Galesiya 1
1
1Yẹrị Pọlụ, Jizọsị Kịrayịsị na Tamụnọ Ḍaḅọ ḅe tẹ fị ḅụ ọ̀ saakịma ḅọ ḅe na ḅarana sịn tẹ kẹ fịrịmẹnjịḅọ mịẹ ḅọ ḅe, tomina sịn-ḅịḅị ḅụ-a, pịkị tomi mịẹ ye ḅụ-a, mie mị ḍiri mẹ kẹẹ tẹ kẹ ọ́ fịrịmarị. 2Mịna apụ mamgba tẹ ị̀ na mịanga emi apụ ma ị̀ ḅụụ sọ tẹ ḅii-ḅịḅị kẹ Galesiya ḅẹ asọsị ma fịrịmarị.
3Yee Tamụnọ, wamịna Ḍaḅọ ḅe na, KỊNỊNYANAḄỌ Jizọsị Kịrayịsị ḅe na, ḍiki-ḅụụjịrị na, dein na, kẹ ọ́ pịrị.
4Mị sakị mẹ ḅẹ si tomikiri mẹ ḅẹ omoni ḅara-ḅio wa pakama-ḅo ẹrẹsị Jizọsị Kịrayịsị amịna ḅụụ kẹ wamịna asi ma ḅẹ agba mịẹ wa pịrịm, wamịna Tamụnọ pịkị wamịna Ḍaḅọ ḅe ḅịḅị poki ḅụ. 5Ebube sime Tamụnọ pịrị mu ḅẹẹ-sakị ḅẹẹ-sakị la! Amẹnị.
Gbọrụ Iḅi Oku Mẹ
6Àrị ó gotẹ ḅụụ-buam! Gbọrụ sakị sọ ḅọrọ-a ḅara ḅụ ọ́ Kịrayịsị, ḍiki-ḅụụjịrị ḅụ ọ́ sịn ḅọ ḅe, sịkị tẹ jen iḅi-oku daa-ọkịarị. 7Ye sụntẹ sime-ḅara ḅụ, jen “iḅi oku” ofori, kụma à gotẹ miemẹ ḍukoarị, ó pikirimarị apụ emi tẹ Kịrayịsị Iḅi Oku mẹ ḍima ḅẹ ḍọkịarị. 8Kụma anị ḅọrọ wamịnị-o, So-ḅio koro ḅo enjẹlị-o, tẹ wa ḍuko ọ́ pịrị tẹ iḅi-oku mẹ ḅụ kịrị wararị ye ḍuko ọ́ pịrịarị ḅẹḅẹ, ẹlị ḅio sọ ḅẹrẹ-ḅarasii sime mḅọ pịrị ḅa! 9Jen sakị wa ḍuko ọ́ pịrị tẹ, tẹ mịọkụ à pịkị anị ḍukoarị: mịnẹ ḅẹḅọ-ḅẹḅọ tẹ ọ́ daa-ọkị tẹ ye mẹ ḅụ kịrị wararị iḅi-oku ḍuko ọ́ pịrịarị ḅọ mẹ ẹlị ḅio sọ ḅẹrẹ-ḅarasii sime mḅọ pịrị ḅa!
10Miemẹ à kẹ tomina tọrọkọ iḅi ọkị ḅẹ ḍọkịarị ye kịkarị ḅoto ọmịna ḅụụ? Gbala-gbala ọkọ-a! Tamụnọ ḅụụ-ḅẹlẹ ḅẹ ye mie à ḍọkịarị! À tomi kẹ ị̀ kẹ iḅi ḅọ sịn ḅẹ ye ḍọkịarị aro? À nwẹnị ọkọ sime ye mịẹ ḅẹ ḍọkịarị ḅẹḅẹ, anie à ḅarị Kịrayịsị fịrịmẹnjịḅọ sọ-a.
