Fịrịmẹnjịapụ Suku-saakị Ẹkwẹn
Suku-saakị Ẹkwẹn
Fịrịmẹnjịapụ ma akọrịnama ma anie Luku Iḅi Oku mẹ ḅụ ọkị tọrọkọ muarị ḍiri. Anị ḅụ ḅẹrẹ tẹịn ye anie tarị Jizọsị ḍukamẹnjịapụ ma, Fịafịa Tẹmẹ ḅe in dogi mẹnjị ḅara ḅụ, wẹrịtẹ ò gboloma Iḅi Oku mẹ ḍuko wasama ḅara “Jeruselemu ḅio, Judiya mamgba ḅio na Sameriya na ḅụ ọkị mu tomikiri mẹ ḅẹ akunoma ma la”. Anị anie Kịrayịsị ḍukamẹnjị mẹ ḅẹ ịlụkụ mẹ, anị wẹrị tẹ Juu-ḅẹ-apụ ma ogboku saakị ḅara, tẹ mẹnjị mu bebe tomikiri mẹ ḅẹ mininiye sọ ḅara.
Ḍiri mẹ kẹẹ ḅọ ḅe ḅụụ ḅẹrẹ lama ye anie sin mịẹtẹ gooarị apụ ma nimi mịnẹ Kịrayịsị ḍukamẹnjịapụ apụ si kẹ Romu Tomikiri mẹ mịẹ ḅẹ apụ-a, anịsakị Kịrayịsị ḍukamẹnjịapụ mininiye mẹ anie Juu-ḅẹ-apụ Tamụnọ nimi ḅara mẹ gotẹ paka ye mẹ mịẹ ye.
Kọrịnama ḍiri mẹ tẹra apakịrị ḍie wararị, tẹ nwẹnị Jizọsị gboloma Iḅi Oku mẹ wasama ma muarị ye mẹ ḍie pakamarị, ini anị ḍuko wasama tẹ pịkị sọsị mẹ pakamarị ḅara: 1. Tarị pakịrị mẹ, Jeruselemu ḅụ Kịrayịsị ḍukamẹnjịapụ mẹnjị mẹ Suku-saakị mẹ, Jizọsị so iwo mẹ ḍuka ma-ḅom; 2. Maaịn karama pakịrị mẹ, anị wasama mu Palẹsitini ḅụ pakịrị, pakịrị la ḅara tẹ 3. Tẹrẹị karama pakịrị mẹ, anị paa wasama ma mu ḅara, ọkị mu Mẹdịterenanị tomikiri mẹ la, mu pịkị Romu sọ la.
Gbọrụ kụrọ nyanatẹ ye tẹ Kọrịnama mẹ ḅio simearị ye anie Fịafịa Tẹmẹ ḅe kọrị ye, anie Pẹnitikọsị eneḅaka ḅụ kụrọ na ḅo Jizọsị minini apụ ma ọgọnọ gbana ḅọ ḅe Jeruselemu ḅụ, tẹ paa pịkị sọsị mẹ na anị ḅẹ sịḅịdapụ na datụkụma tẹ ịnyọ kẹ ịn pịrịarị ḍiri ḅio ḍukoarị aị ma la sakị, la sakị. Tarị-pịrịpịrị-ḅụ Kịrayịsị ḍukamẹnjị oku mẹ ịn kpụlụma anị ḍuko wararị Tamụnọ ẹkwẹn ma tẹ ịn kọn aị ḅio, tẹ paka tẹ Kọrịnama mẹ ḅio ḍuko aị ma oku mẹ kụrọ ḍie-pakamarị minini apụ ma aḍumo ḅụ, sọsị mẹ ḅẹ gboloma ḍumo ḅụ.
Ḍiri Mẹ Ḅio Simearị-aị
Ḅụụ-tẹlẹma ḅẹrẹ-kiri sime apụ kọrịnama pịrị mẹ 1.1-26
a. Jizọsị kunoma tọn pịrị ye na minini pịrị ye na 1.1-14
b. Judasị kiri ọkị ḅọ 1.15-26
Jeruselemu ḅụ ḅẹrẹ-kiri sime apụ kọrị kọrịnama 2.1—8.3
Judiya na Sameriya na ḅụ kọrị kọrịnama 8.4—12.25
Pọlụ mẹnjị fịrị mẹ 13.1—28.31
a. Fịrịma pakama tarị mẹnjị mẹ 13.1—14.28
b. Jeruselemu ḅẹ kobiri mẹ 15.1-35
d. Fịrịma pakama maaịn karama mẹnjị mẹ 15.36—18.22
e. Fịrịma pakama tẹrẹị karama mẹnjị mẹ 18.23—21.16
e. Pọlụ ikoliḅọ ḅara kẹ Jeruselemu na, Sizariya na, Romu na ḅio simem 21.17—28.31
Valgt i Øjeblikket:
Fịrịmẹnjịapụ Suku-saakị Ẹkwẹn: KBTP
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
(C) The Bible Society of Nigeria