2 Paka-aị 34
34
Juda ḅẹ Amadaḅọ Josaya
(2 Ama 22.1-2)
1 #
Jer 3.6
Josaya sịḅị nine akụra ḅọrọ tẹso, ọ̀ saakị ama-dam, tẹ kụra suei gbọrụ kụra finji (31) kẹ ama-dam Jeruselemu ḅụ. 2Ọ̀ KỊNỊNYANAḄỌ ḅe tọrụ ḅụ kuraye mịẹm, tẹ ọ̀ ḍa Devidi mẹnjị etela ma ḅụ mẹnjịm, tẹ pịkị ori ama-ḅara anịanịa ori ere-ḅara da-a.
Josaya Owu Kẹ Sunsin Oru Pịrị Pakam
3Kẹ gotẹ ọkọ ḅẹẹarị, ori ama-da tẹ nine akụra karama kụra ḅụ, ọ̀ paa owiḅọtụḅọ ḅụ emi ogbo ọ̀ saakị ọ̀ ḍa Devidi Tamụnọ ḅe ḍọkịm; tẹ oyi maa kụra finji karama kụra ḅụ, ọ̀ saakị Juda na, Jeruselemu na ḅụ gele ayeyọ ma na, Asẹra oru ma na, in ye kịkama ḅara kẹ kara na tẹmẹ wararị aị ma gbọrsịḅị arị sịkịrị siin famam. 4#2 Ama 21.3; 2 Pkị 33.3Ọ̀ tọrọkọ ḅụ in Balị ma ebeka ma kan sara famam; tẹ ọ̀ nwẹnị arị ọgọnọ pakịrị ḅụ sime kụnụaị ebeka ma pẹlẹ-pẹlẹ-gbin. Ọ̀ nwẹnị Asẹra oru ma na, in ye kịkama ḅara kẹ kara na tẹmẹ-aị ma na kẹ pakịrị-pakịrị puu, tẹ arị dọkịma, tẹ nwẹnị arịḅẹ fọọn ma kẹ arị apụ ma tẹ agbamịẹ arị pịrị-pịrị apụ ma aḍuḅu ọgọnọ sara. 5#1 Ama 13.2Ọ̀ pịkị arị agbamịẹapụ ma mgbe ma dọkịmam arị ebeka ma ọgọnọ ḅụ, tẹ Juda na Jeruselemu na ḅụ sunsin oru pịrị sịkịrị siinm. 6Manasẹ na, Iferemu na, Simiyọnị na, Nafutali jụjụ-ḅio ḅẹ opu ama ma na arịḅẹ fatẹ ayeyọ ma ikelema-koro ḅụ, 7ọ̀ sime ebeka ma kan saram, tẹ Asẹra oru ma na, ye kịkama tẹmẹ-aị ma gbẹẹ kọsịma fọọn sọmam, tẹ Izirẹlị ikelema-koro ḅụ kụnụarị ebeka mamgba pẹlẹ-pẹlẹ-gbin famam. Anịtẹrẹmẹ ọ̀ pịkịma Jeruselemu ḅom.
