganị, kụma anị gbọrụ sakị mẹ ḅụ ọ̀ pịkị in ḍiki sịḅị-jịrịm, ịn kpọma kọngọ-kụrọma tẹ pịkị kuraye mịẹ-a ẹrẹsị. Anịtẹso ò tomḅọ ḅẹ ḅẹẹm, “Ị́ ḅara sụn-pakamaa.” Ori anị sụn-pakama tẹ anị gwọ tẹ tarị anị sime-ḅara simem. 6Mie ḅụ Farịsiiapụ ma ama-warị mẹ koroma sọ-mu Ẹrọdị ogbo ḅẹ apụ na in Jizọsị ḅaa ḅẹ ḅẹrẹ-ḅiyam.
Jizọsị Tamụnọ Ẹkwẹn Kọn Inweni-ogbo Pịrịm Galili Tọrụ Akaka Ḅụ
7Jizọsị na, ò ḍukamẹnjịapụ na so Galili Tọrụ akaka mẹ mu tẹ, gbọrụ opu inweni-ogbo ò ḍuka-mum. In sime tẹ ḅo anga Galili na, Judiya na, 8Jeruselemu na, pịkị Idumiya iri ḅụ na, Jodanị tọrụ akaka ḅụ ịrụa-saakịarị-anga anga mẹ ḅẹ iri ḅụ na, Taya na Sayịdọnị na opu ama ma ikelema iri mẹ ḅụ na. Mịna apụ mamgba gotẹ Jizọsị dama-mu ye ini ọ̀ kọrị tẹ aị gbolomaye naa wẹrị tẹ ẹrẹsị. 9#Mak 4.1; Luk 5.1-3Tomina-ogbo mẹ ḍụḅa la ḅara ḅụ Jizọsị ḍuko ò ḍukamẹnjịapụ ma pịrịm mịnẹ ini arụ tẹlẹma ọ̀ wẹrịmaa, mịẹtẹ ọ̀ ḅụkụlọ tẹ tomi ma ḅarị ḅo ò ponoma ḅịa ḅara. 10Ọ̀ tọnwa-apụ gwọ tẹ anị ḅụ, obi apụ mamgba puu, puu sọ mum, ḅara kẹ ọ̀ lama ḅẹ ḅara. 11Tẹ si-atẹmẹ ḅụụ ḅio sime apụ ori ẹrị sakị, sakị, ini ọ̀ tọrọkọ ḅịkị-koro tẹ kararama-olokuarị, “Ị́yẹrị anie Tamụnọ Tụḅọ ḅee!”
12Jizọsị nwẹnị tọn kụrọma si-atẹmẹ ma pịrị mịnẹ ini ori tụḅọ mọ ḅẹẹ ye ḍuko gbọrụḅọ-sọ pịrị ma.
Jizọsị Oyi Maa Fịrịmẹnjịapụ Finji Sẹlẹm
(Mat 10.1-4; Luk 6.12-16)
13Anịtẹso Jizọsị nwẹnị tụndụ kpọlị tẹ ori ḅarana ḅii owiapụ sịn ọ̀ ḅụụ pịrị. Ini ọ̀ dama-ḅom, 14tẹ ori oyi maa apụ finji sẹlẹ-ọkị tẹ fịrịmẹnjịapụ kẹ ịn sịnm. Ọ̀ nwẹnị ḍuko ịn pịrị, “Àrị ọ́ sẹlẹ-ọkị tẹ, ọmịnị ị̀ na sime ḅẹ ḅara. À pịkị ọ́ fịrịma pakama tẹ ọ́ Tamụnọ ẹkwẹn kọn ḅa, 15tẹ ọ́ kụrọ nyana tẹ tomina ḅụụ ḅio oru dee pakama ḅa.”
16Mịna apụ ma mie ọ̀ sẹlẹ-ọkị oyi maa apụ finji ma: Sayịmọnị (Jizọsị ọ̀ sịnm Pita). 17Jemusị na ori iyimbere Jọnị na, Zẹbidi owiapụ-awọmẹ ma (Jizọsị ịn sịnm Bohanajisi, anie fiearị ye, “So-alagba Owiapụ”); 18Anduru, na Filipu na, Batolomiyo na, Matiyo na, Tọmọsị na, Jemusị, Alịfịyọsị owiḅọtụḅọ ḅe na, Tadịyọsị na, Sayịmọnị ama ḅẹlẹma ḅọ ḅe 19na, Judasị Isikarịyọtị, anie tọrọkọ Jizọsị kẹ dẹrịma ḅọ ḅe na.
