2 Amadapụ 22
22
Juda Ḅẹ Amadaḅọ Josaya
(2 Pkị 34.1-2)
1 #
Jer 3.6
Josaya sịḅị ninea kụra ḅọrọ tẹso, ọ̀ saakị ama-dam, tẹ kụra suei gbọrụ kụra finji kẹ ama-dam Jeruselemu ḅụ. Ò iyingi ẹrẹ Jedida, Bozikati ḅẹ Adaya ẹrẹḅọtụḅọ. 2Ọ̀ KỊNỊNYANAḄỌ ḅe ḍiki-tọrụ ḅụ kuraye mịẹm tẹ ò Devidi mẹnjị etela mẹmgba ḅụ mẹnjị tẹ tọrụ pịkị ama-ḅara anịanịa ere-ḅara da-a.
In Oloko Ḍiri Mẹ Ḍọkị-ẹrịm
(2 Pkị 34.8-28)
3Amadaḅọ Josaya ama-da tẹ maa akụra fa si karama kụra ḅụ, amadaḅọ ḅe nwẹnị Safani anie Azalaya owiḅọtụḅọ, pịkị Mesulamu taa-owiḅọtụḅọ ḍiri-kẹẹḅọ ḅe fịrịma KỊNỊNYANAḄỌ ḅe warị mu tẹ ḅẹẹ, 4“Hilikaya Sịḅịda-Agbamịẹḅọ ḅe ḍọkụma-muu, mịẹtẹ ori igbigi mẹ tẹ ịn kẹ KỊNỊNYANAḄỌ ḅe warị mẹ ḅio ḅo tẹ anị ḍikiḍikiarị apụ ma, tomi ma ḅara ḅụ da kobiri tẹ ye mẹ kịẹn ḅẹ ḅara; 5tẹ yee ini anị kẹ tọrụ kẹ KỊNỊNYANAḄỌ ḅe warị mẹ ḍiki-ikelema kọrịnama kọrị apụ ma pịrị, tẹ ini anị kẹ KỊNỊNYANAḄỌ ḅe warị mẹ ḅụ si anga si anga tẹlẹmarị apụ ma, 6anie akanịapụ ma na, warị nama apụ ma na, ḍụḅarị warị nama apụ ma na pịrị, ịn pịkị anị kẹ opu sịn-aḅiri na, pẹlẹ tẹ ḍụḅarị na fẹẹ tẹ kẹ warị mẹ tẹlẹma. 7#2 Ama 12.15Kụma ịn kẹ ịn pịrịtẹ ịna ḅara-ḅio sime igbigi mẹ ịn kọrị ḅara gbela ma, kẹ gotẹ ọkọ ḅẹẹarị, ịn ye mingirima-a ḅara kẹ kọrịarị.”
8Hilikaya sịḅịda agbamịẹḅọ ḅe nwẹnị Safani ḍiri-kẹẹḅọ ḅe ḅẹẹ, “Arị Oloko mẹ ḅẹ ḍiri mẹ ḍọkị-ẹrị tẹ KỊNỊNYANAḄỌ ḅe warị mẹ ḅio.” Hilikaya nwẹnị ḍiri mẹ kẹ Safani pịrị tẹ ori anị gom. 9Safani ḍiri-kẹẹḅọ ḅe nwẹnị amadaḅọ ḅe ḍọkụma-ḅo tẹ ḍuko amadaḅọ ḅe pịrị, “Ị́ afịrịmẹnjịapụ ma warị mẹ ḅio ịn ḍọkị-ẹrị igbigi mẹmgba tuma tẹ kẹ tọrụ kẹ KỊNỊNYANAḄỌ ḅe warị mẹ ḍiki-ikelemarị kọrịnama-kọrịapụ ma pịrị tẹẹ.” 10Anịtẹso Safani ḍiri-kẹẹḅọ ḅe pịkị ḍuko amadaḅọ ḅe pịrịm, “Hilikaya agbamịẹḅọ ḅe gbọrụ ḍiri kẹ ị̀ pịrịm.” Tẹ Safani nwẹnị amadaḅọ ḅe tọrọkọ anị go.
