2 Amadapụ 4
4
Ịlayịsa Ḅarasụa Gbọrụ Diḅọ-fịtẹ-ẹrẹḅọ Pịrịm
1Ịkịankoroapụ ma ogbo ḅẹ gbọrụ owiḅọ ta nwẹnị owu Ịlayịsa pịrị, “Ị́ fịrịmẹnjịḅọ ì di ḅe ọ̀ fịị tẹẹ; í nimi wararị mịnẹ ị́ fịrịmẹnjịḅọ ḅe KỊNỊNYANAḄỌ ḅe ḍiki-ḅalafaam, kụma ọ̀ ḅara ḅụ saa fị ḅọ ọ̀ fị saa mẹ gotẹ ḅo ị̀ maa awọmẹ ma ọkị ori omoni sọma ḅẹ tẹẹ.”
2Ịlayịsa nwẹnị á gbela, “À tiye mịẹ ị́ pịrị ḅẹ? Warị-ḅio í tiye nyana? Ḍuko ị̀ pịrịị.” Á nwẹnị pakịrị, “Pulo gbọrụ jongo sikima à jen nyana-a.”
3Anịtẹso ọ̀ nwẹnị á ḅẹẹ, “Paka-mu ị́nịna kpeki tẹ angarị apụ mamgba ḅara gburo-gburoma ye ḅio ḅụ ofori ḅẹ ye-sụa-aị ḅọlọọ. 4Anịtẹso ị́yẹrị na í owiapụ-awọmẹ ma na ọ́ warị sọọ, tẹ ḅọkọ gbaịn ọmịna aḅụụ pịrịị, tẹ pulo mẹ pẹlẹma mịna ye ḅio ḅụ ofori ḅẹ ye-sụa-aị mamgba ḅio sụa; tẹ arị ḅụ ḅin ye ḅin ye saakị saakị gbọrụ akaka kuromaa.”
5Anieḅụ á nwẹnị ọ̀ ḅụụ mẹnjị-so, tẹ árị na árị owiapụ-awọmẹ ma na nwẹnị warị sọ tẹ ḅọkọ mẹ gbaịn ịna ḅụụ pịrị; árị pulo mẹ pẹlẹma sụarị sakị ini ye ḅio ḅụụ ofori ḅẹ ye-sụa-aị ma saakị saakị ḅo á pịrịarị. 6Ye-sụa-aị ma ḅin fama tẹso, á nwẹnị árị owiapụ-awọmẹ ma ḅẹ gbọrụ ḅọ ḅẹẹ, “Jen ye-sụaye ọkị-ḅo ị̀ pịrịị.” Ọ̀ nwẹnị á ḅẹẹ, “Jen ḅarị ofori.” Anịtẹso pulo mẹ nwẹnị sịra daasịẹ. 7Á nwẹnị ḅo anị ḍuko Tamụnọ Ịkịankoroḅọ ḅe pịrị, tẹ ọ̀ nwẹnị ḅẹẹ, “Muu, pulo mẹ dẹrị tẹ kẹ ị́ fị asaa ma gbẹẹ, anịsakị ị́yẹrị na í owiapụ-awọmẹ ma na inetẹ kirikọn-ye mẹ kẹ ọmịna aḅụụ ḍikiḍiki tẹ ḍumo ḅa.”
Ịlayịsa na Sunemu ḅẹ Ngọ-kọn Ẹrẹḅọ Ma Na
8Gbọrụ ene ḅụ, Ịlayịsa nwẹnị Sunemu ngọ-kọn wararị gbọrụ ẹrẹḅọ sime anga mu. Árịma nwẹnị tọn ọ̀ pịrị mịnẹ ọ̀ fịye kalịye fị. Anieḅụ ori anị etela ḅụ ḅọrọ sakị ḅọrọ sakị, ori agba-agba tẹ fịye fịm. 9Á nwẹnị á di ḅẹẹ, “À sịn-arị ḅieḅe tẹ sịkọpẹlẹ-a ḅara kẹ wamịna etela ḅụ ḅọrọarị ḅọ ḅe anie Tamụnọ fịafịa fịrịmẹnjịḅọ. 10Yee wa warị-isun mẹ ọgọnọ gbọrụ kala-ḅio nama ọ̀ pịrị tẹ gbọrụ monoye na, gbọrụ dẹbịlẹ na, gbọrụ ngada na, gbọrụ kpọ-tọnjọ na kẹ anị ḅio kuroma, mịẹtẹ ọ̀ wa ḍọkụma-ḅo sakị ḅo sakị ò mu anịanga sime ḅẹ ḅara.”
