2 Paka-aị 30
30
Ḅụ Tẹlẹma Saḅaḅọrọ-Alalị Pịrị Ḅara
1 #
Kịẹ 9.9-11
Hẹzịkaya ḅịḅị kẹ Izirẹlị na, Juda mẹmgba na fịrịmam, tẹ pịkị ḍiri kẹẹ kẹ Iferemu na, Manasẹ na fịrịmam mịnẹ in KỊNỊNYANAḄỌ ḅe warị mẹ ḅoo Jeruselemu ḅụ, tẹ Saḅaḅọrọ-Alalị mẹ fị KỊNỊNYANAḄỌ Izirẹlịapụ tẹkẹarị Tamụnọ ḅe pịrịị. 2Gbala amadaḅọ ḅe na, ori asịḅịdapụ ma na, Jeruselemu ḅụ kobiri-ogbo mẹ na maaịn karama akalụ mẹ ḅụ saḅa-ḅọrọ Alalị mẹ fị ḅẹ ḅịḅị-kẹ-ogbosọ tẹẹ ẹrẹsị. 3Kẹ gotẹ ọkọ ḅẹẹarị, ịkịankoroapụ ma amụ kịẹn-ḅịḅị ḅụ ịna ḅụụ mịẹ fịafịama la na-iḅi ḅara la-a, tomi ma pịkị amụ Jeruselemu ḅụ kobiri-a ẹrẹsị ini inetẹ anị ḅẹ sakị ḅụ anị fị-a. 4Amadaḅọ ḅe na kobiri-ogbo mẹmgba na nwẹnị ẹrị mịnẹ anị tọọn ḅara mẹ kuram. 5Anieḅụ ịn nwẹnị ḅịḅị-kẹ-ogbosọ mịnẹ in kpo-kpo gbolo Izirẹlị mẹmgba ikelema ḅa Danị ḅụ ọkị mu Biyasẹba la mịnẹ, tomi ma ḅo KỊNỊNYANAḄỌ Izirẹlịapụ tẹkẹarị Tamụnọ ḅe Saḅaḅọrọ-Alalị mẹ fị Jeruselemu ḅụ; kẹ gotẹ ọkọ ḅẹẹarị, amụ in gburo-gburotẹ kịẹn-ḅịḅị ḅụ in ḅẹẹm kẹ Alalị mẹ fị ḅẹ ḅara kẹ anị fị-a. 6Anieḅụ karakara ḅara kẹ fọnya oku dogi mẹnjịarị fịrịmẹnjịapụ nwẹnị amadaḅọ ḅe na, ori sịḅịdapụ ma na, ḅara ḅụ amadaḅọ ḅe wẹrịtẹ tọn tẹ ḅara ḅụ kẹẹ wararị aḍiri ma kẹ Izirẹlị na, Juda na mu ikelema, tẹ ḅẹẹm, “yei Izirẹlịapụ, ọ̀ pịkịma KỊNỊNYANAḄỌ ḅe, anie Ebira-amụ na Ayịzịkị na pịkị Izirẹlị na sịḅị-tuu pịrị Tamụnọ ḅe ḍọkụma-ḅoo, mịẹ tẹ ò siin pịkị ọmịna ḅụụ Asiriya ḅẹ amadaḅọ ḅe ḅara ḅụ mangị-so wararị kirikọn boowa apụ ma ḍọkụma-mu ḅẹ ḅara. 7Ọmịnị ọmịna aḍapụ na, ọmịna mịnapụ na sime-ḅara sime ma, inima tẹ KỊNỊNYANAḄỌ ịna ḍapụ ma Tamụnọ ḅe ḅụụ minini nyana apụ ma, anie mịẹ tẹ ọ̀ nwẹnị ọmịnị ẹrị ḅara ḅụ ịn kẹ fatẹ apụ mịẹ. 8Mịọkụ ọ́ ḅarị kọngọ kuroma ma, ọmịna ḍapụ ma wẹrịtẹ sime-ḅara, kụma ọmịnị ọmịna aḅụụ sịkị KỊNỊNYANAḄỌ ḅe pịrịị, tẹ ọ̀ fịafịa yọ ḅoo, anịanga mẹ tẹ ọ̀ mịẹ fịafịama gbamaso tẹ anga mẹ, tẹ fịrịmẹnjị KỊNỊNYANAḄỌ ọmịna Tamụnọ pịrịị, mịẹ tẹ ọ̀ ḅalafama ịganị mẹ ọmịna ḅụụ ḅụ pịkị so ḅe ḅara. 9Kẹ gotẹ ọkọ ḅẹẹarị, ọ́ pịkịma KỊNỊNYANAḄỌ ḅe ḍọkụma-ḅo ḅoo, ọmịna mịnapụ na, ọmịna awọmẹ na ịna kun apụ ma ḅụụ sịḅị-kụrụkụrụ na ḅarasụa na ḍọkị-ẹrị ḅa, tẹ pịkịma mị ama mẹ ḅo ḅa. Kẹ gotẹ ọkọ ḅẹẹarị, KỊNỊNYANAḄỌ ọmịna Tamụnọ ḅe ḍiki-ḅụụjịrị na, sịḅị-kụrụkụrụ na nyana wararị tẹ ọmịna ḅụụ ọ̀ tọrụ pịkị siin ḅịa, ọ́ pịkịma ọ̀ ḍọkụma-ḅo ḅoo”. 