2 Timoti 3
3
Kunoma Ene Ma
1Kẹ ḅiokoroma mịnẹ kunoma ene ma ḅụ ye ḅụụ-fụkama lama ḅa. 2Tomi ịna ḅụụ ngẹrị bala ḅa, fị-ye fị-ye pọkọ-ta-a, ḅụụ-boma na ḅụụ-gelema na; ịn ja apụ mịẹ-sima ma ḅọrọ ḅa, ini ịna ḍapụ-na-iyingiapụ-na ḅịḅị poki ḅịa, ịmịẹtẹ ḅẹẹ ḍịn-a, Tamụnọ etela kẹ ye-sịn-a; 3ini iḅi ḅara kẹ kịnị na mịẹ ḅịa, ọkụrụkụrụ nyana-a, kịnị wori guluguluma, kụrọ kụrọ-ḅara kẹ kịnị na mịẹ tẹ ḅalafama ḅara sime; ini iḅi nwẹn-sịn ye ḍiki-ḅioḅu ḅa; 4ini mbasị ḅa, gbala-gbala ḅụụ da sịẹma-a ḅara kẹ ye mịẹ, tẹ opu amịẹaị gbọrsịḅị ịna sịḅị foinma ḅa; ịn Tamụnọ ḅẹlẹma ḅẹ nakara tomikiri ḅẹ tọrụ-ḅẹlẹ mịẹ ịn ḅẹlẹma ḅarịye; 5Tamụnọ etela mẹ ḅụ tọrụngbọ ẹrịarị pakịrị anga mẹ mie ini ọlọ-sịẹma ḅarịye, kụma nwẹnị anị ḅẹ karakara kụrọ mẹ sịkị ḅa. Ọkọ sime atomi ma ḅụ ị́ ḅụụ wẹrị ḅelemaa. 6Ini ḅẹ ja apụ kịnị awarị sọ, sọ tẹ tẹmẹ lọkọarị ereme kun, kun tẹ ḅẹrẹtọn ịn pịrịarị, anie elemu amịna mịẹ tẹ asi ḅẹ ḅẹrẹ-ḅarasii ḅẹ kuroma ponoma tẹ kịrị-kịrị akuroma fọnọ mẹnjịarị apụ, 7ereme tẹ sakị mamgba ḅụụ kụrọmatẹ ye ḍawọ ḅẹ ḍọkịarị apụ, kụma inetẹ karakara mẹ ḍawọ ḅo-a apụ. 8#Pks 7.11Janẹsị na Jamụbẹrẹsị na kẹ Mozizi na tụḅụrụ ḅara mie mịna atomi ma kẹ karakara mẹ na tụḅụrụarị ḅara — ḅioḅẹngbọ-pụụntẹ minini mẹ ḅụ ḅịkị tẹ apụ. 9Kụma in mu la ḅaka ḅẹ anga ofori, kẹ gotẹ ọkọ ḍukoarị, ịna ḅụ ọrụḅọ-ọrụḅọ ẹrị ḅa mịnẹ ịn oḅori-sọ lama tẹ. Anị gbọrụ ḅara mẹ mie anị paka Janẹsị na Jamụbẹrẹsị na pịrị ḅara.
Mịẹ Ḅẹ Tẹ Ḍuko Kunoma Aị
10Ị́yẹrị kụma, í ì tolumaye na ì ḍumo kọn ḅara na, ḍumo ḅụ à kẹ ḅioḅẹngbọ ḅụ sụa tẹ ḅẹẹye-ḅẹẹye mịẹarị ye na, ị́ nwẹn ḍukamẹnjị tẹ; ị́ pịkị kẹ elekima sụa tẹ, ì minini na, ì ye-inema na, ị̀ ḅẹlẹma na, arị akụye inema alamarị ḅara na, 11#Fịr 13.14-52; Fịr 14.1-7; Fịr 14.8-20tomi ḅaa-aḅọkọ kẹ ị̀ ḍọkị ḅara na, ị̀ atọrụsiẹrị na. Anịtọkụ ḅụ na, Ikonịyọmụ ḅụ na, Lisitara na ḅụ, ị̀ ḅụụ paka aị mamgba í nimi wararị, ḅalafama ḅaa-ḅọkọ ḅio arị inema aị la ḅara! Kụma KỊNỊNYANAḄỌ ḅe arịmgba ḅio ị̀ pụkọ-pakamaḅom. 12Kịrayịsị Jizọsị na gbọrụ ḅụ sime tẹ Tamụnọ kịka ḍumo ḅiiarị ḅọ, ḅiiarị ḅọ ịn ḅaa-ḅọkọ kẹ mḅọ ḍọkị ḅa; 13si-mịẹapụ na, ḅụụ kẹ in sime-a ḅara elekimarị apụ na, in sii tọrọkọ-tọrọkọ mu ḅa, ini oḅori kẹ ja apụ sịn-arị ḅara mie ini ma sọ ja apụ oḅori kẹ ịn sịn-arị ḅara. 14Ị́yẹrị kịngẹ kụma, ịn kẹ í toluma tẹ akarakara ma ḅụ sime tọrọkọ mu, tẹ minini kụrọmaa. Ye mẹ kẹ í toluma apụ ma í in nimi wararị, 15tẹ pịkị kẹ ḅiokoroma mịnẹ ị́ kala-sakị kụra-ḅio, ị́ Fịafịa Ḍiri mẹ ḅẹ ẹkwẹn ma nimi wararị, anie inetẹ nimi kẹ ị́ kẹ mu ḅọrọma la ḅẹ ye mẹ, Kịrayịsị Jizọsị ḅụ minini nyana ḅụ.
16Fịafịa Ḍiri mẹmgba Tamụnọ tomina tẹmẹ jike tẹ ịn kẹẹm, tẹ anị kẹ karakara mẹ toluma na, kura-aye ḍiki-ịganị na, mịẹkọn aị tẹlẹma na, kura ḍumo kọn ḅụ kịnị mịẹ ḅẹ ye ḍuko na ḅụ anị mịẹye ḅụ sọm, 17anie ḅụ Tamụnọ fịrịmẹnjịarị ḅọ mẹ ḅo gbọrsịḅị tẹlẹmatẹ laa tẹ ḅọ sọ ḅẹ ḅara, iḅi mịẹye goyegoye ḅụ.
(C) The Bible Society of Nigeria