Oloko Mẹ Ḅe Ḍiri Mẹ In Ḍọkị-ẹrị Tẹ
(2 Ama 22.3-20)
8Anị ḅo ori ama-da ḅụ maa kụra fa si la tẹ ori ama mẹ na warị mẹ na ḅụ sunsin oru pịrị sịkịrị siin tẹso, ọ̀ nwẹnị Safani, Azalaya owiḅọtụḅọ ḅe na, Masẹya, opu ama mẹ ḅẹ ḅẹrẹtọnḅọ ḅe na, Joha, Johahazị owiḅọtụḅọ ḍiri-kẹẹḅọ ḅe na fịrịma in mu KỊNỊNYANAḄỌ ọ̀ Tamụnọ ḅe warị mẹ tẹlẹmaa. 9In nwẹnị Hilikaya Sịḅịda-Agbamịẹḅọ ḅe ḍọkụma-ḅo tẹ Tamụnọ warị mẹ ḅio ḅo tẹ koro igbigi mẹ saḅama ọ̀ pịrị, aniemẹ tẹ Livayị furo-ḅẹ-apụ kịnị mẹnjị sọ-na-paka-naarị anga ḍikiḍiki apụ ma Manasẹ na, Iferemu na pịkị Izirẹlị ḅụ kirikọn-apụ mamgba ḅara na, Juda mamgba na, Benijamịnị na, Jeruselemu ḅụ simearị apụ ma ḅara kobiri ḅo aị ma. 10In nwẹnị anị saḅama kẹ tọrụ kẹ KỊNỊNYANAḄỌ ḅe warị mẹ ḍiki ikelemarị apụ ma pịrị, ini nwẹnị anị kẹ KỊNỊNYANAḄỌ ḅe warị mẹ tẹlẹma anị sime-sime ḅara wẹrịarị apụ ma pịrị. 11Ini anị kẹ akanịapụ na, warị nama apụ na pịrịm, ịn kẹ pẹlẹ tẹ aḍụḅarị na, opu siin aḅiri na fẹ tẹ kẹ ye ọlọ kpesi aị na, oluku na mịẹ tẹ kẹ Juda ḅẹ amadapụ ma kẹ kaantẹ warị sọma tẹ ye mẹ tẹlẹmaa. 12Tomi ma nwẹnị minini nyana ḅara kẹ kọrịnama mẹ kọrị, ịn kẹ ịna sịḅịdapụ mịẹ tẹ kọrịnama mẹ ḍiki ikelemarị apụ anie Jahatị na, Obadaya na, Livayị furo-ḅẹ-apụ Mẹrarị owiapụ-awọmẹ ma ḅụụ, na Zẹkaraya na, Mesulamu na, Kohatị owiapụ-awọmẹ ma ḅụụ. Livayị furo-ḅẹ-apụ ma tẹ ye farị ḍin apụ mamgba, 13Ye ḍọkị apụ ma kẹ sịḅị-dam, tẹ fịrị ḅara-ḅara mẹnjịarị apụ mamgba da-da tụkụmam, tẹ Livayị furo-ḅẹ-apụ ma ḅẹ ja apụ anie pịkị ḍiri kẹẹ apụ na, fịrịmẹnjị-opuapụ na, ogigo-aḅọkọ ḍikiḍiki apụ na. 14In kẹ KỊNỊNYANAḄỌ ḅe warị mẹ ḅio ḅo koroma igbigi mẹ pakama ḅoarị ogbo, Hilikaya agbamịẹḅọ ḅe Mozizi ḅụụ ḅụ pịrị wararị KỊNỊNYANAḄỌ ḅe oloko mẹ ḅẹ ḍiri mẹ ḍọkị-ẹrị yee. 15Anịtẹso Hilikaya nwẹnị Safani ḍiri-kẹẹḅọ ḅe ḅẹẹ, “À KỊNỊNYANAḄỌ ḅe warị mẹ ḅio oloko mẹ ḅẹ ḍiri mẹ ḍọkị-ẹrị tẹẹ”; tẹ Hilikaya nwẹnị ḍiri mẹ kẹ Safani pịrị. 16Safani nwẹnị ḍiri mẹ ọkị-ḅo amadaḅọ ḅe pịrị, tẹ ye mịẹ ḅara kẹ sụa ḍuko amadaḅọ ḅe pịrịm, “Kẹ ị́ afịrịmẹnjịapụ ma pịrịm mịẹ ḅẹ aị mẹmgba in mịẹarị. 