2 Paka-aị 32
32
Asiriya Ḅẹ Apụ Ma Jeruselemu Ẹrẹmam
(2 Ama 18.13-37; 19.14-19,35-37; Ayị 36.1-22; 37.8-38)
1Mịna aị ma na, minini amịẹaị ma na ḅọrọ tẹso, Sẹnakeribu Asiriya ḅẹ amadaḅọ ḅe nwẹnị ḅo Juda gbaịn tẹ anị fọịn, tẹ owu kẹ in mịẹ kụrọma wararị opu ama ma paka ḅẹ arị ikelema-koro, koromarị mịnẹ ori ịna inoma ọ̀ ḅụụ pịrị ḅa. 2Hẹzịkaya ẹrịm mịnẹ Sẹnakeribu ḅo tẹ owu kẹ Jeruselemu paka kẹ ḅio tọn tẹso, 3Ọ̀ nwẹnị ọ̀ fịrịmẹnjị-opuapụ na, ori opu atomi na tọn ini ngụngụḅa ma ḅẹ minji mẹ mẹnjị-mẹnjị opu ama mẹ ḅio pakarị anga ma pụnma-a, tẹ ịn nwẹnị ḅarasụa ọ̀ pịrị. 4Tọnwa tomi gburo-gburoma ḅo kobirim, tẹ ịn nwẹnị ngụngụḅa mamgba na, minji mẹnjị-mẹnjị ama mẹ ḅio pakarị kuroro mẹ na pụnma, tẹ ḅẹẹm, “Asiriya ḅe amadapụ ma tiegotẹ ḅo tọnwa minji ḍọkị-ẹrị ḅẹ?” 5Ọ̀ nwẹnị tọn pẹlẹ tẹ ḅara kẹ saakị kọrịnama kọrị tẹ onu mẹ ḅụ kaan-sara tẹ anga mamgba nama tẹ anị ọgọnọ gele awarị nama; nwẹnị anị ḅio mẹnjị paka ḅụ pịkị jen onu nama, tẹ ọ̀ pịkị Devidi opu ama mẹ ḅio in Sara Pakama Kiri mẹ mịẹ kụrọmam. Ọ̀ pịkị ḅẹlẹma gburo-gburoma owuaị na ekpeke na tẹmẹm. 6Ọ̀ nwẹnị owu kiri ḅẹ ḅẹrẹtọn-apụ tọn tomi ma pịrị, tẹ opu ama mẹ ḅẹ ogigo ogboku ḅụ wenimgba kobiri ḅo gboloma ọ̀ ḅụụ pịrị, tẹ ḅiokpọma ḅara kẹ ẹkwẹn in pịrị, tẹ ḅẹẹm, “Ọ́ kụrọ sịẹ tẹ iḅi ḅiokpọ nyana-a. 7Ọ́ ḅalafa anịanịa ḅụụ tukutuku nyana ma Asiriya ḅẹ amadaḅọ ḅe na, ori na simearị ikele-ikelearị ibe mẹmgba na tọrọkọ; kẹ gotẹ ọkọ ḅẹẹarị, ḍụḅa ini na simearị ḅọ nẹngị gbọrụḅọ wamịnị na emi. 8Ori na simearị ye meni ḅara-kọngọ; kụma wamịnị na sime tẹ ḅarasụa wa pịrị tẹ wamịna owu mẹ sọ ḅarị ḅọ anie KỊNỊNYANAḄỌ wamịna Tamụnọ ḅe” Tẹ tomi ma nwẹnị Hẹzịkaya, Juda ḅẹ amadaḅọ ḅe ẹkwẹn-aḅịḅị ma ḅụ ḅiokpọ nyana. 9Miemẹ ḅọrọ tẹso, Sẹnakeribu, Asiriya ḅẹ amadaḅọ ḅe tẹ ori ọmụ-ogbo mẹmgba kẹ Lakisi ikelema-koro tẹ owu paka ḅẹ ḅọ ḅe nwẹnị ori afịrịmẹnjịapụ kẹ Jeruselemu ḅẹ Hẹzịkaya, Juda ḅẹ amadaḅọ ḅe na, Jeruselemu ḅụ simearị Juda ḅẹ apụ mamgba na fịrịma, tẹ ḅẹẹm, 10Mịẹ Sẹnakeribu, Asiriya ḅẹ amadaḅọ ḅe ḍuko yee, “Ị́ tiye ḅụ sịrẹrẹ wararị Jeruselemu ḅụ tẹ ama ikelema-koro tẹ owu pakarị ọmụapụ daasịẹ ḅẹ? 11Hẹzịkaya ori etela kẹ ọmịna ḍie irima-a mịẹ tẹ ori ọ́ kẹ ḅuru-ḅa na minji pọkọ tarị na ḅụ fịị ḅio su ḅẹ ḅara, ò ḍuko ọ́ pịrịarị, ‘KỊNỊNYANAḄỌ wamịna Tamụnọ ḅe Asiriya ḅẹ amadaḅọ ḅara-ḅio wa ḍụa ḅọrọma ḅa.’ 12Ḅị gbọrụ Hẹzịkaya ḅe mịẹ ó gele ayeyọ ma na ori ebeka ma na kan siin tẹ tọn Juda na Jeruselemu na pịrịm, ‘Gbọrụ agbamịẹ-anga tọrọkọ mịẹ ọ́ tẹkẹ ḅarịye, anị ọgọnọ mịẹ ọ́ pịkị ọmịna agba dọkịma ḅarịye,’ ḅẹẹ ḅọ ḅe ori-a? 13Yẹrị na ị̀ aḍapụ ma na kẹ ja asịẹ ḅẹ atomi mamgba mịẹ tẹ ye ó nimi-a? Arị asịẹ ma ḅẹ atamụnọ ma, in inetẹ ḅo ì ḅara ḅụ in ama ma ḍụa ḅọrọma pakama? 