Danẹlị 12
12
Kunoma Mẹ Ḅo Ḅa Tẹ Fịtẹ-apụ Ma Saakị Ḅa
1 #
Mịẹ 12.7;
Mat 24.21; Mak 13.19; Mịẹ 7.14; 12.7 Pịna-pịna ferefere kapa sụa enjẹlị ḅe ḅẹẹm, “Anị sakị mẹ ḅụ opu enjẹlị Mayịkẹlị ḅe, ị́ atomi ḍụarịḅọ ḅe tolu-sịẹ ḅa. Anịtẹso kpọma ḅụụ-fụka sakị ḅo ḅa, si tẹịn ye sịẹ-sịẹ ma tarị paka kụra ḅio. Anị sakị mẹ ḅụ, ị́ atomi mamgba tẹ ẹrẹ Tamụnọ ḍiri ḅio kẹẹ wararị apụ ma ḅọrọma ḅa. 2#Ayị 26.19; Mat 25.46; Jọn 5.29Ini ḅẹ tọnwa-apụ tẹ fịị tẹrẹmẹ sakị mẹ laa apụ fị-ḅụ-saakị tẹ ḍumo ḅa: jen-apụ sime gbamaso ḍumo tọrụ-ḅẹlẹ nyana ḅa, tẹ jen-apụ sime gbamaso tọrụ-tuu ḅụụ-fụka da ḅa. 3Ye-nimi sịḅịdapụ ma So-tọrụ ḅẹ bele kẹ ḅịya ḅa. Tẹ ini tẹ tọnwa-apụ toluma tẹ in kuraye mịẹ apụ ma lolia ma kịka tẹ ḅịya ḅẹẹ-sakị ḅẹẹ-sakị la ḅa.”
4 #
Mịẹ 22.10
Ori ị̀ ḅẹẹm, “Tẹ mịọkụ, Danẹlị, ḍiri mẹ gbaịn tẹ ye-oḅoloye kẹ anị oḅolo wẹrị nwenii tomikiri mẹ ḅẹ kunoma la. Mịọkụ mẹ ḅụ tọnwa-apụ ịna ịnyọ fama tẹ ḅụụkụrọma tẹ mịọkụ pakarị ye mẹ fiearị nimi ḅẹ ḍọkị ḅa.”
5Anịtẹso à maa owiapụ ẹrịm ịn tọrụ akaka sịẹsime wararị, gbọrụḅọ gbọrụ akaka gbọrụ akaka. 6Ini ḅẹ gbọrụḅọ tọrụ mẹ ọgọnọ-jụ ḅele tẹ sịẹsime enjẹlị ḅe gbelam, “Ndẹẹ anị ala mu la ḅẹ sakị, nwenii ma ḅụụ-gbiripuma paka aị ma ḅo kunoma?”
7 #
Mịẹ 10.5;
Mịẹ 12.14
Enjẹlị ḅe nwẹnị ori maa aḅara saakị so da tẹ tẹmẹ-la ḅara kẹ Sime-gbamaso Tamụnọ ḅe ẹrẹ ḅụ ye minini. Ò ḍukoarị tẹ à naam, “Tẹra akụra na pakịrị na mie anị la ḅarịye. Tamụnọ atomi ma ḅaa ḅẹ ḍọkị mẹ kunoma ḅẹ sakị, mịna aị mamgba paka fama ḅa.”
8Ò ḍuko ye à naam kụma anị fiearị ye à naa-a. Mie ḅụ à gbelam, “Kụma, ị̀ nyanaḅọ, ndẹẹ arịmgba ḅo kunoma ḅẹ ḅara?”
9Ọ̀ pakịrịm, “Danẹlị, mịọkụ kẹ soo, kẹ gotẹ ọkọ ḅẹẹarị, mịna ẹkwẹn ma kẹ ḅọị tẹ kikima ḅẹ aị, nwenii kunoma mẹ ḅo. 10#Mịẹ 22.11Ịn tọnwa-apụ mịẹ kpaịnma ḅa. Si-sịḅịḅio-sụa apụ anị fiearị ye naa ḅịa kụma in si-sịḅịḅio-sụa tọrọkọ-tọrọkọ mu ḅa; ini tẹ ye nimi wararị apụ ma kịngẹ anị fiearị ye naa ḅa.”
11 #
Dan 9.27; 11.31; Mat 24.15; Mak 13.14 Ini ene-ene ḅẹ agba ma dasịẹma ḅẹ sakị mẹ ḅụ ọkị mu, anie “Ḅalafama Sịḅị-jịrịmaye Mẹ” ḅụ ọkị mu, ḍin tẹra ẹndẹ inia asi finji na oyia aḍin na ḅọrọ ḅa. 12Ḅioḅẹngbọ kẹ ḅụụ ḅụ gbana na-iḅi ḅara sime nwenii ḍin tẹra ẹndẹ sonio asi finji na jei aḍin na ḅọrọ ḅarị apụ ma anie ḅioḅẹlẹ tẹ apụ!
13“Tẹ ị́yẹrị, Danẹlị, ḅioḅẹngbọ kẹ ḅụụ ḅụ gbana na-iḅi ḅara sime mu kunoma mẹ la. Anịtẹso ị́ fịị ḅa, kụma ị́ saakị tẹ ị́ gbẹẹ-ye nyana ḅa, sakị kunoma mẹ ḅụ.”
(C) The Bible Society of Nigeria