11Gbọrụ ene ḅụ, Ịlayịsa nwẹnị anịanga ḅo tẹ mu kala-ḅio mẹ ḅio sọ tẹ anịanga ḅụ ịnyọsara. 12Ọ̀ nwẹnị ọ̀ fịrịmẹnjịḅọ Gehazi ḅẹẹ, “Ma Sunemu ḅẹ ḅọ ma sịn.” Ori á sịn ḅo tẹso, á nwẹnị ọ̀ tọrọkọ sịẹsime. 13Ịlayịsa nwẹnị Gehazi ḅẹẹ, “Á ḅẹẹ, ‘ị̀ wa gotẹ mị ḅụụ-fụka mẹmgba ọkị ị́ ḅụụ pịrị tẹ ḅara ḍikii; tiye mịẹ ị́ pịrị na-iḅi? Àrị í gotẹ ẹkwẹn amadaḅọ ḅe anịanịa ḅẹrẹtọn ọmụ-ogbo mẹ pịrịarị ḅọ ḅe pịrị ḅẹ mụnọọ?’ ” Á nwẹnị pakịrị, “Ị̀ ama ḅẹ apụ ogboku ḅụ mie à simearị ye.”
14Ịlayịsa nwẹnị Gehazi gbela, “Anị-a kụma tiye mịẹ á pịrị na-iḅi?” Gehazi nwẹnị pakịrị, “Iḅim, kụma á gbọrụ owiḅọtụḅọ sọ iyi-a, á di pịkị omongi tẹẹ.”
15Ọ̀ nwẹnị ḅẹẹ, “Á sịn.” Ori á sịn tẹso, á nwẹnị ḅo ḅọkọ mẹ ḅụ sịẹsime, 16#Suk 18.14tẹ Ịlayịsa nwẹnị á ḅẹẹ, “Jen kụra nwẹn pembe sakị ḅụ ị́ gbọrụ owiḅọtụḅọ kẹ í kuḅu ḅio sụa ḅa.” Á nwẹnị ḅẹẹ, “Ẹn-ẹn, ị̀ nyanaḅọ, iruo kọn yẹrị ị́ fịrịmẹnjị-ẹrẹḅọtụḅọ pịrị ma.”
17Kụma ẹrẹḅọ ma nwẹnị sime-kọn tẹ nwẹnị jen kụra anị sakị mẹ pembe sakị ḅụ Ịlayịsa wẹrịtẹ á ḅẹẹ ḅara ḅụ gbọrụ owiḅọtụḅọ iyi.
18Tụḅọ ḅe gburo-gburo tẹso, ọ̀ nwẹnị gbọrụ dede-ḅio ọ̀ ḍa sime anga mu fịye soku apụ ma ogboku ḅụ. 19Ọ̀ nwẹnị bẹkẹma oloku, “yei, ị̀ sịḅị ye, ị̀ sịḅị ye!” Ḍaḅọ ḅe nwẹnị ọ̀ fịrịmẹnjịḅọ ḅẹẹ, “Ò dogi-mu ori iyingi pịrịị.” 20Ori ọ̀ saakị dogi tẹ ori ọkị-ḅo ò iyingi pịrị tẹso, tụḅọ ḅe nwẹnị á ḅụọ-ẹtẹnẹ ḅụ lẹgị nwenii ene-ogbo la, anị tẹrẹmẹ ọ̀ nwẹnị fịị. 21Á nwẹnị ò dogi tẹ kẹ iwo mu Ịlayịsa iḅila ọgọnọ ḅụ koroma, tẹ ḅọkọ mẹ gbaịn ọ̀ pịrị tẹ paka-so. 22Anịtẹso á nwẹnị á di ḍọkụma-mu tẹ ọ̀ ḅẹẹ, “Fịrịmẹnjịapụ ma ḅẹ gbọrụḅọ na gbọrụ asụ na kẹ ị̀ fịrịmaa, mịẹtẹ á fọnya Tamụnọ Fịrịmẹnjịḅọ ḅe ḍọkụma-mu tẹ pịkị-ḅo ḅe ḅara.”