14Ị̀ aḍapụ ịkatakirikọn-a-ḅara kẹ ḅaa asịẹ ma ḅẹ atamụnọ mamgba ḅụ, tọ tamụnọ inetẹ ị̀ ḅara ḅụ amịna tomi ḍụa ḅọrọma, tẹ ọmịna Tamụnọ inetẹ ị̀ ḅara ḅụ ọ́ ḍụa ḅọrọma na-iḅi? 15Ọkọẹrẹsị ó minini tẹ mịọkụ Hẹzịkaya oḅori kẹ ọ́ sịn, anịanịa mị-ḅara kẹ etela kẹ ó ḍie irima tẹ ọmịnị ò minini ma, kẹ gotẹ ọkọ ḅẹẹarị, gbọrụ opu sịẹ atamụnọ, anịanịa ama-da kụrọ sọ ofori ị̀ ḅara, anịanịa ị̀ aḍapụ ma ḅara ḅụ inetẹ amịna atomi ḍụa ḅọrọma ḅẹ ḅọ. Arị atamụnọ ma sọ ine-a kụma, ọmịna Tamụnọ rẹ mịẹ inetẹ ọ́ ḍụa ḅọrọma ḅẹ ye?” 16Ori afịrịmẹnjịapụ ma paa jaị-jaị ḍuko KỊNỊNYANA-TAMỤNỌ ḅe na, ọ̀ fịrịmẹnjịḅọ Hẹzịkaya na simam. 17Ọ̀ nwẹnị KỊNỊNYANAḄỌ Izirẹlịapụ tẹkẹarị Tamụnọ ḅe kẹ ye-sịn-a tẹ ò fie sima ḍiri kẹẹ, tẹ ḅẹẹm, “opu asịẹ mẹ ama ma ḅẹ atamụnọ inetẹ ị̀ ḅara ḅụ amịna atomi ḍụa ḅọrọma-a ḅara mịẹ Hẹzịkaya Tamụnọ ḅe sọ inetẹ ị̀ ḅara ḅụ ori atomi ḍụa ḅọrọma ḅịa ḅara.” 18In nwẹnị anị kẹ Juda ḅịḅị ḅụ gele pọkọ kẹ oloku pakama Jeruselemu ḅẹ apụ tẹ onu mẹ ọgọnọ simearị apụ ma pịrị, kẹ ịna ḅalafama tẹ in tẹmẹ-naịn-naịn, mịẹ tẹ ini opu ama mẹ ọkị ḅẹ ḅara. 19In nwẹnị arị atamụnọ ma tẹ in ḅara kẹ kịra tomikiri ḅẹ atomi pịrị atamụnọ ma ḅụụ ẹkwẹn ḅara kẹ Jeruselemu ḅẹ Tamụnọ ḅe ḅụụ ẹkwẹn.
Tamụnọ Jeruselemu Ḍụa-ḅọrọma Tẹ
20Anịtẹso Hẹzịkaya amadaḅọ ḅe na, Ayịzaya, ịkịankoroḅọ Emọzị owiḅọtụḅọ ḅe na nwẹnị miemẹ gotẹ tẹkẹ tẹ owu so pịrị. 21KỊNỊNYANAḄỌ ḅe nwẹnị gbọrụ enjẹlị fịrịma tẹ ọ̀ nwẹnị ọmụ-ogbo mẹ na, ḅẹrẹtọn-apụ ma na, fịrịmẹnjị-opuapụ mamgba na pẹlẹ-ḅaa fama. Anieḅụ ọ̀ nwẹnị ḅụụ-jịrị tọrụ kẹ so ò soku-ḅẹ ama mu. Ò ḅo ọ̀ tamụnọ warị mẹ ḅio sọ tẹso, ori ḅara na iyi owiapụ-awọmẹ ma ḅe ja apụ nwẹnị okologie kẹ ọ̀ pẹlẹ-ḅaa anị jụ. 22Mị-ḅara mịẹ KỊNỊNYANAḄỌ ḅe kẹ Hẹzịkaya na Jeruselemu ḅụ simearị apụ ma na ḅọrọma ḅara Sẹnakeribu, Asiriya ḅẹ amadaḅọ ḅe ḅara ḅụ na, ori na fịya-a apụ mamgba na ḅara ḅụ; tẹ ọ̀ nwẹnị pakịrị-pakịrị ḅụ ịnyọsara kẹ ọ̀ pịrị. 23Tọnwa apụ nwẹnị ḅo ḍiepịrị-aị kẹ KỊNỊNYANAḄỌ ḅe pịrị Jeruselemu ḅụ, tẹ ḅụụ ḅụ yela aị kẹ Hẹzịkaya Juda ḅẹ amadaḅọ ḅe pịrị, anie mịẹ tẹ anị sakị ọkị tọrọkọ mu opu asịẹ mamgba tọrụ ḅụ ọ̀ nwẹnị saakị gele.
