Ayịzaya 38
38
Amadaḅọ Hẹzịkaya Obim Tẹ Pịkị Gwọọm
(2 Ama 20.1-11; 2 Pkị 32.24-26)
1Mị sakị pembe sakị ḅụ Ama-da Hẹzịkaya obi tẹ kẹlẹ kọnm fị tẹ. Ịkịankoro Ayịzaya Emọzị tụḅọ ḅe ori ẹrị tẹ ọ̀ ḅẹẹm, “KỊNỊNYANAḄỌ ḅe ḍuko ị̀ pịrịarị mịnẹ í ye goyegoye kẹ ọrụtọn nyanam, í oju iḅi ḅịa ẹrẹsị. Ḅụụ tẹlẹma tẹ fịị.”
2Hẹzịkaya nwẹnị ọ̀ tọrụ pịkị warị akaka mẹ da tẹ tẹkẹ: 3“KỊNỊNYANAḄỌ, kẹ ḅiokoromaa, mịnẹ à ḅioḅẹngbọ-kẹ-sịrẹrẹ-niḅi ḅara na sịḅị-tuu ị́ pịrị ḅara na kẹ fịrịmẹnjị ị́ pịrị tẹẹ, à pịkị sakị mamgba ḅụụkụrọma tẹ í ḅiim à mịẹ ḅẹ ye mịẹm.” Tẹ ọ̀ nwẹnị saakị ḅioḅẹngbọ-si ḅara kẹ owu lama.
4Anịtẹso KỊNỊNYANAḄỌ ḅe tọn Ayịzaya pịrịm 5ọ̀ pịkịma mu tẹ Hẹzịkaya ḅẹẹ, “Yẹrị KỊNỊNYANAḄỌ ḅe, í elemu ḍaḅọ Devidi Tamụnọ ḅe, ị́ tẹkẹ naa tẹ, pịkị ị́ tọrụ ḅẹ owu-minji mẹ ẹrị tẹ. À minini tẹ í jei akụra kẹ ḍumo tọrọkọ mu ḅa. 6Arị na Jeruselemu mẹ na pọkọ pakama-ḅo ḅa Asiriya tomikiri mẹ daarịḅọ ḅe ḅara-ḅio ḅụ, tẹ ama mẹ gbaịn ḅọrọma tọrọkọ, tọrọkọ mu ḅa.”
7Ayịzaya nwẹnị pakịrịm, “KỊNỊNYANAḄỌ ḅe elekima kẹ ị̀ pịrị ḅa, kẹ ḍie pakama mịnẹ ori ò minini ye mịẹ ḅa.” 8Ama-da Ehazi nama ḅekin-warị kpọlị ye mẹ ọgọnọ KỊNỊNYANAḄỌ ḅe mịẹ tẹ tẹmẹ mẹ oyi aḅụọ kẹ ọḅụ da ḅa.
9Hẹzịkaya ori obi ḅụ kụrọma tẹso, ọ̀ mị tokini nume mẹ kẹẹ kuromam:
10À kuromam ị̀ asambịrịma sakị ḅụ à so ḍuḅu ḅio muarị ḅoto,
À gbala-gbala ì ḍumo-ene mamgba kẹ anga fama ḅịa ḅara.
11À kuromam mịẹ ḍumo wararị apụ ma tomikiri ḅụ
À ḅarị gbala, gbala KỊNỊNYANAḄỌ ḅe ẹrị ḅịa
Anịanịa ḍumo wararị tomḅọ goḅọ-goḅọ sọ.
12Ì ḍumo pẹlẹ-so tẹ kunomam,
Akpụrụ-warị paịn-sara ḅara,
Ḅịtẹ pẹlẹ-siin ḅara ḅịtẹ ḍoriye ḅụ.
À kuromam Tamụnọ ì ḍumo kẹ ḅo kunoma lamarị.
13Bebe ḍin mẹ à kẹ owum fụka ye ḅụ,
ọkụkụ ì mgbe ma anyịmarị ye ọkụ.
À kuromam Tamụnọ ì ḍumo kẹ ḅo kunoma lamarị.
14Ị̀ pọkọ ḅarị paka-a, tẹ anị ḅụ ịnyọ fa tẹẹ,
Tẹ à nwẹnị olosịkịya ḅio-fiema ḅara kẹ ḅara kẹ ḅio-fiema.
Ịnyọ ị̀ atọrụngbọ tanm so ḍiki ḅụ.
KỊNỊNYANAḄỌ, mịẹ ḅụụ-fụka mẹmgba ḅụ ị̀ pọkọ pakama-ḅo.
15Àrị inetẹ tiye ḍuko ḅẹ? KỊNỊNYANAḄỌ ḅe miemẹ mịẹm,
Ì ḅioḅẹngbọ akụarị, tẹ arị inetẹ mono-a.
16KỊNỊNYANAḄỌ, à ḍumo-sime ị́ pịrị ḅa, ị́yẹrị ngẹrị;
Ị̀ gwọọ, tẹ à ḍumo.
17Ị̀ tẹmẹ ḅẹ akụ mẹ pịkị-ḅo dein sọ ḅa.
Ị́yẹrị ì ḍumo ḅọrọmarị ye kẹ anị
lama ḅẹ ye mẹmgba ḅụ,
Ị́ ị̀ asi mamgba wẹrịsoarị.
18Ḍuḅu ḅio ḅụ inetẹ í tokini ḅẹ gbọrụḅọ-sọ ofori;
fịtẹ-apụ inetẹ ḅioḅẹngbọ kẹ ị́ ḅụụ ḅụ gbana na-iḅim mẹ kẹ ḅiokpọma ḅịa.
19Ḍumo wararị apụ mie í tokiniarị,
Mịọkụ arị í tokiniarị ḅara mẹ.
Ḍapụ ḍuko ịna awọmẹ pịrịarị í ḅioḅẹngbọ
kẹ ḅụụ ḅụ gbana na-iḅi ḅara simearị mẹ.
20KỊNỊNYANAḄỌ, ị́ ị̀ gwọ tẹẹ.
Wa ọbọ farị, farị tẹ su í tokini ḅa,
Nwẹnị ị́ Warị mẹ ḅio nume su tẹ kẹ
í tokini, wa ḍumo mu la ḅiri, la ḅiri ḅụ. 21Ayịzaya ḍuko amadaḅọ ḅe pịrịm mịnẹ ori ịla sịn mgbọlụ ḅẹ ye temi tẹ kẹ ọpọpọlị mẹ ḅụ gbanaa, ori oju iḅi ḅa. 22Anịtẹso Hẹzịkaya gbelam, “Ndẹẹ à kẹ nimi ḅarị elekima mịnẹ arị inetẹ Tamụnọ warị mẹ mu ḅẹ?”
(C) The Bible Society of Nigeria