10Anieḅụ karakara ḅara kẹ fọnya oku dogi mẹnjịarị fịrịmẹnjịapụ ma nwẹnị gbọrụ opu ama ḅụ so jen opu ama mu Iferemu opu sịẹ mẹ na, Manasẹ na ḅụ ọkị mu Zẹbulọnị jụjụ-ḅio la; kụma ḍẹrị mie ini in ḍẹrị pọndọ tẹ in kombo ye. 11Boowa apụ ngẹrị mịẹ Asa na, Manasẹ na, Zẹbulọnị na ḅụ amịna ḅụụ iderima tẹ Jeruselemu ḅo ye. 12Tamụnọ ḅara mẹ Juda ọgọnọ ḅụ pịkị emi tẹ gbọrụ ḅioḅẹngbọ kẹ in pịrị tẹ ini amadaḅọ ḅe na, amadapụ ma owiapụ-awọmẹ ma na KỊNỊNYANAḄỌ ḅe ẹkwẹn-ḅịḅị mẹ ḅụ tọn in pịrị ye mẹ mịẹ ḅẹ ḅara.
Saḅaḅọrọ-Alalị Mẹ In Fị Tẹ
13Tọnwa tomi maaịn karama akalụ mẹ ḅụ sun-a fịturu Alalị mẹ fị gotẹ Jeruselemu ḅụ ḅo kobirim, gburo-gburo lama tẹ kobiri-ogbo. 14In kọrịnama kẹ in pịrịm, tẹ in Jeruselemu ḅụ sime ebeka ma kan siinm. Ebeka mamgba tẹ ịn kẹ dọkịma-agba mịẹarị aị na, kụnụaị dọkịmarị aị na in tan siin tẹ kẹ Kidirọnị tụndụ ogboku ḅụ nguma famam. 15Maaịn karama akalụ mẹ ḅẹ ngei aḍin fa jei eneḅaka ḅụ ịn nwẹnị Saḅaḅọrọ-Alalị asambịrịma anana ḅẹ ḅaa. Ini agbamịẹapụ ma na Livayị furo-ḅẹ-apụ ma na ḅụụ-jịrịmam, anie mịẹ tẹ ini ịna ḅụụ mịẹ fịafịamam, tẹ dọkịma-agba mịẹ aị kẹ KỊNỊNYANAḄỌ ḅe warị mẹ ḅio sọ ḅom. 16Mozizi Tamụnọ tomḅọ ḅe oloko mẹ wẹrịtẹ ḅẹẹ ḅara in sime tẹ ịna ḅụụ fị tẹ akiri ma ḅụ in simem. Agbamịẹapụ ma Livayị furo-ḅẹ-apụ ma ḅara ọmbie mẹ da ọkị tẹ kẹ asanam. 17Kẹ gotẹ ọkọ ḅẹẹarị, amụ amịna ḅụụ mịẹ fịafịama-a tọnwa-apụ kobiri-ogbo mẹ ḅio emi; anịẹrẹsị Livayị furo-ḅẹ-apụ ma nwẹnị Saḅaḅọrọ-Alalị asambịrịma anana ḅe ḅaa fịafịa-aḅọ goḅọ-goḅọ pịrị, mịẹ tẹ anị fịafịa KỊNỊNYANAḄỌ ḅe pịrị ḅẹ ḅara. 18Tomi ma ḅụ gburo-gburo tọnwa-apụ tẹ Iferemu na, Manasẹ na, Ịsaka na, Zẹbulọnị na ḅụ ḅo apụ ma amụ amịna ḅụụ mịẹ fịafịama-a, ịn nwẹnị Saḅaḅọrọ-Alalị mẹ fị-fị ḅara fị-a tẹ jen ḅara kẹ anị fịm. Hẹzịkaya