Ayịzaya 51
51
Kẹ Jeruselemu Ḅio-deinma Ẹkwẹn Ma
1KỊNỊNYANAḄỌ ḅe mẹẹ:
Ḅọrọma ḅẹ-ḅiiarị apụ, ọmịnị ì pokii,
ọmịnị ḅarasụa gotẹ ị̀ ḍọkụma-ḅoarị apụ.
Ọmịnị ini ó puu-pakama-ḅo ịkụ mẹ kẹ ḅiokoromaa,
olulu mẹ tẹ ini ó soku-pakamaḅo anga mẹ.
2Ọmịnị ọmịna elemu ḍaḅọ Ebira-amụ kẹ ḅiokoromaa,
na Sera na, ḅụụ ḅụ ọ́ paka-ḅo ḅọ ma.
Arị Ebira-amụ sịn ọkị sakị, ọ̀ tụḅọ nyana-a
kụma arị ò boma tẹ awọ kẹ ọ̀ pịrịm;
à mịẹ tẹ ò furo-ḅẹ-apụ kịẹn-kịẹn
ọkụ ofori ḅara lam.
3À sịḅị-jịrị nyana Jeruselemu pịrị ḅa,
árị agara ma ḅio angarị apụ ma.
Karakaraye árị amakiri mẹ ịkpa sọ tẹẹ sọ,
àrị anị kẹ fịlawa ḍụọ mịẹ ḅa,
Ideni ḅụ à ḍiḅi ye mẹ kịkaye.
Ḍereku na ḅioḅẹlẹ na anị yọ sime ḅa
pịkị ịn kẹ ì tokini tẹ ịmịẹtẹ kẹ ị̀ ḅẹẹ ḅarị anume sọ.
4“Ị̀ atomi ọmịnị ì pokii,
ọmịnị à ḍukoarị ye pokii;
Arị ì tolumaye kẹ sịẹ-sịẹ ma pịrịarị;
ì oloko ma bele ọkị-ḅo ịn pịrị ḅa.
5À sarasarama ḅo ịn ḅọrọma ḅa;
ì owu-ḅara-iḅi sakị mẹ ḅo kpekitẹ.
Ị̀ ḅioju ḅẹrẹtọn sịẹ-sịẹ ma pịrị ḅa.
Sụma-jụ sime amakiri ma koruarị à ḅo;
in ḅiokpọ nyana ḅara kẹ koruarị arị ịn ḅọrọma ḅẹm.
6Ọ́ tọrụ saakị So ḍikii; ó kiri mẹ ḍikii!
Kịnị ḅarị So mẹ ẹrị ḅịa, onwin kaan so ye ọkụ.
Kiri mẹ elemutẹ kapa kịka tẹ sịkịrị-faa ḅa,
tẹ tomi mamgba ọmọmọ kịka tẹ fịị sara ḅa.
Kụma arị ọkị-ḅoarị ḍụa-ḅọrọma mẹ sime gbamaso ḅa;
ì owu-ḅara-iḅi mẹ kunoma ye sọ ḅa.
7Kuraye nimi apụ ọmịnị ì pokii,
anie ì tolumaye amịna aḅioḅẹngbọ ḅụ
nwaịn wararị apụ ma.
Ọ́ ḅalafa ma, kịnị ọmịna ḅụụ-sịnịsịnịma ḅẹ aị
kẹ ọ́ mịẹ-simarị sakị;
8ini ịmaịn ḅarị ḅara akarakaraḅa pẹị siin tẹ ḅịtẹ kịka ḅa!
Kụma àrị ọkị-ḅoarị ḍụa-ḅọrọma mẹ sime gbamaso ḅa;
ì owu-ḅara-iḅi mẹ sime mu ḅẹẹ-sakị ḅẹẹ-sakị la ḅa.”
9KỊNỊNYANAḄỌ, saakị tẹ ḅarasụa wa pịrịị!
Ị́ kụrọ pakama tẹ kẹ wa ḅọrọmaa;
anị kẹ elemu ị́ mịẹ-mịẹ ḅara mịẹẹ.
Ị́yẹrị mie minji ḅio ḅẹ mamataḅaye Rehabụ
ḅe pẹlẹ kọsịma ye.
10Ị́yẹrị mie pịkị tọrụ mẹ samụnọma tẹ minji
mẹ ogboku mẹnjị-ḅọrọ-anga mịẹ ye,
mịẹ tẹ ị́ ḅọrọmarị apụ ma inetẹ saḅa-ḅọrọ ḅẹ ḅara.
11Ị́ pụkọ-pakamaḅo tẹ apụ ma ḅioḅẹlẹ kẹ mu Jeruselemu la ḅa,
nume-suarị, olokuarị, ḍereku ḅụ.
