Jobu 6
6
Jobu Ẹlịfazị Pakịrịm
Ori Ọ̀ Ḅụụ-fụka Ḍuko-sụam
1Jobu Ẹlịfazị ḍuko ye naa tẹso, ọ̀ nwẹnị pakịrị,
2“Yei, ì ḅụụ-fụka mamgba kẹ ye tọn-aị ọgọnọ gbana-a,
tẹ nwẹnị ị̀ ịganị iku tọn kụma!
3Anị iku tọrụ-minji ḅẹ onwi nẹngị ḅa
anịẹrẹsị ị̀ ẹkwẹn-aḅịḅị ma amụ si-a.
4Kẹ gotẹ ọkọ ḅẹẹarị,
Kụrọmamgba Nyanaḅọ ḅe aḍịẹịn ma ị̀ ḅụụ ḅio emi;
ị̀ tẹmẹ kịnị ḅaa aị ma ḅuum;
Tamụnọ tẹmẹ-naịn-naịnma aị tẹlẹma ị̀ pịrị tẹẹ.
5Piri-ḅio-ḅẹ yedogi-nama ḅe ḅọrọ owu ori osuka nyana wararị ogbo,
anịanịa pootẹ-nambulo ḅe ò fịye gotẹ owu?
6Fụn ofori ḅara ḅụ ḅẹlẹ-a fịye mẹ kịnị inetẹ fị ḅẹ,
anịanịa ịwọma tokuruarị ịnyịnya mẹ ḅẹ kụlala mẹ ḅẹlẹ?
7Ḅara kẹ arị lama mẹ ị̀ pọkọ-tarị-a;
ḅio pikirima fịye sime-ḅara anị nwẹn simem ị̀ ḅụụ.”
Jobu Ḅiim Tamụnọ Ò Ḍumo Ọkị
Jobu ḅẹẹm:
8“Yei! mịẹ tẹ àrị à ḅii ye nyana,
tẹ Tamụnọ à ḅii ye kẹ ị̀ pịrị ḅẹ ḅara;
9mịẹ tẹ anị Tamụnọ ḅụụ-ḅẹlẹtẹ ori ị̀ gbẹẹ-kọsịma,
mịẹ tẹ ori ọ̀ ḅara foofoma tẹ ị̀ pẹlẹ-siin ḅẹ ḅara!
10Miemẹ ì ḅiokpọmaye sọ ḅa;
à dein sakị nyana akụ ḅụ sọ ḅioḅẹlẹ ḅa;
kẹ gotẹ ọkọ ḅẹẹarị,
amụ à Fịafịa Ḅọ ḅe ẹkwẹn-aḅịḅị ma piki-a.
11Tiye ị̀ ịnyọ, tẹ à koru na-iḅi?
Anịsakị tiye ì kunoma, tẹ à dein-sime na-iḅi?
12Ị̀ ịnyọ mẹ ḅọrọ ḍụḅarị ma ịnyọ?
Anịanịa ị̀ meni mẹ ojo?
13Karakaraye ḍuko ḅụ à ḅarasụa nyana-a ị̀ ḅụụ-ḅio ḅụ,
anịsakị à ḅarasụa nyana ḅẹ anga goyegoye ịn dee tẹ ị̀ ḅụụ ḅụ.
Jobu Ori Ikiapụ Kẹ Ye Mịẹarị Ḅara Ḍuko-sụam
14“Anị ḅọ mẹ tẹ gbọrụ ikiaḅọ ḅụ iḅi mịẹ dasịẹma ḅọ goḅọ-goḅọ,
Kụrọmamgba Nyanaḅọ ḅe mangịma mẹ sịkịm.
15Ogilolo minji oḅori-kẹ-kịnịsịn ḅara,
mie ị̀ amịnapụ ma sime-ḅara,
puu mu tọrụ koroarị minji ḅọrọ-so ḅara,
16oḅoku kụrọtẹ minji furuma wararị aị ma,
tẹ eene-mgbọ ḅụụ ḅọị anga ma.
17Kịnị arị ẹrị-a ọfịrị sakị ḅụ;
sakị mẹ ọfịrị tẹ ḅẹḅẹ arị mẹnịma tẹ arị kiri ḅụ.
18Ịkpa mẹnjị apụ ma ịna mẹnjị etela-irim;
ịn mu ḅụụ la-a anga ḅụ sọ tẹ fịị-faam.
19Tẹma ḅẹ ịkpa mẹnjị apụ ma ḍikim
Sẹba ḅẹ ye-mu apụ ma ḅiokpọm.
20Ịn ḅiokpọm ẹrẹsị ini ịn pikirimam;
in anịjụ ḅom tẹ ḅụụ-jịrị nyanam.
21Ị̀ ḅụụ ḅụ í ḅo ọkọ sime tẹẹ;
Ị́ ị̀ ḅụụ-fụka ẹrịm, tẹ ḅalafa tẹẹ.
22Àrị ị́ ḅẹẹ, ‘Ye kẹ ḍie ị̀ pịrị?’
Anịanịa, ‘Í kọn ngọ ḅụ ọḅụ pịrị ị̀ pịrị?’
23Anịanịa, ‘Kịnị na fịya-a ḅọ ḅe ḅara ị̀ ḍụa-ḅọrọmaa?’
Anịanịa, ‘Kịnị ponoma ḅọ ḅe ḅara ị̀ ḍụa-ḅọrọmaa?’
Jobu Ọ̀ Ḅụụ Ḍụam Ori Ikiapụ Tọrọkọ
24“Ì tolumaa, anịsakị à gbene-sime ḅa;
ị̀ mịẹẹ, arị à mịẹ-irima tẹ ḅara nimi.
25Karakara ẹkwẹn-aḅịḅị tọ-ḅara sime kụrọ ḅara kẹ kịnị sukurumarị!
Kụma ị́ kọn-arị daa-karakarama ẹkwẹn mẹ tọrụ tọ-anga daarị?
26Í ḅiotọn mịnẹ í inetẹ ḅio ḅịkịarị tomḅọ ẹkwẹn-aḅịḅị ḍiki ịganị ḅẹ,
ẹkwẹn mẹ papaa fẹrụ sọarị ḅẹ sakị?
27Ị́ ḍapụ ofori awọmẹ ma sọ gotẹ apịan sụa ḅẹ,
tẹ í ikiaḅọ kẹ mu ḅịḅị-kẹ-ogbosọ nyana ḅẹ.
28“Kụma mịọkụ, yee anị ị́ ḅụụ-ḅẹlẹ tẹ ị́ ì ḍiki;
kẹ gotẹ ọkọ ḅẹẹarị, àrị ị́ tọrụ-ogbo ḅụ iruo ḅịa.
29Pịkịị, à tẹkẹm yee mịẹ-irima paka ma.
Mịọkụ pịkịị, ị̀ karakara mẹ ye anị la ḅẹ mịẹarị.
30Ị̀ ḅẹlẹ ọgọnọ ḅụ mịẹ-irima gbọrụmgbọ emi?
Ị̀ ḅẹlẹ inetẹ ḅụụ-fụka kẹ ḅo ḅẹ ye nimi ḅịa?”
(C) The Bible Society of Nigeria