2 Paka-aị 36
36
Juda ḅẹ Amadaḅọ Jehohahazị
(2 Ama 23.30-35)
1Ama mẹ ḅẹ apụ ma nwẹnị Jehohahazị Josaya owiḅọtụḅọ ḅe kẹ ọ̀ ḍa kiri ḅụ amadaḅọ mịẹ Jeruselemu ḅụ. 2Jehohahazị saakị ama-da sakị ọ̀ sịḅị si tẹra kụra finji (23) ḅọrọ tẹ, tẹ ọ̀ tẹra akalụ kẹ Jeruselemu ḅụ ama-dam. 3Anịtẹso Ijiputi ḅẹ amadaḅọ nwẹnị ama-da ḅụ ò siin Jeruselemu ḅụ, tẹ nwẹnị sịẹ oso jen sịẹ gbẹẹarị igbigi seleḅa pakịrị tẹra puku ofori puku amesi, oyia ẹndẹ finji (300,000) na, golu kpoo sọnọma ẹndẹ na oyia asi finji (3,000) na kẹ ịna ọgọnọ gbana. 4#Jer 22.11,12Ijiputi ḅẹ amadaḅọ ḅe nwẹnị ò iyimbere Ẹlịyakịmụ kẹ Juda na Jeruselemu na ḅụ amadaḅọ sọma, tẹ ori ẹrẹ ḍima tẹ Jehohakịmụ kẹ ọ̀ sịn; kụma Neko nwẹnị ò iyimbere Jehohahazị ọkị tẹ ò dogi-so Ijiputi mu.
Juda Ḅẹ Amadaḅọ Jehohakịmụ
(2 Ama 23.36—24.7)
5 #
Jer 22.18,19; 26.1-6; 35.1-19 Jehohakịmụ sịḅị si sọnọ akụra finji ḅọrọ tẹso, ọ̀ saakị ama-dam, tẹ oyi gbọrụ kụra finji kẹ Jeruselemu ḅụ ama-dam. Ọ̀ KỊNỊNYANAḄỌ ọ̀ Tamụnọ ḅe ḍiki-tọrụ ḅụ siye mịẹm. 6#Jer 25.1-38; 36.1-32; 45.1-5; Dan 1.1,2Babịlọnị ḅẹ Amadaḅọ Nebukadineza nwẹnị owu kẹ ọ̀ paka tẹ ikoli kẹ ọ̀ sụa tẹ kẹ so Babịlọnị mu. 7Nebukadineza pịkị KỊNỊNYANAḄỌ ḅe warị ḅẹ ẹfẹrẹ ma ḅẹ pakịrị dogi-so Babịlọnị mum tẹ arị kẹ Babịlọnị ḅụ ọ̀ warị amadapụ opu warị mẹ ḅio koromam. 8Mịọkụ Jehohakịmụ amịẹaị ḅụ kiri kọn aị ma na, tọn-tọn-aị ma tẹ ọ̀ mịẹ aị ma na, ọ̀ ḅụụ in ḍọkị-ẹrị tụḅụrụ amịẹaị na, ḍikii, Izirẹlị na Juda na Amadapụ ma ḍiri mẹ ḅio arị kẹẹ wararị; tẹ ori owiḅọtụḅọ Jehohakịnị nwẹnị ò kiri ḅụ ama mẹ da.
Juda Ḅẹ Amadaḅọ Jehohakịnị
(2 Ama 24.8-17)
9Jehohakịnị sịḅị ninea akụra ḅọrọ tẹso, ọ̀ saakị ama-dam, tẹ ọ̀ Jeruselemu ḅụ tẹra akalụ na oyia aḍin na kẹ ama-dam. Ọ̀ KỊNỊNYANAḄỌ ḅe ḍiki-tọrụ ḅụ siye mịẹm. 10#Jer 22.24-30; 24.1-10; 29.1,2; Izi 17.12; Jer 37.1; Izi 17.13Kụra mẹ ḅe kala fẹngụ ḅio Amadaḅọ Nebukadineza nwẹnị fịrịma tẹ KỊNỊNYANAḄỌ ḅe warị ḅẹ yela ẹfẹrẹ ma kẹ ọ̀ ḅụụ sụa tẹ ọ̀ kẹ Babịlọnị ḅo, tẹ nwẹnị ò iyimbere Zẹdẹkaya kẹ Juda na, Jeruselemu na ḅụ amadaḅọ sọma.
Juda Ḅẹ Amadaḅọ Zẹdẹkaya
(2 Ama 24.18-20; Jer 52.1-3)
11 #
Jer 27.1-22; 28.1-17 Zẹdẹkaya sịḅị si gbọrụ kụra finji ḅọrọ tẹso ọ̀ saakị ama-dam, tẹ ò Jeruselemu ḅụ oyi gbọrụ kụra finji kẹ ama-dam. 12Ọ̀ KỊNỊNYANAḄỌ ọ̀ Tamụnọ ḅe ḍiki-tọrụ ḅụ siye mịẹm. Ò Jerimaya ịkịankoroḅọ ḅe tẹ KỊNỊNYANAḄỌ ḅe ḅịḅị ḅụ ḅo ẹkwẹn kọn-arị ḅo ḅe tọrọkọ ọ̀ ḅụụ iderima-a.
