Ayịzaya 20
20
Paụ Wararị Ịkịankoroḅọ ḅe Elekima Mẹ
1Sagọnị, Asiriya tomikiri mẹ da sime ḅọ ḅe tọn ḅara ḅụ, Asiriya ḅẹ ọmụ ogbo mamgba sịḅịda opu ọmụ alaḅọ ḅe ọmụ kẹ Filisiteni ḅẹ ama Asịdọdị gbinm. 2Anie mẹ amụ paka-a ogbo, tẹra kụra sakị ḅụ, KỊNỊNYANAḄỌ ḅe ḍuko Emọzị ye Ayịzaya pịrịtẹ mịnẹ ori ori aḅụọ ḅẹ okuro ma siin, pịkị ori ịnwaịn sime akpa mẹ sọ. Ọ̀ nwẹnị ḅịḅịpoki tẹ paụ tẹ papaa aḅụọ kẹ mẹnjịma ḅọrọ. 3Ini Asịdọdị nẹngịma tẹso, KỊNỊNYANAḄỌ ḅe ḅẹẹm, “Ị̀ fịrịmẹnjịḅọ Ayịzaya tẹra akụra kẹ paụ tẹ papaa aḅụọ kẹ mẹnjị tẹ. Miemẹ anie Ijiputi na Sudanị na ḅụ paka ḅarịye ḅẹ elekima. 4Asiriya tomikiri mẹ daarị opuḅọ ḅe arị asịẹ ma ḅụ ò kuun-ọkị ikoliapụ ma paụma tẹ ịn kẹ mẹnjị so ḅa. Asambịrịma apụ na omongitẹapụ na papaa aḅụọ kẹ paụ tẹ mẹnjị ḅa, ịna okolo-ḅọkọ ma gbaịn-a ḅara, nwẹnị ḅụụ-jịrị kẹ Ijiputi ọgọnọ gbana ḅa. 5Sudanị kẹ ḅiokpọmatẹ apụ ma, pịkị Ijiputi kẹ ḅịḅịkpọ sime apụ ma sọ ye ḅarị in ḅiotọn ḅara paka ḅịa, ịna ḅiokpọma aị mamgba kan-saratẹ.” 6Anị sakị mẹ ḅụ, Filisiteni ḅẹ tọrụ akaka ḅụ angarị apụ ḅẹẹ ḅa, “Wa ḅụụ ḅụ sịrẹrẹm mịnẹ Asiriya tomikiri mẹ daarị opuḅọ ḅe kụrọ ḅụ ịn wa gbaịn ḅọrọma nwẹn ḅẹẹ ye mẹ paka ye ḅara ḍikii! Ndẹẹ wa inetẹ fịị-a sọ ḅẹ ḅara.”
(C) The Bible Society of Nigeria