11Amadaḅọ ḅe Oloko ḍiri mẹ ḅio ḅẹ ẹkwẹn-aḅịḅị ma naa tẹso, ọ̀ nwẹnị ori akapa kan. 12Amadaḅọ ḅe nwẹnị tọn Hilikaya agbamịẹḅọ ḅe na, Ahikamụ Safani owiḅọtụḅọ ḅe na, Akịbọ Mayịkaya owiḅọtụḅọ ḅe na, Safani ḍiri-kẹẹḅọ ḅe na, Asaya amadaḅọ ḅe fịrịmẹnjịḅọ ḅe na pịrị, tẹ ḅẹẹm, 13“Ó mu KỊNỊNYANAḄỌ ḅe ḅịḅị ḅii kẹ yẹrị na, tomi ma na, bebe Juda mẹmgba na pịrị, mị ḍiri mẹ tẹ ịn ḍọkị-ẹrị ye mẹ ḅio ḅẹ ẹkwẹn-aḅịḅị ma gboloma ye; kẹ gotẹ ọkọ ḅẹẹarị, wamịna aḍapụ ma mị ḍiri mẹ ḅio ḅẹ ẹkwẹn-aḅịḅị ma poki tẹ anị wẹrịtẹ wa gboloma ḅara ḅụ kẹẹ ḅara mamgba ḍiki mịẹ-a ẹrẹsị KỊNỊNYANAḄỌ ḅe gburo-gburotẹ ịganị ḅo wamịna ọgọnọ gbana tẹ.”
14Anieḅụ Hilikaya agbamịẹḅọ ḅe na, Ahikamụ na, Akịbọ na, Safani na, Asaya na, nwẹnị Ịkịankoro-ẹrẹḅọ Huluda na ẹkwẹnma ḅẹ mu. Árị anie Salumu ta — oriḅe anie Tikiva owiḅọtụḅọ, pịkị Hahasi taa-owiḅọtụḅọ tẹ kapa koko igbe mẹ ḍikiḍikiarị ḅọ ḅe. (Jeruselemu ḅụ Ịwọma Pakama Anga mẹ ḅụ árị angam). Ịn nwẹnị árị na ẹkwẹn. 15Á nwẹnị ịn ḅẹẹ, “Ó ḍuko ọ́ kẹ ị̀ fịrịmaḅọ ḅe pịrịị, 16mie KỊNỊNYANAḄỌ Izirẹlịapụ tẹkẹarị Tamụnọ ḅe ḅẹẹ ḅara: ‘ḍikii, à siye kẹ ḅo mị ye-yọ mẹ na anị ḅio sime aị ma na ọgọnọ gbana ḅa, anie ẹkwẹn-aḅịḅị mamgba tẹ Juda ḅẹ amadaḅọ ḅe go aị ma. 17Kẹ gotẹ ọkọ ḅẹẹarị, ini ị̀ sịkị tẹ kụnụaị dọkịma tẹ kẹ oru-atamụnọ pịrị tẹẹ, mịẹtẹ ịn ḅara kẹ mịẹ aị ḅụ ini ị̀ ḅụụ ịganị saakị ḅẹ ḅara, ọkọẹrẹsị ị̀ ịganị mị yọ mẹ ḅụ saakị ḅa, tẹ biin ḅịa.’ 18Juda ḅẹ amadaḅọ ḅe tẹ ọ́ fịrịmam ó ḅo KỊNỊNYANAḄỌ ḅe ḅịḅị ḅii ḅẹ ḅọ ḅe kụma, mie ọ́ kẹ ọ̀ ḅẹẹ ḅarị ḅara, mie KỊNỊNYANAḄỌ, Izirẹlịapụ tẹkẹarị Tamụnọ ḅe ḅẹẹ ḅara: ‘Ẹkwẹn-aḅịḅị ma tẹ ị́ naa aị ma gbolomaye, 19tẹmẹ ḅụ ị́ si ḅụ pịkị tẹ KỊNỊNYANAḄỌ ḅe tọrọkọ ị́ ḅụụ sin-saram, ị́ à mị yọ mẹ na, anị ḅụ sime aị ma ḅụ à si ẹkwẹn kọn ḅara mẹ naa tẹso, mịnẹ ịn woritẹ fa tẹ ye-yọ sọ ḅa ḅẹ ye ḅụ ị́ nwẹnị ị́ akapa kan tẹ ị̀ tọrọkọ owu ye mẹ, yẹrị sọ àrị ị́ naa tẹ,’ KỊNỊNYANAḄỌ ḅe ọkọ ḅẹẹm. 20Anịẹrẹsị, ḍikii àrị í kobiri tẹ kẹ ị́ aḍapụ ma sime anga mu ḅa, anịsakị dein ḅụ arị í kobiri í ḍuḅu ḅio su ḅa, tẹ ị́ atọrụngbọ mịna si aị mamgba tẹ arị ọkị-ḅo mị yọ mẹ ọgọnọ gbana ḅẹ aị ma ẹrị ḅịa.” Ịn nwẹnị ma ẹkwẹn-aḅịḅị ma da ḅo amadaḅọ ḅe pịrị.
(C) The Bible Society of Nigeria