Jizọsị Na Bẹlịzibulu Na
(Mat 12.22-32; Luk 11.14-23; 12.10)
20Anịtẹso Jizọsị nwẹnị so warị mu. Tomina-ogbo mẹ pịkị ḅo kobiri la ḅara ḅụ Jizọsị na ò ḍukamẹnjịapụ ma na sakị nyana tẹ ye fị-a. 21Ọ̀ warị ḅẹ apụ anị gbolomaye naa sakị, ini ori ọkị so ḅẹ tẹ paka-mum, kịnị ḍuko ma-ḅọrọarị, mịnẹ, “Ọ̀ nọmụ tẹ ẹrẹsị!”
22 #
Mat 9.34; 10.25 Oloko mẹ tolumapụ ḅẹ ja apụ tẹ Jeruselemu ḅụ sime tẹ ḅo apụ ḅẹẹ simem, “Bẹlịzibulu nwẹn-sịn oru ḅe ọ̀ ḅụụ ḅio emi! Ori oru ma sịḅịdaḅọ ḅe mie kụrọ kẹ ọ̀ pịrị tẹ ọ̀ kẹ in dee pakamarị.”
23Mie ḅụ Jizọsị tomi ma sịn ḅụụ pịrị tẹ egberima-ẹkwẹn kọn ịn pịrịm, “Ndẹẹ Ekwesu inetẹ Ekwesu dee pakama ḅẹ ḅara? 24Gbọrụ sịẹ amịna ḅụụ kẹ pakịrị, pakịrị puu tẹ ama owu sọarị ḅẹḅẹ, anị sịẹ mẹ kaan-sara ḅa. 25Gbọrụ warị amịna ḅụụ kẹ pakịrị, pakịrị puu tẹ owu sọarị ḅẹḅẹ anị warị mẹ kaan-sara ḅa. 26Ọkọẹrẹsị Ekwesu daarị ama amịna ḅụụ kẹ pakịrị, pakịrị puu tẹ ḅẹḅẹ, anị inetẹ sime ene la ḅịa, kụma anị kaan-sara tẹ ḅo anị ḅẹ kunoma la ḅa.
27“Gbọrụḅọ-sọ inetẹ kụrọ tomḅọ warị sọ-mu tẹ ori aị ọkị so ḅịa, mḅọ tarị kụrọ tomḅọ ḅe fịna koroma sikima; anie rẹ mie mḅọ inetẹ ọ̀ warị mẹ fọịn ḅarịye.
28“À karakaraye ḍuko ọ́ pịrịarị, Tamụnọ inetẹ tomi mịẹarị asi na, ịn kọn-arị si ẹkwẹn mamgba na wẹrịso ịn pịrị ḅa. 29#Luk 12.10Kụma ḅẹḅọ-ḅẹḅọ tẹ si-aị ḍuko Fịafịa Tẹmẹ ḅe ọgọnọ gbanarị ḅọ, gbala-gbala ịn wẹrịso mḅọ pịrị ḅịa, mḅọ sime gbamaso si mịẹ tẹ ẹrẹsị.” 30Jizọsị gotẹ miemẹ ḍuko ye ja apụ ḅẹẹ simem, “Si tẹmẹ ọ̀ ḅụụ ḅio emi.”
Jizọsị Iyingi Na Ori Amịnapụ Owiapụ Na Ori Ẹrị Ḅẹ Ḅiim
(Mat 12.46-50; Luk 8.19-21)
31Anịtẹso Jizọsị iyingi na, ori amịnapụ owiapụ na ḅo lam. Ịn nụngọ ḅụ sịẹsime tẹ fịrịma ọ̀ sịnm. 32Anị sakị ḅụ tomina-ogbo lẹgị Jizọsị ikelema wararị, tẹ ịn nwẹnị ọ̀ ḅẹẹ, “Ḍikii, í iyingi na, ị́ amịnapụ owiapụ na ereme na nụngọ-ḅọkọ sime tẹ ị́ ẹrị ḅẹ-ḅiiarị.”
33Jizọsị nwẹnị pakịrị, “Tụḅọ ì iyingi? Tọ apụ ị̀ amịnapụ owiapụ?” 34Ọ̀ nwẹnị lẹgị ori ikelema apụ ma ḍiki tẹ ḅẹẹ, “Ḍikii! Mịna apụ ma anie ì iyingi pịkị ị̀ amịnapụ owiapụ! 35Ḅẹḅọ-ḅẹḅọ tẹ Tamụnọ ḅiiarị mḅọ mịẹ nwẹn ḅẹẹ ye mịẹarị ḅọ anie Ì iyimbere, ị̀ ịyịmbara, na pịkị ì iyingi na.”
(C) The Bible Society of Nigeria