Jobu 26
26
Jobu Eseni Karama Sakị kẹ Ẹkwẹnm:
Ò Bilida Pakịrịm
1Anịtẹso Jobu nwẹnị pakịrị:
2“Ị́ tọ-ḅara sime-ḅara kẹ ḅarasụa oriḅe tẹ kụrọ nyana-a ḅọ ḅe pịrị tẹ!
Ị́ tọ-ḅara sime-ḅara kẹ ịnyọ nyana-a ḅara kọngọ mẹ ḅọrọma tẹ!.
3Ị́ tọ-ḅara sime-ḅara kẹ nimi kẹ oriḅe tẹ ye-nimia-ḅọ ḅe toluma tẹ,
tẹ tọnwa ḅara kẹ karakara iḅi nimi ḍie-pakama tẹ!
4Tụḅọ ḅarasụa kẹ ị́ ẹkwẹn-aḅịḅị kọn tẹ,
anịsakị tụḅọ tẹmẹ ị́ ḅụụ ḅụ sime tẹ paka-ḅo tẹ?”
Bilidadị Paa Ẹkwẹn-arị:
Tamụnọ Anie Ye-goyegoye Nẹngị Ḅọ
5“Suku-ḅio sime sịḅị-kikima-yọ ma sẹkịmam,
minji ma na, arị ḅio sime aị na arị na.
6Tamụnọ tọrọkọ ḍuḅu mẹ paụ wararị,
anịsakị guluguluma gbaịn ye ofori.
7Ori ọgọnọ-jụ ḅẹ So-tọrụ mẹ sụn-pakamam ye ofori anga mẹ ḅụ
tẹ kiri mẹ kẹ gberie-sọ ọgọnọ sololo-a.
8Ori akpakpa sọ tẹ kpiti so ma ḅio, minji ma ọlọ gbolomam
tẹ kpiti So-tọrụ mẹ sọ puu-a arị suku-ḅio ḅụ.
9Ori akalụ mẹ tọrụkuḅu mẹ gbaịnm
tẹ ò kpiti So-tọrụ mẹ kẹ anị ḅụ sụn saḅamam.
10Bele na kanakana na ogboku ḅụ,
ori ejikila mịẹ-pakamam minji mẹ ọgọnọ ḅụ.
11Ò ḍiki-ịganị ḅụ, so mẹ ḅẹ ḅeriaị ma ḅụụ-gbiripum, tẹ jikem.
12Ọ̀ kụrọ ḅụ ori opu tọrụ mẹ deinmam;
ò yefieye naa ḅụ ò Rehabụ ḅaam
13Ò ḅịḅị ḅẹ fẹrụ mịẹ tẹ So ma tọrụ-gbẹm;
ori ḅarana mangị-soarị oronwi ḅe ḅaam.
14Ḍikii, ma aị ma anie ọ̀ kụrọ mẹ ḅẹ iḅoma;
anịsakị ḅeri-ḅio wa ọ̀ ḅụụ naarị aị ma,
tọ-ḅara sime ịrụ kọn!
Kụma tụḅọ inetẹ ọ̀ kụrọ mẹ ḅe so-alagba fie ye naa ḅẹ?”
(C) The Bible Society of Nigeria