Ayịzaya 33
33
Ḅarasụa Ḅii Tẹkẹ
1Wamịnị na fịya-a apụ ma ịn fa tẹ! Ịn kụrọ-ḅara kẹ jen-apụ aị ọkị tẹ pịkị ịn kẹ dẹrịma tẹ, tomi-juḅẹye jen-apụ amụ kụrọ-ḅara kẹ amụ ịna aị ọkị tẹ ịn kẹ dẹrịma-a sọ. Kụma ịn nyana tẹ kẹ kụrọ-ḅara kẹ jen-apụ aị ọkị na ịn kẹ dẹrịma sakị mẹ ḅo kunoma ḅa, tẹ ini ḅioju sọ ḅo jen-apụ ịna aḅara ḅụ kụrọ-ḅara kẹ ye ọkị tẹ oḅori kẹ ịn sịn ḅẹ apụ sọ ḅa.
2KỊNỊNYANAḄỌ, ọkụrụkụrụ nyana wa pịrị. Wa ị́ kẹ ḅiokpọmarị. Ene-ene ḅụ wa gbaịn tẹ wa ḅọrọma ḅụụ-fụka asakị ḅụ. 3Ị́yẹrị owu sọ wa pịrịarị sakị, sịẹ, sịẹ ma mangị-soarị ini mu fiearị ye naa sakị. 4Ịn nyana-aị kịnị arị koro tẹ fọịn soarị.
5KỊNỊNYANAḄỌ ḅe kpọma ḍụḅa ḅara ḍiki! Ori mie ḅẹrẹtọn ye goyegoye pịrịarị. Ọ̀ karakara ḅẹrẹkọn na karakara ḍumo kọn ye-mịẹ-ḅara na kẹ Jeruselemu ḅinma ḅa, 6tẹ mịẹ tẹ opu sịẹ mẹ jike-a ḅara kẹ sịẹsime ḅa. Sakị mamgba ori amịna atomi gbaịn ḅọrọma tẹ nimi na ye-ḍawọ-ḍịịn na kẹ ịn pịrịarị. Ḍụḅa tẹịn ngọ tẹ ịn nyana ye anie fịafịa ḍumo ḅụ KỊNỊNYANAḄỌ ḅe mangịma.
7Ḅiokpọ owiapụ ḅarasụa nyana ḅẹ ẹrẹsị olokuarị. Amịna ama tọrụ ḍima tẹ ḅụụkụrọma tẹ dein ḍọkị ḅẹ ḅo apụ ma ḅioḅẹngbọ-si ḅụ owu lamarị. 8Opu etela ma fịị dogi-ḅo ḅara simearị ẹrẹsị kịnị ḅarị arị ḅụ mẹnjị ye mu-a. Ḅara-pono pịrị aḍiri ma ịn kan tẹ, pịkị ḅarị ḅịḅị-kẹ-ogbosọ ma kẹ ye-sịn-a. In kun kẹ pịrịarị gbọrụḅọ-sọ ḅarị ofori. 9Amakiri mẹ papaa koro-simearị, tomi ma mangị-so tẹ. Lẹbanọnị ḅẹ opu apiri ma kpatụ tẹ, Sarọnị ḅẹ iḅi ḍụọ ḍiḅi kiri mẹ ḅo ịkpa sọ tẹ, anịsakị Basani na Kamẹlị Tụndụ na ḅẹ asịn ma ịnyịnya sararị.
KỊNỊNYANAḄỌ Ḅe Ori Na Fịya-a Apụ Ḅeri Nụnụarị
10KỊNỊNYANAḄỌ ḅe tomikiri ḅẹ asịẹ ma ḅẹẹarị, “Mịọkụ à saakị ye mịẹ ḅa. Arị à kụrọ nyana la ḅara ḍie pakama ḅa. 11Ye ḅụ sọ-a aị mie ọ́ mịẹ ḅẹ tẹ tọn-arị, tẹ ọ́ mịẹarị ye goyegoye papaa ye. Ị̀ tẹmẹ kọrị-fịnị kịka tẹ ọ́ dọkịma fama ḅa. 12Ọ́ dọkị ḅarị ḅara anie ịkụ tẹ dọkị ḅo tọrụ sọ tẹ paịn-paịn-sararị ye ọkụ; ọ́ dọkịma fọọn mịẹ tẹ nangị asịn kịka ḅa. 13Yee ḅẹḅọ-ḅẹḅọ, kpeki ḅọ na sụma ḅọ na, à mịẹ tẹ ye mẹ naa tẹ ị̀ kụrọ kẹ ye-sịn.”