Hẹzịkaya Obim Tẹ Pịkị Ọ̀ Ḅụụ Gelemam
(2 Ama 20.1-3,12-19; Ayị 38.1-3; 39.1-8)
24Arị ene ma ḅụ Hẹzịkaya nwẹnị obi tẹ fịị-fịị ḅara sime. Ọ̀ nwẹnị KỊNỊNYANAḄỌ ḅe tẹkẹ, tẹ ọ̀ nwẹnị ọ̀ pakịrị tẹ elekima kẹ ò ḍie. 25Kụma Hẹzịkaya pịkịma-ḅo-a, kẹ ọ̀ mịẹ iḅi mẹmgba ḅụ, gbala ori ò ḅioḅẹngbọ ḅụ opu amịẹaị mịẹ tẹ ẹrẹsị. Anị ẹrẹsị ịganị nwẹnị ḅo ori na, Juda na, Jeruselemu na ọgọnọ gbana. 26Kụma Hẹzịkaya nwẹnị ò ḅioḅẹngbọ ḅụ ọ̀ nyana opu amịẹaị ma ḅụ ọ̀ ḅụụ iderima, ori na Jeruselemu ḅụ simearị apụ ma na, anie mịẹ tẹ KỊNỊNYANAḄỌ ḅe ịganị ḅarị ini ọgọnọ gbana-a Hẹzịkaya ene ma ḅụ.
Hẹzịkaya Ngọ Na Iḅi Na
27Hẹzịkaya ḅẹlẹma gburo-gburotẹ ngọ na kụn na nyanam; ò seleḅa na, golu, na yela aḍụḅarị na, ẹnyị na, ekpeke na, gburo-gburotẹ igbigi la ẹfẹrẹ ḅara-ḅara mamgba na koko anga nyana gberie-gberie pịrị sikima ọ̀ ḅụụ pịrịm, 28Ọ̀ pịkị ye koko awarị nyana sịnmgbọlụ na, sịnmgbọlụ ḅụ paka-ḅo iru na, pulo na pịrịm; tẹ opu anama koko anga nyana kẹ opu anama ḅara-ḅara mamgba na, anana ogbo-ogbo na pịrịm. 29Ori anị gbọrụ ḅara ḅụ opu ama pakama-pakama ọ̀ ḅụụ pịrịm, tẹ gburo-gburoma anana ogbo-ogbo na, nama ogbo-ogbo na nyanam; gbala Tamụnọ gburo-gburoma tọnwa aị kẹ ọ̀ pịrị tẹ ọ̀ nyanam ẹrẹsị. 30Ḅị gbọrụ Hẹzịkaya ḅe mịẹ Gihọnị ḅẹ minji mẹ tẹ ọgọnọ pakịrị sararị ye mẹ gbaịn tẹ anị da pịkị iderima Devidi opu ama mẹ ḅẹ ịrụa-ideriarị-anga mẹ da ḅo. Hẹzịkaya nwẹnị ọ̀ kọrịnama mamgba ḅụ lolo. 31Anieḅụ Babịlọnị ḅẹ epele afịrịmẹnjịapụ ma, inima tẹ ịn kẹ ọ̀ fịrịma tẹ ḅo ama mẹ ḅio paka elekima mẹ gbela nimi ḅẹ apụ ma in nwẹn fịrịma ḅo sakị, Tamụnọ nwẹnị ọ̀ ḅụụ ḅụ amịna ḅụụ ḅẹlẹma, kẹ ọ̀ da ḍiki tẹ ò ḅioḅẹngbọ sime aị mamgba nimi ḅẹ ḅara.
Hẹzịkaya Ama-da Kunoma Mẹ
(2 Ama 20.20-21)
32Mịọkụ Hẹzịkaya amịẹaị ḅụ kiri kọn aị ma na, ori iḅi akọrịnama na, arị Ayịzaya ịkịankoroḅọ ḅe, Emọzị owiḅọtụḅọ ḅe koro ịkịan mẹ ḅio kẹẹ wararị Juda na, Izirẹlị na Amadapụ ma ḍiri mẹ ḅio. 33Hẹzịkaya nwẹnị fịị, tẹ ini ò ḍiḅim Devidi owiapụ-awọmẹ ma aḍuḅu ma ḅẹ kpọlị iwo anga ḅụ; tẹ Juda mẹmgba na, Jeruselemu ḅụ simearị apụ ma na nwẹnị ọ̀ fịị ḅụ kụn kẹ ọ̀ pịrị. Ori owiḅọtụḅọ Manasẹ nwẹnị ò kiri ọkị tẹ ama-da.
(C) The Bible Society of Nigeria