Danẹlị 10
10
Danẹlị Tayịgirisi Tọrụ Akaka Ịkịan Ẹrịm
1Sayịrọsị Pasịya da tẹ tẹrẹị karama kụra mẹ ḅụ oku ḅo Danẹlị, ịn kẹ Bẹlịsaza sọ sịn-sịn ḅọ, ḅe pịrịm. Oku mẹ karakara ye kụma ḅụụ-fụka ḅụram anị fie ye naa mẹ. Ịkịan ḅụ mie ini anị fie ye ḍuko-finji ọ̀ pịrị ye.
2Anị sakị ḅụ, à tẹra wiki kẹ kururu simem. 3À gbọrụ iḅi fịye sọ fị-a, anịanịa nama pẹị, iru ḅuu, anịanịa ị̀ sịḅị-dala, nwenii tẹra wiki ma ḅọrọm.
4Tarị kụra mẹ ḅẹ tarị akalụ mẹ ḅụ si inia aḍin finji karama eneḅaka mẹ ḅụ, à Tayịgirisi Opu Tọrụ mẹ akaka ḅụ sịẹsimem. 5#Mịẹ 1.13-15; 2.18; 19.12À tọrụ saakị ḍiki tẹ ferefere pịna-pịna kapa sụa tẹ iḅi golu kẹ ḅiri pono ḅọ ẹrịm. 6Ori oju juwẹlị nwẹn-sịn ye mẹ ḅịya ḅara ḅịyam. Ọ̀ tọrụ so ḅalapụ tẹ kọrị ḅara ḅịyam, tẹ ori atọrụngbọ nwẹnị fịnị kịka tẹ kọrị paka. Ori aḅara kọngọ na ori aḅụọ na sịkịrị vọịmatẹ ojo ḅịya ḅara ḅịyam, tẹ ọ̀ pọkọ fie ḅara tomi ogbo woko-woko ḅara kịkam.
7Ì sikima jụmọ ịkịan mẹ ẹrị-a. Ị̀ na sime owiapụ ma ịn gberie-sọ ẹrị-a, kụma ịn ịna tẹmẹ-naịn-naịn tẹ ịn mangị ḅọịm. 8In so tẹ yẹrị ngẹrị kọnm, kweinma mịẹ opu ḅụụ-gbiripuma ịkịan mẹ ḍikiarị. À ḅarị gbọrụ ịnyọ sọ nyana-a, tẹ ị̀ tọrụkuḅu ḍima la ḅara ḅụ gbọrụḅọ-sọ inetẹ ị̀ lekiri ḅara sime-a. 9Àrị ọ̀ pọkọ naa sakị à naịn-ḅọrọ tẹ ḅịkị kiri koro tẹ tọrụ kẹ kiri iḅo tẹ koro simem. 10Anịtẹso gbọrụ ḅara ị̀ ọlọ tẹ ị̀ saakị tẹ ị̀ aḅara kẹ kiri pono tẹ kparakịm. Ì oju paa sẹkịm.
11Enjẹlị ḅe ị̀ ḅẹẹm, “Danẹlị, Tamụnọ ị̀ ḅẹlẹmarị. Saakị sịẹ tẹ iḅiọkụ à ḍuko ḅẹ-yearị ye pokii. Ini ị̀ kẹ ị́ fịrịma tẹẹ.” Ò miemẹ ḍuko sakị, à saakị sịẹm, paa oju sẹkịarị ḅara ḅụ.
12Anịtẹso ọ̀ nwẹnị ḅẹ, “Danẹlị, ḅalafa ma. Tamụnọ ị́ atẹkẹ naa tẹ tarị ene mẹ tẹ ị́ tọn-pẹlẹ tẹ ị́ ị́ ḅụụ-iderima tẹ yefieye nyana ḅẹ-ḅii kụra ḅio. Àrị ị́ tẹkẹ pakịrị ḅẹ ḅo tẹ. 13#Mịẹ 12.7Pasịya ama-da yọ ḍikiḍikiarị enjẹlị ḅe si gbọrụ ḍin finji kẹ ị̀ ma tụḅụrụm. Anịtẹso Mayịkẹlị, sịḅịda enjẹlị ma ḅẹ gbọrụḅọ ḅarasụa ị̀ pịrị ḅẹ ḅom, anie Pasịya ḅụ ini ị̀ kẹ koroma so tẹ ẹrẹsị. 14À ḅo tẹ mịẹ tẹ ị́ tọrọkọ-jụ ḅụ ị́ ị́ atomi ma ḅụụ paka ḅẹ ye fiearị ye naa ḅẹ ḅara. Mie mẹ anie tọrọkọ-jụ paka ḅẹ ye gboloma ịkịan.”
15Ò miemẹ ḍuko sakị, à bio-bioma kiri mẹ ḍikim, ḅịḅị fie-a ḅara. 16Anịtẹso enjẹlị ḅe, anie ḍiki tọrụ ḅụ tomḅọ kịkaḅọ ḅe, ọ̀ ḅara sụn-pakama tẹ kẹ ị̀ ḅịḅị apakịrị lamam. À nwẹnị ọ̀ ḅẹẹ, “Ị̀ nyanaḅọ, Ịkịan mẹ ị̀ mịẹ tẹ ịnyọ ị̀ ḅụụ fa lama tẹ arị inetẹ oju sẹkị dasịẹma-a. 17Amịna nyanaḅọ tọrọkọ sịẹ wararị mie à kịkarị. Ndẹẹ arị inetẹ ẹkwẹn ị́ pịrị ḅẹ ḅara? À ḅarị ịnyọ nyana anịanịa sara pakama ḅẹ ọwụ tẹ ị̀ ḅụụ ḅio kọn ye.”
18Ọ̀ nwẹnị pịkị jen gbọrụ sakị kẹ ị̀ ọlọ, tẹ à nwẹnị kụrọ tarị ḅara nẹngị. 19Ori mẹẹ, “Tamụnọ ị̀ ḅẹlẹmarị, anie ḅụ ḍụkụ tẹ gberie-sọ ị́ ḅụụ-ḅalaḅalama ma anịanịa ị́ tẹmẹ-naịn-naịnma.”
Ò miemẹ ḍuko sakị, ị̀ ḅụụ-ḅio à nimi tẹ mịnẹ à pịkị osi ḅara nẹngị tẹẹ ḅẹẹm, Ị̀ nyanaḅọ, í ḍuko ḅẹ-ḅiiarị ye mẹ ḍuko ị̀ pịrịị. Ị́ ị̀ mịẹ tẹ ị̀ ḅụụ iḅi tarị ḅara nẹngị tẹẹ.
20Mie ḅụ ọ̀ ḅẹẹm, “À gotẹ ị́ dama-ḅo ye Í nimi? Ala-a à pịkịma mu owu kẹ Pasịya ḍikiḍikiarị enjẹlị ḅe na sọọ ḅa, tẹ à so sakị Girisi ḍikiḍikiarị enjẹlị ḅe ḅo ḅa. 21Kụma tarị yee, à karakara Ḍiri mẹ ḅio kẹẹ wararị ye mẹ ḍuko ị́ pịrị ḅa. Gbọrụḅọ sọ ḅarasụa ị̀ pịrị-a à nwẹn sọarị owu mẹ ḅụ Mayịkẹlị sikima tẹ, Izirẹlị ḍikiḍikiarị enjẹlị ḅe.”
(C) The Bible Society of Nigeria