23Á di ḅe nwẹnị gbela, “í tiegotẹ mịmgba ọ̀ ḍọkụma-mu ḅẹ-ḅiiarị? Mie ịwọ akalụ-a, anịanịa ịnyọsara-ene.” Á nwẹnị pakịrị, “Iḅi ḅa.” 24Anịtẹso á nwẹnị asụ ḅe dẹẹ tẹlẹma, tẹ á fịrịmẹnjịḅọ ḅe ḅẹẹ, “Nama ḅe mịẹtẹ ọ̀ saakị mangị. Minini tẹ ọ̀ mangị la ḅara ḅụ ò ye sin ma, àrị ọkọ kẹ ị́ ḅẹẹ sikima.” 25Anieḅụ á nwẹnị dọkụ paka tẹ ḅo Tamụnọ tomḅọ ḅe la Kamẹlị Tụndụ ḅụ.
Ịlayịsa á ḅoarị tẹ árị ẹrị tẹso, ọ̀ nwẹnị ọ̀ fịrịmẹnjịḅọ Gehazi ḅẹẹ, “Ḍikii, ala-jụ Sunemu ḅẹ ẹrẹḅọ ma ḅoarị. 26Fọnya mangị mu árị na bịama tẹ á gbela, ‘Gbeke ị́ na iḅi wararị? Gbeke í di na iḅi wararị? Gbeke ị́ tụḅọ ḅe na iḅi wararị?’ ” Á nwẹnị pakịrị, “iḅi wararị.” 27Kụma á ḅo tụndụ mẹ ḅụ Ịlayịsa la tẹso, á nwẹnị ọ̀ ḅụọ-suku fịnama. Gehazi nwẹnị á sukuruma siin ḅẹ ḅo, kụma Ịlayịsa nwẹnị ḅẹẹ, “Á wẹrịsoo, gbala ye ḅụụ ḅụ akụ ḅụụ-ḅalaḅala ḅio árị emi; tẹ KỊNỊNYANAḄỌ anị kẹ ị̀ ḅọịma tẹ amụ ḍuko ị̀ pịrị-a.”
28Anịtẹso á nwẹnị ḅẹẹ, “Ị̀ nyanaḅọ, à ḅọrọ ị́ ḅara owiḅọtụḅọ ḅii? Àrị ị́ ḅẹẹ-a oḅori kẹ ị̀ sịn ma?”
29Ọ̀ nwẹnị Gehazi ḅẹẹ, “Í ḅiri-ponoye kẹ ị́ ḅiri ponoo, ị̀ mkpara mẹ ọkịị, tẹ muu. Ị́ kịnị na bịama bịama, mḅọ sịn ma, ị́ sịn ḅọ sịn ḅọ, minini ma; tẹ ị̀ mkpara mẹ kẹ tụḅọ mẹ ọgọnọ gbana mu tọrụkuḅu mẹ lama.”
30Anịtẹso tụḅọ mẹ iyingiḅọ ma nwẹnị ḅẹẹ, “KỊNỊNYANAḄỌ ḅe ḍumo wararị, ị́yẹrị ḅe sọ ḍumo wararị ogbo àrị ị́ wẹrịso ḅịa.” Anieḅụ ọ̀ nwẹnị saakị tẹ á ḍuka mu. 31Gehazi tọrọkọ-tọrọkọ mum, tẹ mkpara mẹ kẹ tụḅọ mẹ ọgọnọ gbana mu tọrụkuḅu mẹ lamam, kụma ḍumo fie ḅara anịanịa elekima sọ ḍie-paka-a. Ọkọẹrẹsị ọ̀ nwẹnị pịkịma-ḅo Ịlayịsa na bịama ḅẹ ḅo tẹ ḍuko ọ̀ pịrị, “Tụḅọ mẹ amụ naa-saakị-a.”
