Ẹfisọsị 5
5
Bele Mẹ Ḅio Anga
1Ọmịnị Tamụnọ iḅi awọmẹ ḅẹ sakị, ọ́ ḅụụkụrọma tẹ ọ̀ kịka nyanam. 2#Pks 29.18; Dev 40.6Ḅẹlẹma ḅẹrẹtọn ọmịna ḍumo pịrị, anie Kịrayịsị kẹ wa ḅẹlẹma tẹ wa gotẹ ò ḍumo saakị Tamụnọ pịrị ḅara mẹ, anị nwẹnị kụnụarị agba sọ tẹ Tamụnọ ḅioḅẹlẹma.
3Ọmịnị Tamụnọ atomi ḅẹẹ sakị, anị kura-a mịnẹ owiḅọ na ẹrẹḅọ na kura-a ḅara kẹ gboloma mịẹye, anịanịa ḅụụ sima mịẹye, anịanịa opu pọkọ-ḅẹngbọ sụa ḍumo kọn, anị ẹrẹ kịngẹ sọ gotẹ na-iḅi-a ọmịna ogboku. 4Ọ́ pịkị kọn na-iḅi-a ẹkwẹn na, Tamụnọ gboloma ye mịẹ-sima ẹkwẹn na, tii tii ḅẹ ẹkwẹn na, kẹ ḅịḅị-ḅio sụa kọn ma. Anie nakara ọmịnị ịmịẹtẹ kẹ Tamụnọ ḅẹẹ. 5Ó nimi ḅa mịnẹ owiapụ na ereme na gboloma na-iḅi-a ḅara kẹ gbolomarị apụ, anie ḅụụ sima ḍumo kọn-arị apụ, anịanịa opu pọkọ-ḅẹngbọ sụa apụ, gbọrụ sakị sọ ofori, Tamụnọ na Kịrayịsị na Ama-da tẹ ḅẹrẹtọn-arị anga mẹ ḅụ kiri nyana.
6Ọ́ ḍụkụ tẹ gbọrụḅọ-sọ oḅori ẹkwẹn kẹ ọmịna sịḅịḅio pikirima ma; mịna gbọrụ aị ma gotẹ Tamụnọ ịganị ḅo ọ̀ ḅịḅị poki-a apụ ma ọgọnọ gbana ḅa. 7Ọkọẹrẹsị ọmịnị ọkọ sime apụ ma na gbọrụ mịẹye ḅụ sọ gboloma ma. 8Ọmịnị ḅioju sọ kanakana ḅio sime simem, kụma mịọkụ ó ḅo KỊNỊNYANAḄỌ ḅe atomi sọ tẹ mẹ, ó bele ḅio emi. Ọkọẹrẹsị ó sime bele pịrị apụ kịka ḍumo kọn, 9kẹ gotẹ ọkọ ḍukoarị, bele anie iḅiọkụ iḅi ye mịẹ ḅara goyegoye na, karakara mịẹ na, karakara na pakama-ḅoarị. 10Ọ́ ḅụụkụrọma tẹ KỊNỊNYANAḄỌ ḅe ḅụụ-ḅẹlẹarị aị ḍawọọ. 11Gbọrụ ḅọkọ ḅụ sọ tomi mịẹarị papaa amịẹaị ḅụ ọ́ ḅara kẹ suu ma, anie sime kanakana pịrị amịẹaị ma. Anie nakara ọmịnị arị kẹ ḅo bele lamaa. 12(Anị kpọma ḅụụ-jịrịma ye sọ ḅa, ḅịḅị; kịngẹ kẹ tomi ḅọị tẹ mịẹarị aị ma go sọ). 13Tẹ ye mamgba ḅo bele la sakị mie arị sụntẹ sime-ḅara mẹ ḅụụ kẹ banabana ḅara kẹ kịnị ḍie ḅarịye; 14kẹ gotẹ ọkọ ḍukoarị, ḅẹẹ ye, ḅẹẹ ye, ịn banabana ḅara kẹ anị mịẹfinji tẹ ḅẹḅẹ anị bele sọ tẹ. Anie in gotẹ ḅẹẹ ye,
“Saakịị, mono-ḅọ,
tẹ fịị ḅụ saakịị,
anịsakị Kịrayịsị ḅịya ị́ sarama ḅa.”
15Ọkọẹrẹsị, ọmịnị ó ḍumo kọn-arị ḅara ẹbịị. Ó gberie-sọ nimi-a apụ ḅara kẹ ḍumo kọn ma, kụma ye-nimiapụ ḅara. 16#Kọl 4.5Mị sakị mẹ iḅi sakị-a ẹrẹsị, ḅo ọmịna ḅara la tẹ ọ́ kẹ ye mịẹ ḅẹ sakị goyegoye, ọ́ kẹ iḅiye mịẹ. 17Ọkọẹrẹsị ọmịnị oḅori atomi ḅara sime ma, kụma ọ́ ḅụụkụrọma tẹ KỊNỊNYANAḄỌ ḅe ḅiiarị ọ́ mịẹ ḅẹ ye mẹ ḍọkị nimii.