14Zayọnị ḅẹ si-mịẹapụ ma tẹmẹ-naịn-naịn ḅụ oju-sẹkịarị. Ini mẹẹ, “Tamụnọ ḅẹrẹkọn kịkarị ye kọrị gbamasoarị fịnị. Wamịna ḅụ ọkọ kịka kọrị-fịnị ḅio sọ tẹ inetẹ fịị-a tẹ paka-ḅo ḅẹ ḅọ tụḅọ?” 15Í inetẹ fịị-a tẹ paka-ḅo ḅa í kuraye ḍuko tẹ mịẹarị ḅẹḅẹ. Ị́ nyana kụrọ kẹ igoin-apụ ma inoma ma, pịkị ọḅụ fị ma. Kịnị ḅaa-ḅaa ḅẹ ḅẹrẹ ḅịyarị apụ ḅụ sọma, anịanịa ja si amịẹaị mịẹ ḅẹ ḅẹrẹ. 16Anịsakị ye ḅarị ị́ la ḅịa, ị́ pịkị ye ḅụụ la-la anga ḅụ emi ḅọ ḅara sime ḅa, gbala ọmụ la-laa kụrọnị-anga ḅụ í emi ye ọkụ. Ị́ fịye nyana tẹ fị ḅa, pịkị minji nyana tẹ ḅuu ḅa.
Ebube Nyana Wararị Tọrọkọ-jụ Mẹ
17Sụma mu pakịrị-pakịrị mamgba laarị amakiri daarị amadaḅọ pịkị siin gbọrụ sakị kẹ tọrụ-gbẹ ḅara kẹ paka-ḅo tẹ ọmịnị ẹrị ḅa. 18Elemu ọ́ nyana-nyana jen asịẹ ḅẹ ama igbigi oso apụ ḅalafa mẹ na kịnị sọkịrị apụ ma na ḅọrọtẹ papaa kuroma ḅụ simearị aị sọ ḅa. 19Ọ́ ḅarị jen kẹ jen asịẹ ḅẹ opu ẹkwẹn-kọn-apụ tẹ ọmịnị inetẹ in fiearị ama ḅẹ ḅịḅị naa apụ ẹrị ḅịa. 20Zayọnị ama mẹ ḍiki, wa Tamụnọ alalị fịarị opu ama mẹ! Jeruselemu mẹ ḍiki! Gberie sọ anị ḅio anga ḅarị apụ la ḅịa ḅara ḍiki! Anị kịka ḅarịye akpụrụ-warị tẹ siin so jen yọ mu-mu-a ye, anị ḅẹ adolịa ma so-soa, anị ḅẹ aḍigi ma gbala-gbala pẹlẹ-pẹlẹ-a. 21KỊNỊNYANAḄỌ ḅe ori ebube kẹ wa ḍie ḅa. Wa finjimatẹ atọrụ ma na okolo ma na akaka anga ḅa, kụma fịya-a ọmụ-arụ arị aḅio dọkụ ḅịa. 22Kẹ gotẹ ọkọ ḍukoarị, KỊNỊNYANAḄỌ ḅe anie wamịna ḅẹrẹkọnḅọ; KỊNỊNYANAḄỌ ḅe anie oloko sụa wa pịrịarị-ḅọ. KỊNỊNYANAḄỌ ḅe anie wamịna amadaḅọ, ori mie wa ḅọrọma ḅarịye. 23Ọmịna arụ ḅio pike wararị asịn ma kpọkọrọ-kpọkọrọ tẹẹ, opu vala sịn mẹ suku kụrọ-a ẹrẹsị vala mẹ ọ̀ sụa-a. Anịtẹso tọnwa fọịn aị paka tẹ kịnị ḍiema-ọkị ḅa, tẹ ekeliapụ sọ ye fọịn so ḅa. 24Wamịna ama ḅio angarị gbọrụḅọ-sọ ḅẹ ḅịa, “Àrị obiarị,” tẹ in si mamgba wẹrịso ḅa.
(C) The Bible Society of Nigeria