32Ịlayịsa ḅo warị mẹ sọ tẹso, ọ̀ nwẹnị ori iḅila ọgọnọ ḅụ tụḅọ mẹ ẹrị fịị tẹ koro-sime wararị. 33Anieḅụ ọ̀ nwẹnị sọ-mu tẹ ḅọkọ mẹ gbaịn ọ̀ ḅụụ na tụḅọ mẹ na pịrị tẹ KỊNỊNYANAḄỌ ḅe tẹkẹ. 34#1 Ama 17.21Anịtẹso ọ̀ nwẹnị mu tụḅọ mẹ ọgọnọ sụụn sime tẹ ọ̀ ḅịḅị kẹ tụḅọ mẹ ḅịḅị ọgọnọ gbana, ori atọrụngbọ kẹ tụḅọ mẹ atọrụngbọ na dama, ori aḅara kẹ tụḅọ mẹ aḅara ọgọnọ gbana; ọ̀ wẹrịtẹ tụḅọ mẹ ọgọnọ ọ̀ ḅụụ sụn ḅara ḅụ, tụḅọ mẹ oju meni mẹ nwẹnị mẹnmẹn. 35Ọ̀ nwẹnị saakị tẹ warị mẹ ḅio gbọrụ sakị kẹ mẹnjị iwo-na-ideri-na, tẹ mu pịkị ori ọgọnọ siin ọ̀ ḅụụ sụụn tẹ sime; tẹ tụḅọ mẹ nwẹnị sọnọma sakị kẹ ḍịsẹ tẹ ori atọrụngbọ finji. 36Anịtẹso Ịlayịsa nwẹnị Gehazi sịn tẹ ọ̀ ḅẹẹ, “Ma Sunemu ḅẹ ḅọ ma sịn.” Anieḅụ ọ̀ nwẹnị á sịn. Árị ọ̀ ḍọkụma-ḅo tẹso, ọ̀ nwẹnị á ḅẹẹ, “Í owiḅọtụḅọ saakị ọkị.” 37Á nwẹnị ḅo tẹ ọ̀ ḅụọ-suku ḅịkị kiri-ḅio koro; anịtẹrẹmẹ á nwẹnị árị owiḅọtụḅọ ḅe saakị ọkị tẹ mẹnjị paka.
Jen Maa Ḅụụ-gbiripuma Aị
38Ịlayịsa nwẹnị siin Giligalị ḅo ịnụ ama mẹ ḅio emi ogbo. Ịkịankoroapụ ma ọ̀ tọrọkọ lẹgị-sime wararị ḅara ḅụ, ọ̀ nwẹnị ọ̀ fịrịmẹnjịḅọ ḅẹẹ, “Gburo-gburotẹ ḅẹlẹ mẹ saakị ọpọ ḅio sịẹma tẹ ọḍụ sọ ịkịankoroapụ ma pịrị.” 39Ịna ḅụụ ḅẹ gbọrụḅọ nwẹnị piri sọ tẹ ịnyịnya kaịn ḅẹ mu tẹ ịgba-ḍigi pembe asịn ḅụ sụa tẹ kiri-ḅio sara wararị aḅụrọ ẹrị tẹ tan ò kuḅu ḅinma tẹ kẹ ḅo tẹ arị pẹlẹ tẹ kẹ ọḍụ ḅẹlẹ mẹ ḅio sụa, arị lekiri-a ḅara ḅụ 40Ịn nwẹnị anị pịkị sara tẹ ḍuu tomi ma pịrị ịn fị ḅẹ ḅara. Kụma ini anị kẹ ḅịḅị lama tẹso ịn nwẹnị oloku pakama, “Yei Tamụnọ tomḅọ, mị fịye mẹ fị ḅọ mḅọ fịị ḅịa” Tẹ ini inetẹ anị fị-a. 41Ịlayịsa nwẹnị ḅẹẹ, “Ọkọ ḅẹḅẹ, kẹlẹ ḍuu ḅo ị̀ pịrịị” Ọ̀ nwẹnị anị kẹ pịkị ḅẹlẹ mẹ ḅio sara, tẹ ḅẹẹ, “Ḍuu tẹ kẹ tomi ma pịrị mịẹtẹ ini anị fị ḅẹ ḅara.” Anịsakị ye kẹ tomḅọ lama-lama ye ḅarị ofori ḅẹlẹ mẹ ḅio.
42Gbọrụ owiḅọ Balị-salisa ḅụ ḅom, tẹ bali asịnmgbọlụ kẹ mịẹ wararị fịturu si akpo na, ịwọma pẹlẹ mgbọlụ-afịaị na kẹ Ịlayịsa pịrịm. Ịlayịsa nwẹnị ḅẹẹ, “Arị kẹ owiapụ ma pịrịị, ịn fị ḅẹ ḅara.” 43Kụma ọ̀ fịrịmẹnjịḅọ ḅe nwẹnị ḅẹẹ, “À tọ-ḅara kẹ miemẹ kẹ owiapụ sọnọa si pịrị fị ḅẹ?” Anieḅụ ọ̀ nwẹnị pakịrị, “Kẹ owiapụ ma pịrị mịẹtẹ ini anị fị ḅẹ ḅara, gbala mie KỊNỊNYANAḄỌ ḅe ḍuko yee, ‘Ini anị fị ḅa tẹ ye kọọn ḅa.’ ” 44Anieḅụ ọ̀ nwẹnị anị kẹ ịn pịrị. Ịn fịm, tẹ KỊNỊNYANAḄỌ ḅe wẹrịtẹ ḅẹẹ ḅara, jaị nwẹnị kọọn.
(C) The Bible Society of Nigeria