17KỊNỊNYANAḄỌ ḅe warị mẹ ḅio in ḍọkị-ẹrị igbigi mẹmgba in gugu pakama-ḅo tẹ anị saḅama KỊNỊNYANAḄỌ ḅe warị mẹ ḍiki ikelemarị apụ ma na, kọrịnama kọrị apụ ma na ḅara-ḅio su tẹ.” 18Anịtẹso Safani ḍiri-kẹẹḅọ ḅe nwẹnị ḍuko amadaḅọ ḅe pịrị, “Hilikaya gbọrụ ḍiri kẹ ị̀ pịrị tẹẹ.” Safani nwẹnị amadaḅọ ḅe tọrọkọ ḍiri mẹ go. 19Amadaḅọ ḅe ḍiri mẹ ḅio ḅẹ ẹkwẹn-ḅịḅị ma naa tẹso, ọ̀ nwẹnị ori akapa kan. 20Amadaḅọ ḅe nwẹnị tọn Hilikaya na, Ahikamụ, Safani owiḅọtụḅọ ḅe na, Abidọnị, Mayịka owiḅọtụḅọ ḅe na Safani ḍiri-kẹẹḅọ ḅe na, Asaya, amadaḅọ ḅe fịrịmẹnjịḅọ ḅe na pịrị, tẹ ḅẹẹm, 21“Ó mu ḍọkị paka-ḅo tẹ ḍiri mẹ ḅio ḅẹ ẹkwẹn-ḅịḅị ma gboloma ye gbela yẹrị na, Izirẹlị na Juda na ḅụ kirikọn-apụ ma na pịrị; kẹ gotẹ ọkọ ḅẹẹarị, KỊNỊNYANAḄỌ ḅe ịganị mẹ tẹ paka-ḅo wamịna ọgọnọ sara wararị ye mẹ gburo-gburo wararị, gbala wa KỊNỊNYANAḄỌ ḅe ẹkwẹn-ḅịḅị mẹ wẹrịtẹ mị ḍiri mẹ ḅio kẹẹ wararị ḅara mamgba koko tẹ mịẹ-a ẹrẹsị” 22Anieḅụ Hilikaya na, inima tẹ amadaḅọ ḅe fịrịma apụ ma na nwẹnị Huluda ịkịankoro-ẹrẹḅọ ma ḍọkụma-mu. Árị anie Salumu ta — oriḅe anie Tikiva owiḅọtụḅọ, pịkị Hahasi taa-owiḅọtụḅọ tẹ kapa koko igbe mẹ ḍikiḍikiarị ḅọ ḅe. (Jeruselemu ḅụ Ịwọma Pakama Anga mẹ ḅụ árị angam). Ịn nwẹnị árị na ẹkwẹn. 23Á nwẹnị in ḅẹẹ, “Mịẹ KỊNỊNYANAḄỌ Izirẹlịapụ tẹkẹarị Tamụnọ ḅe ḍuko yee, ‘ḍuko kẹ ị́ fịrịma ḅọ ḅe pịrị 24ḍikii, à siye kẹ mị anga mẹ na, anị ḅụ simearị apụ na ọgọnọ gbana ḅa, wori-anume mamgba tẹ ḍiri mẹ ḅio kẹẹ tẹ Juda ḅẹ amadaḅọ ḅe tọrọkọ arị goo ḅara. 25Kẹ gotẹ ọkọ ḅẹẹarị, ini ị̀ sịkị tẹ kụnụaị dọkịma oru-atamụnọ pịrị tẹ, kẹ ini ịna aḅara kẹ kọrịarị aị mamgba ḅụ sụa mịẹ tẹ; ini ị̀ ḅụụ-ḅẹsọ ye mịẹ tẹ ị̀ ịganị sịn saakị ḅẹ ḅara, anị ẹrẹsị ị̀ ịganị mẹ mị anga mẹ ḅụ ọsụma sara ḅa, anị sakị anị biin ḅịa.’ 26Kụma Juda ḅẹ amadaḅọ ḅe tẹ ó fịrịma ḅo KỊNỊNYANAḄỌ ḅe gbela ḅẹ ḅọ ḅe mịẹ ó ḍuko ọ̀ pịrị ḅarị ḅara, ‘Mịẹ KỊNỊNYANAḄỌ Izirẹlịapụ tẹkẹarị Tamụnọ ḅe ḅẹẹ ḅara: Ị́ naa ẹkwẹn-aḅịḅị ma gboloma ye, 27gbala ị́ si ḅụ pịkị ḅioḅẹngbọ nyanam tẹ ị́ ḅụụ iderimam Tamụnọ tọrọkọ ḅụ, ị́ mị anga mẹ na, anị ḅụ simearị apụ ma na ḅụụ paka ḅarịye naa tẹso, ori ẹkwẹn-ḅịḅị ḅụ, tẹ ị́ tọrọkọ ḅụ ị́ ị́ ḅụụ iderimam, tẹ ị́ akapa kan tẹ owum ẹrẹsị, yẹrị sọ àrị ị́ naa tẹẹ. 28Ḍikii, àrị ị́ kobiri ị́ aḍapụ ḍọkụma-mu ḅa, anị sakị dein ḅụ mịẹ àrị ị́ kobiri mu ḍuḅu ḅio su ḅarịye, tẹ ị́ atọrụngbọ àrị ọkị-ḅo mị anga mẹ na, anị ḅụ simearị apụ ma na ọgọnọ gbana ḅarị siye mẹmgba ẹrị ḅịa.’ ”
Tẹ ịn nwẹnị ẹkwẹn-ḅịḅị mẹ kẹ pịkị-ḅo amadaḅọ ḅe pịrị.