Jeruselemu Ḅịkịm
(2 Ama 25.1-24; Jer 52.3-11)
13 #
Izi 17.15
Ọ̀ nwẹnị pịkị sịḅị kụrọma Amadaḅọ Nebukadineza tẹ ọ̀ mịẹ tẹ ọ̀ Tamụnọ ḅụụ ye karị ḅo ḅe pịrị; ori ọ̀ kọngọ kụrọma tẹ ò ḅioḅẹngbọ kụrọma pịkị KỊNỊNYANAḄỌ Izirẹlịapụ tẹkẹarị Tamụnọ ḅe pịrịm. 14Tọrọkọ tarị agbamịẹapụ mamgba na, tomi ma na gbọrụ ḅara kẹ gbala-gbala minini nyana-a, tẹ opu asịẹ ma ḅẹ tọn-tọn-aị ma ḍukamẹnjịarị; tẹ KỊNỊNYANAḄỌ ḅe warị mẹ tẹ Jeruselemu ḅụ ọ̀ mịẹ fịafịama ye mẹ pilemam. 15KỊNỊNYANAḄỌ ḅe, ịna aḍapụ ma Tamụnọ ḅe, tịngị-tịngịma ori afịrịmẹnjịapụ ḅụụ ịgbanịm, gbala ọ̀ sịḅị-kụrụkụrụ nyana ori atomi na, ò sime anga na pịrịm ẹrẹsị; 16Kụma kombo mịẹ in Tamụnọ afịrịmẹnjịapụ ma kombo-kombo tẹ ori ẹkwẹn-aḅịḅị ḍiki-sima-sima tẹ ori ịkịankoroapụ ma kẹ kpọọtiarị nwenii KỊNỊNYANAḄỌ ḅe ịganị mẹ ori atomi ma da-paka nwenii ye-mịẹ tẹlẹma ḅara ḅarị ofori. 17#Jer 21.1-10; 34.1-5Ọkọẹrẹsị ọ̀ nwẹnị Babịlọnị ḅẹ apụ ma amadaḅọ ḅe tẹ ịna fịafịa yọ mẹ ḅẹ warị ḅio ḅụ okologie kẹ ịna asambịrịma owiapụ ma ḅaa ḅọ ḅe ọkị-ḅo in da-paka, tẹ sịḅị-kụrụkụrụ nyana asatụḅọ, anịanịa ḅụụ-gboloa iriawọ, omongi tẹ owiḅọ anịanịa kpọọtẹ ḅọ pịrị-a; ori inimgba kẹ ọ̀ ḅara-ḅio sunm. 18Tamụnọ warị mẹ ḅẹ ẹfẹrẹ — opu aị na kala aị na — pịkị KỊNỊNYANAḄỌ ḅe warị mẹ ḅẹ ngọ ma na amadaḅọ ḅe na ori owiapụ-awọmẹ ma na nyana ngọ mamgba ọ̀ kẹ Babịlọnị ḅom. 19#1 Ama 9.8In nwẹnị Tamụnọ warị mẹ dọkịma, tẹ Jeruselemu onu mẹ kan sara, tẹ fịnị kẹ anị ḅẹ amadapụ opu awarị ma dọkịma, tẹ anị ḅẹ yela ẹfẹrẹ mamgba ḅaa sara. 20Inima tẹ okologie mẹ ḅụ mangị-so apụ ma, ori omoni ḅara kẹ ịn kẹ Babịlọnị ḅom, tẹ in ḅo fịrịmẹnjịapụ sọ kẹ ori na, ori owiapụ-awọmẹ na pịrị nwenii in Pasịya ama-da mẹ mịẹ pakamam, 21#Jer 25.11; 29.10kẹ KỊNỊNYANAḄỌ ḅe Jerimaya ḅịḅị ḅụ kọn ẹkwẹn mẹ mịẹ ḅinma, “Anị fatẹ ḅara simearị tẹ ene mamgba anị Ịnyọsara-Ene kokoarị, nwenii ama mẹ anị ḅẹ ịnyọsara kụra atesi oyi finji (70) ma karamam.”
Sayịrọsị Tọn Juu-ḅẹ-apụ Ma Pịrịm In Pịkịma-soo
(Ẹzị 1.1-4)
22Sayịrọsị Pasịya ḅẹ amadaḅọ ḅe tarị kụra ḅụ, mịẹ tẹ KỊNỊNYANAḄỌ ḅe ẹkwẹn-ḅịḅị mẹ tẹ Jerimaya ḅịḅị ḅụ kọọn ye mẹ paka ḅarị ḅara, KỊNỊNYANAḄỌ ḅe nwẹnị Sayịrọsị Pasịya ḅẹ amadaḅọ ḅe tẹmẹ sịn-saakịma tẹ ọ̀ nwẹnị ḍuko wasa ori ama-da kiri mẹmgba ikelema-koro, pịkị anị kẹ ḍiri sọ kẹẹ:
23 #
Ayị 44.28
“Mị-ḅara mịẹ Sayịrọsị Pasịya ḅẹ amadaḅọ ḅe ḍuko yee, KỊNỊNYANAḄỌ ḅe, So-ḅio ḅẹ Tamụnọ ḅe, tomikiri mẹ ama-da kiri mamgba kẹ ị̀ pịrị tẹ, tẹ tọn ị̀ pịrị tẹ à Jeruselemu Juda ḅụ simearị ama mẹ ḅio gbọrụ warị nama ọ̀ pịrị. Ori atomi mamgba ḅụụ ḅẹḅọ-ḅẹḅọ tẹ ọmịna ogboku ḅụ sime-ḅọ sime-ḅọ, yee KỊNỊNYANAḄỌ ọ̀ Tamụnọ ḅe ori na sime. Yee mḅọ iwo mu.”
(C) The Bible Society of Nigeria