Galesiya 6
6
Ọ́ Jụmọ-Jụmọ Ikuye Dogii
1Ị̀ amịnapụ, ọmịna ḅụ gbọrụḅọ kura-aye mịẹarị tẹ ini mḅọ kun kun, ọmịnị ma tẹ amụ ọkọ sime si mịẹ-a tẹ tẹmẹ ḅụ simearị apụ ma mḅọ datụkụmaa; kụma sịḅị ama sịn-a ḅara mie ọ́ kẹ anị mịẹ ḅarịye. Tẹ ọ́ pịkị tọrụ kẹ ọmịna aḅụụ wẹrịị, mịẹtẹ ọmịnị sọ ọkọ sime daaḍiki ḅio sọ ḅịa ḅara. 2Ọ́ ḅarasụa tẹ jụmọ-jụmọ ikuye dogii, tẹ mị ḅọkọ ḅụ mie ọ́ ḅọrọ tẹ Kịrayịsị oloko mẹ koko ḅarịye. 3Gbọrụḅọ nwẹnị mḅọ ye ḅụ ofori tẹ amịna ḅụụ kẹ ye-sịn-arị ḅẹḅẹ, mḅọ papaa oḅori kẹ amịna ḅụụ sịn-arị. 4Ọrụḅọ-ọrụḅọ ḅarana amịna ye-mịẹ-ḅara pekele-ḍikii. Anị iḅi wararị ḅẹḅẹ, mḅọ amịna ḅụụ ḍiki-ḅioḅẹlẹ ḅa, mḅọ mịẹye mẹ gotẹ, amịna nye kẹ jụmọ mịẹye na tọnma-a ḅara ḅụ. 5Kẹ gotẹ ọkọ ḍukoarị, ọrụḅọ-ọrụḅọ sime mḅọ pịrị dogiye dogi ḅa.
6Kịrayịsị oku mẹ ḍawọarịḅọ mẹ, amịna nyana iḅi aị mamgba kẹ ye kẹ mḅọ tolumarị ḅọ ḅe na ḍiemaa.
7Ọmịnị oḅori kẹ ọmịna aḅụụ sịn ma; gbọrụḅọ sọ Tamụnọ kombo kombo-a. Tomḅọ ḍiḅi gbọrụ ye mẹ mie mḅọ soku ḅarịye. 8Tomḅọ nwẹnị tomḅọ si sime-ḅara mẹ ḅẹ ḍụọ mẹ ḅio ye ḍiḅi-ḍiḅi, fịye soku sakị mẹ ḅụ mḅọ soku ọkị ḅarịye fịị; tomḅọ nwẹnị Fịafịa Tẹmẹ ḅe ḍụọ mẹ ḅio ye ḍiḅi, ḍiḅi, fịye soku sakị mẹ ḅụ Fịafịa Tẹmẹ ḅe ḅụ mḅọ sime gbamaso ḍumo soku ḅa. 9Mie ḅụ, ó yee wa ịnyọ pọkọ-ta-a ḅara kẹ iḅi mịẹ; kẹ gotẹ ọkọ ḍukoarị, wa ḅara-siin-a kụma, sakị ḅo tẹ wa anị ḅẹ ye soku ḅa. 10Anie ḅụ otolo foo sakị, foo sakị wa iḅi kẹ ḅẹḅọ-ḅẹḅọ mịẹ, jen-a jen-a wamịnị na gbọrụ minini etela mẹnjịarị apụ ma.
Kunoma Ḅeri Nụnụ Ẹkwẹn Na Ḅii-ḅịḅị Na
11Ọmịnị à ḅarana kẹẹarị aị ma badara la ḅara ḍikii! 12Ó ponoma tẹ ọ́ tarị-ḅụụ sin-a, sin-a ịgbanịarị apụ ma, anie kịnị tọrụngbọ kẹ ẹrịarị ye kẹ amịna aḅụụ bomarị apụ. Anị sime-ḅara, sime-ḅara sọ, kịnị ḅarị Kịrayịsị ẹngbẹsẹ-sịn mẹ gotẹ ḅaa-ḅọkọ kẹ ịn ḍọkị ḅịa ḅara mie in gotẹ mịẹarị. 13Ini tarị-ḅụụ sin mẹ mịẹarị apụ ma sọ Oloko mẹ koko-a sakị; in ḅiiarị ọ́ tarị-ḅụụ sin, mịẹtẹ ini ó minini tẹ anị mịẹtẹ ye mẹ kẹ ḅụụ-boma ḅẹ ḅara. 14Anị sime-ḅara, sime-ḅara sọ yẹrị kịngẹ kụma, wa Nyanaḅọ Jizọsị Kịrayịsị ẹngbẹsẹ-sịn mẹ kịngẹ ḅụ à ḅụụ boma ḅa; kẹ gotẹ ọkọ ḍukoarị, ori ẹngbẹsẹ-sịn mẹ ḅụ tomikiri mẹ ḅọrọ tẹ ị̀ ḅụ fịtẹ, tẹ yẹrị sọ fịị tomikiri mẹ pịrị tẹ. 15Tomḅọ tarị-ḅụụ sin tẹ-o, mḅọ sin-a-o, gbọrụ ḅẹrẹ sọ nyana-a; mḅọ ịwọma tẹmẹ tẹ ḅọ sọ tẹ ḅẹ ye mẹ anie ye-mẹmgba. 16Ịna aḍumo ḅụ mị ọrụ mẹ ḍukamẹnjịarị apụ ma, yee dein na, ọkụrụkụrụ na, ini na sime — ini na, pịkị Tamụnọ atomi mamgba na simee!
17Gbaịn ḅụ: yee gbọrụḅọ-sọ ḅarị jen ḅụụ-fụka kẹ ị̀ pịrị ma; kẹ gotẹ ọkọ ḍukoarị, ì oju mẹ ḅẹ ịnọ akiri ma ḍie-pakamarị mịnẹ yẹrị Jizọsị omoniḅọ.
18Ị̀ amịnapụ, wa Nyanaḅọ Jizọsị Kịrayịsị ḍiki-ḅụụjịrị mẹ ọmịnị-mgba na simee. Amẹnị.
(C) The Bible Society of Nigeria