Josaya KỊNỊNYANAḄỌ Ḅe Na Ọḅọkụ Fịm, Ọ̀ ḅịḅị Poki Ḅẹ Ḅara
(2 Ama 23.1-20)
29Anịtẹso amadaḅọ ḅe fịrịma Juda na Jeruselemu na ḅụ omongiapụ mamgba sịn kobiri gbolomam, 30Tẹ amadaḅọ ḅe nwẹnị Juda ḅẹ apụ mamgba na, Jeruselemu ḅụ simearị apụ ma na, agbamịẹapụ ma na, Livayị furo-ḅẹ-apụ ma na, tomi mamgba opu na kala na kẹ iwo KỊNỊNYANAḄỌ ḅe warị mẹ mu; tẹ ọ̀ nwẹnị in naarị ḅara ḅụ ọḅọkụ mẹ ḅẹ ḍiri mẹ tẹ KỊNỊNYANAḄỌ ḅe warị mẹ ḅio in ḍọkị-ẹrị tẹ ḍiri mẹ ẹkwẹn-aḅịḅị mamgba go. 31Amadaḅọ ḅe nwẹnị ò sime anga ḅụ saakị sịẹsime tẹ KỊNỊNYANAḄỌ ḅe tọrọkọ ọḅọkụ fịm, ori ò ḅioḅẹngbọ mẹmgba na, ọ̀ tẹmẹ mẹmgba na kẹ KỊNỊNYANAḄỌ ḅe ḍukamẹnjị tẹ ọ̀ tọn aị ma na, ọ̀ kọrị tẹ iḅi-aị ma na, kẹẹ wararị oloko ma na koko, tẹ mị ḍiri mẹ ḅio kẹẹ wararị ọḅọkụ mẹ ḅẹ ẹkwẹn-aḅịḅị ma ḅẹẹ ḅara mịẹ ḅarị ḅara. 32Anịtẹso ọ̀ nwẹnị Jeruselemu na Benijamịnị na ḅụ emi apụ mamgba mịẹ tẹ in minini ini anị koko ḅa, Jeruselemu ḅụ simearị apụ ma nwẹnị Tamụnọ ịna aḍapụ ma Tamụnọ ḅe ọḅọkụ mẹ wẹrịtẹ ḅẹẹ ḅara mịẹ. 33Josaya nwẹnị ye-yọ mẹmgba tẹ sime Izirẹlịapụ pịrị anga mẹ ḅụ tọn aị mamgba tan siin fama. Tẹ Izirẹlị ḅụ sime apụ mamgba mịẹ tẹ in fịrịmẹnjị KỊNỊNYANAḄỌ ịna Tamụnọ ḅe pịrị. Ori ene mamgba ḅụ in KỊNỊNYANAḄỌ ịna aḍapụ ma Tamụnọ ḅe ḍukamẹnjị ḅụ pịkị so-a.
(C) The Bible Society of Nigeria