Pọlụ Ḅọrọtẹ Fịrịmẹnjịḅọ Sọ Ḅara
11Ị̀ amịnapụ, yee à ḍuko ọ́ pịrị, mịnẹ à ḍukoarị iḅi-oku mẹ tomina ḅara ḅo-a. 12À gbọrụ tomḅọ ḅara ḅụ sọ anị daa-ọkịa, gbọrụḅọ-sọ pịkị anị kẹ ì toluma-a. Jizọsị Kịrayịsị mie ḅarana anị mịẹfinji ị̀ pịrị ye.
13 #
Fịr 8.3; 22.4,5; 26.9-11 Ịn paa ḍuko ọ́ pịrị tẹ, à tẹmẹ-la ḅara kẹ Juu-ḅẹ-apụ Tamụnọ nimi ḅara mẹ ḍukamẹnjịarị sakị à ḍumo kọn, kọn ḅara, arị ọkụrụkụrụ ofori ḅara kẹ ḅaa-ḅọkọ kẹ Tamụnọ sọsị mẹ ḍọkị ḅara, tẹ arị inetẹ ye, inetẹ ye mịẹ tẹ anị fama ḅẹ tọn ḅara. 14#Fịr 22.3À Juu-ḅẹ-apụ Tamụnọ nimi ḅara mẹ ḅụ sime sakị, ì pembema Juu-ḅẹ-apụ tẹ ị̀ ḅara ḅẹ apụ ḅẹ tọnwa-apụ ḅụ yẹrị tọrọkọ, anie à pịkị wamịna atẹngịapụ ma ama-anganga-ḅara ma ọlọ kụrọma ịn nẹngị fama ḅara.
15 #
Fịr 9.3-6; 22.6-10; 26.13-18 Kụma amụ ini ì iyi-a kụra-ḅio Tamụnọ ị̀ sẹlẹ-ọkịm, ó ḍiki-ḅụụjịrị ḅụ, tẹ ị̀ sịnm àrị ọ̀ fịrị mẹ mẹnjịị. Tẹ ọ̀ tọn-pẹlẹ 16tẹ ọ̀ Tụḅọ ḅe kẹ ì ḍie sakị, mịnẹ à mu ó gboloma Iḅi Oku mẹ ḍuko Ja asịẹ ḅẹ apụ pịrị ḅẹẹ sakị, à mu ḅẹrẹ kẹ gbela ḅọ ofori; 17Jeruselemu ḅụ tarị fịrị mẹ mẹnjị sime apụ ma kịngẹ sọ à mu ini ẹrị-a. Anie nakara à da-da Arebịya mu tẹ pịkị anịjụ ḅọrọ Damasịkọsị mum. 18#Fịr 9.26-30Anịtẹso, tẹra kụra ḅọrọ tẹrẹmẹ à pịkịma Jeruselemu mu, tẹ Pita ḅịḅị ye naa tẹ, ngei ḍin fa jei kẹ ori na simem. 19KỊNỊNYANAḄỌ ḅe iyimbere Jemusị sikima tẹ, à jen fịrịmẹnjịḅọ ẹrị-a anịanga.
20À kẹẹarị ye mẹ karakara ye. Tamụnọ nimi wararị arị iruo ye ḍuko-a.
21Anịtẹso, à Siriya na, Silisiya na ibe ma ḅẹ ja ayọ mum. 22Anịsakị mẹ ḅụ Judiya ḅẹ asọsị ma ḅẹ apụ ma amụ tọrụngbọ kẹ ẹrị ḅara kẹ ì nimi-a. 23Ja atomi ḍukoarị ye kịngẹ mie in nimi ye: “Ḅaa-ḅọkọ kẹ wa ḍọkị sime ḅọ ḅe, ḅo mịọkụ ọ̀ fama ḅẹ ḍọkị sime mininiye mẹ ḍuko kịnị pịrịarị!” 24Mie ḅụ ịn nwẹnị ì gotẹ Tamụnọ tokini.
(C) The Bible Society of Nigeria