In ḅioḅẹlẹ gbamaso ḅa,
gbọrsịḅị kururu na ḅioḅẹngbọ-si na ḅio paka-ḅo.
12KỊNỊNYANAḄỌ ḅe mẹẹ:
Yẹrị anie ọ́ kụrọmarị ḅo.
Ó tiegotẹ fịị-fịị tomḅọ ḍiki-ḅalafa ḅẹ,
anie ḅarị ḍumo mu ene la osuka nẹngị-a ḅọ ḅe?
13Ọ́ tẹmẹ KỊNỊNYANAḄỌ ḅe ọmịnị ọ̀ kẹ ḅioḅọrọma tẹ,
anie So ma nụnụ finjima
tẹ kiri mẹ suku-saakị ḅọ ḅe?
Ó tiegotẹ sakị mamgba ḅalafa ḅara kẹ ḍumo kọn ḅẹ
ó ponomarị apụ ma owi-ịganị ḅụ,
tẹlẹma tẹ ọ́ ḅaa guluguluma ḅẹ-yearị apụ ḅụ?
Ịna owi-ịganị mẹ ḅarị jen kẹ ọ́ la ḅịa.
14Ikoliapụ ma ala-a ịn paka-ḅo ḅa;
ịn nangwọ ḍumo kọn ḅa
tẹ in ḅiiarị afịaị mamgba nyana ḅa.
15Yẹrị anie KỊNỊNYANAḄỌ ị́ Tamụnọ ḅe;
àrị abajị mẹ jikema
tẹ anị ḅẹ ọnụngọ ma ḍụrụkụarị.
Ị̀ ẹrẹ anie Kụrọmamgba nyana KỊNỊNYANAḄỌ!
16Yẹrị So ma nụnụ finjimam
tẹ kiri mẹ suku mẹ saakịm;
À ḍuko Jeruselemu pịrịarị, “Ọmịnị ị̀ atomii!
Arị ì tolumaye kẹ ọ́ pịrị tẹẹ,
pịkị ị̀ ḅara kẹ ọ́ gbaịn ḅọrọmarị.”
Jeruselemu Tọrụsiẹrị Kunoma Mẹ
17 #
Mịẹ 14.10; 16.19 Jeruselemu, saakị!
Ị́ ḅụụ jike tẹ saakị sịẹ!
Í fomu-ḅara da kọpụ mẹ ḅio ḅuu tẹ
anie KỊNỊNYANAḄỌ ḅe ori ịganị ḅụ kẹ ị́ pịrị ḅuu ye mẹ;
í ḅuu tẹ anị ị́ mịẹ tẹ ị́ pụmbụma-pụmbụmam.
18Gbọrụḅọ-sọ ofori etela kẹ í ḍie,
ị́ atomi ma ogboku ḅụ gbọrụḅọ-sọ ofori
ḅara kẹ ị́ ọlọ mẹnjị.
19Opu ḅụụ-fụka maa ḅọkọ ḅo ị́ la tẹẹ:
ị́ amakiri mẹ ọmụ anị fama-fama tẹ,
ḅuru pịkị í atomi ma ḅaa tẹ.
Gbọrụḅọ sọ ofori ọkụrụkụrụ nyana ị́ pịrị.
20Etela akaka goyegoye ḅụ
í atomi ịnyọ faa ḅụ ḅịkị koro wararị;
ịn kịkarị ye piri-deeḅọ ịgbọ ḍiein kun sịẹma wararị ḍuu.
Tamụnọ ịganị ḅẹ kụrọ ịna ḅụụ ịnọ tẹ.
21Ọmịnị Jeruselemu ḅẹ tọrụsiẹrị apụ,
ọmịnị tẹ iru ḅuu apụ ḅara kẹ pụmbụma-pụmbụmarị apụ.
22KỊNỊNYANAḄỌ ọmịna Tamụnọ ḅe ọ́ ḍụarị tẹ ḅẹẹarị,
“Ị̀ ịganị ḅụ à kẹ ọ́ pịrị kọpụ mẹ arị ọmịna ḅara anị ọkị soarị.
Ọ́ ḅarị jen kẹ ó ḅuu tẹ pụmbụma-pụmbụmarị
iru mẹ ḅuu nyana-a.
23Arị anị kẹ ó ponoma sime apụ ma pịrị ḅa,
ọ́ mịẹ tẹ ọmịnị etela akaka ma ḅụ ḅọlọlọ sime apụ ma,
tẹ ḅụrụtẹ ye nanga ḅọrọ ḅara kẹ ọ́ nanga apụ ma.”
(C) The Bible Society of Nigeria