18Ọmịnị iru ḅụụ tọrụ-ḅaama ma, ó guluguluma ngẹrị mie anị mịẹ ḅarịye; anie nakara, yee Tẹmẹ ḅe ọmịna ḅụụ ḅio sọ ḅin. 19#Kọl 3.16,17Ọ́ Tamụnọ boma kịrị-kịrị anume ḅẹ ẹkwẹn kẹ ḅịḅị ḅẹlẹma, tẹ pịkị su KỊNỊNYANAḄỌ ḅe bomaa, ọmịna aḅioḅẹngbọ la tokini ḅụ. 20Wa Nyanaḅọ Jizọsị Kịrayịsị ẹrẹ ḅụ, sakị mamgba ọ́ ḅẹẹye-ḅẹẹye gotẹ ịmịẹtẹ kẹ Tamụnọ Ḍaḅọ ḅe ḅẹẹ.
Tapụ Na Diapụ Na
21Ọ́ Kịrayịsị mangịmarị gotẹ, ọ́ ḅụụ-iderima jụmọ-jụmọ pịrịị. 22#Kọl 3.18; 1 Pit 3.1Tapụ, gbala ọ́ mịẹ KỊNỊNYANAḄỌ ḅe pịrịarị pembema ḅara, ọ́ ḅụụ-iderima ọmịna diapụ pịrịị. 23Kẹ gotẹ ọkọ ḍukoarị, diḅọ ḅe anie taḅọ ma sịḅịdaḅọ, Kịrayịsị sọsị mẹ sịḅịdaḅọ ḅara; anịsakị Kịrayịsị ḅioju anie pịkị sọsị mẹẹ, tẹ ori oju mẹ, anie sọsị mẹ ḅẹ Ḅọrọmaḅọ. 24Ọkọẹrẹsị tapụ, ọ́ gbọrsịḅị ḅụụ-iderima ọmịna diapụ pịrị famaa, sọsị mẹ sọ ḅụụ-iderima Kịrayịsị pịrịarị gbọrụ ḅara mẹ.
25 #
Kọl 3.19; 1 Pit 3.7 Diapụ, ọ́ Kịrayịsị kẹ sọsị mẹ ḅẹlẹma tẹ fịị anị pịrị gbọrụ ḅara mẹ kẹ ọmịna tapụ ḅẹlẹmaa. 26Ò miemẹ mịẹ tẹ sọsị mẹ wẹrị fịafịama Tamụnọ pịrị ḅẹm, ori ẹkwẹn ḅụ, ọ̀ tarị minji kẹ anị sịkịrị fịafịama tẹso, 27mịẹtẹ ori anị iḅi ḅụ sọsị mẹ saakị ọ̀ ḅụụ pịrị ḅẹ ḅara — kpaịntẹ, ḅụụ ḅụ ḅẹẹ-ḅẹẹye ofori, kpọịnkoro-ịlọlị sọ, tọrụ-pụrụkụ sọ, anịanịa jen tẹ anị ḅụ kara-a gberie-sọ ofori ḅara ḅụ. 28Owiapụ ini ịna oju-kiri ḅẹlẹmarị gbọrụ ḅara mẹ kẹ ịna tapụ ḅẹlẹma na-iḅim. Amịna taḅọ ḅẹlẹmarị owiḅọ amịna ḅụụ ḅẹlẹmarị. 29(Amịna oju-kiri ḍiki-ḅioḅu-ḅu ḅọ ofori. Anie nakara, mḅọ fịye kẹ anị pịrị fị tẹ pịkị anị kaịarị, Kịrayịsị kẹ sọsị mẹ mịẹarị gbọrụ ḅara mẹ; 30kẹ gotẹ ọkọ ḍukoarị, wamịnị anie ori oju mẹ ḅẹ pakịrị-pakịrị ma). 31#Suk 2.24Anie paa Fịafịa Ḍiri mẹ ḍukoarị ye mẹ, “Miemẹ ẹrẹsị, owiḅọ ọ̀ ḍa na ò iyingi na koroma-so tẹ ọ̀ ta na gbọrụ ḅụ sime tẹ ini maa apụ ḅo gberie mịẹ ḅa.” 32Mị ẹkwẹn mẹ tẹ Fịafịa Ḍiri mẹ kọn ye mẹ, kikima wararị gbọrụ karakara anị ḅio emi, anie, yẹrị kẹ anị ẹrị ḅara kụma, Kịrayịsị na sọsị mẹ na mie anị fiearị. 33Kụma anị pịkị sime ọmịnị sọ pịrịm: ḅẹẹ diḅọ goḅọ-goḅọ amịna ḅụụ ḅẹlẹma ḅara kẹ mḅọ taḅọ ḅẹlẹmaa; anịsakị ḅẹẹ taḅọ goḅọ-goḅọ pịkị mḅọ diḅọ kụn.
(C) The Bible Society of Nigeria