tẹkẹ in pịrị tẹ ẹrẹsị, tẹ ḅẹẹm, “Yee iḅi KỊNỊNYANAḄỌ ḅe ḅo mịẹ-irima wẹrịso ḅẹḅọ-ḅẹḅọ, 19tẹ amịna ḅioḅẹngbọ kẹ Tamụnọ, ọ̀ ḍa ḅe KỊNỊNYANA-TAMỤNỌ ḅe ḍọkị ọgọnọ gbana ḅọ gbana ḅọ pịrị, anị fịafịa yọ mẹ ḅẹ ḅụụ-fịafịama ḅụụ ḍikiḍiki oloko mẹ wẹrịtẹ ḅẹẹ ḅara sime-a ḅẹsọ.” 20Tamụnọ nwẹnị Hẹzịkaya tẹkẹ naa, tẹ tomi ma gwọọ. 21Izirẹlịapụ ma tẹ Jeruselemu ḅụ sime apụ ma sọnọma ḍin kẹ sun-a fịturu Alalị mẹ fịm gburo-gburotẹ ḅioḅẹlẹ ḅụ; tẹ Livayị furo-ḅẹ-apụ ma na, agbamịẹapụ ma na nwẹnị KỊNỊNYANAḄỌ ḅe tokini ịna ịnyọ mẹmgba kẹ ene-ḅaaene-ḅaaene nume su-su KỊNỊNYANAḄỌ ḅe pịrị ḅụ. 22Hẹzịkaya nwẹnị ḅiokpọma ḅara kẹ ẹkwẹn Livayị furo-ḅẹ-apụ mamgba tẹ ẹkwẹn KỊNỊNYANAḄỌ ḅe fịrị mẹ ḅụ iḅiye mịẹ ḍin ḍie-pakama apụ ma pịrị.
Ịn Maaịn Karama Sakị Kẹ Alalị Fịm
Anieḅụ tomi ma sọnọma aḍin kẹ Alalị mẹ ḅẹ fịye mẹ fịm, dein-pịrị-agba mịẹm, pịkị ịmịẹtẹ kẹ KỊNỊNYANAḄỌ ịna aḍapụ ma Tamụnọ ḅe ḅẹẹm. 23Anịtẹso bebe kobiri-ogbo mẹ nwẹnị ḅịḅị-kẹ-ogbosọ gboloma in jen sọnọma ḍin kẹ Alalị mẹ fị ḅa; anieḅụ ịn nwẹnị jen sọnọma ḍin kẹ anị wẹrị ḅioḅẹlẹ ḅụ. 24Hẹzịkaya, Juda ḅẹ amadaḅọ owi-nambulo maa ẹndẹ oyia asi finji (1,000) na, anana tẹra ẹndẹ fa si anana oyia asi na (7,000) kẹ kobiri-ogbo mẹ pịrịm kẹ agba mịẹ, tẹ sịḅịdapụ ma nwẹnị owi-nambulo maa ẹndẹ oyia asi finji (1,000) na, anana puku sọnọ ẹndẹ finji (10,000) na kẹ kobiri-ogbo mẹ pịrị. Agbamịẹapụ ma nwẹnị gburo-gburotẹ kịẹn-aḅịḅị ḅụ ịna ḅụụ mịẹ fịafịama. 25Bebe Juda ḅẹ kobiri-ogbo mẹ na, agbamịẹapụ ma na, Livayị furo-ḅẹ-apụ ma na, bebe kobiri-ogbo mẹ tẹ Izirẹlị ḅụ paka-ḅo ye mẹ na, bịan apụ tẹ Izirẹlị mẹ ḅio paka-ḅo apụ na, Juda ḅụ anga bịan apụ ma na nwẹnị ḍereku. 26Anieḅụ gburo-gburotẹ ḍereku Jeruselemu ḅụ pakam. Kẹ gotẹ ọkọ ḅẹẹarị, Izirẹlị ḅẹ amadaḅọ Devidi owiḅọtụḅọ Sọlọmọnị sakị kụra-ḅio Jeruselemu ḅụ nwẹn pembe ye amụ mịẹ-a. 27Anịtẹso agbamịẹapụ ma na, Livayị furo-ḅẹ-apụ ma na nwẹnị saakị tẹ tomi ma boma, tẹ KỊNỊNYANAḄỌ ḅe nwẹnị ịna pọkọ naa, tẹ ịna tẹkẹ ḅo So-ḅio ọ̀ fịafịa sime yọ lam.
(C) The Bible Society of Nigeria