2 Paka-aị 28
28
Juda Ḅẹ Amadaḅọ Ahazi
(2 Ama 16.1-4)
1Ahazi sịḅị si kụra ḅọrọ tẹso, ọ̀ saakị ama-dam, tẹ inia kụra fa si kẹ Jeruselemu ḅụ ama-dam. Ọ̀ KỊNỊNYANAḄỌ ḅe tọrụ ḅụ kuraye mịẹ-a, ọ̀ ḍa Devidi mịẹ ḅara. 2Kụma Izirẹlị ḅẹ amadapụ ma mẹnjị etela mịẹ ọ̀ mẹnjị ye. Ori rẹ ye kịkama tẹmẹ-tẹmẹ tẹ kẹ Balị oru-atamụnọ ma pịrịm, 3Tẹ Bẹnị-hinomu tụndụ-ogboku ḅụ kụnụaị dọkịmam, tẹ agbamịẹ ḅara ḅụ ori owiapụ-awọmẹ sọ dọkịmam, tọn-tọn amịẹaị ma tẹ KỊNỊNYANAḄỌ ḅe Izirẹlịapụ ma tọrọkọ dee opu asịẹ ma wẹrịtẹ mịẹ-mịẹ ḅara. 4Gele ayeyọ ma ḅụ na, tụndụ ma ọgọnọ na, pịkị eleleinda tọrụ ḅịya opu asịn suku goyegoye ḅụ ori agba mịẹm tẹ kụnụaị dọkịmam.
Siriya Na Izirẹlị Na Ori Na Gbin Ọmụ
(2 Ama 16.15)
5 #
2 Ama 16.5; Ayị 7.1 Anịẹrẹsị KỊNỊNYANAḄỌ ọ̀ Tamụnọ ḅe ọ̀ kẹ Siriya ḅẹ amadaḅọ ḅe ḅara-ḅio sunm, oriḅe tẹ ọ̀ nẹngịma tẹ gburo-gburotẹ kịẹn-ḅịḅị ḅụ ori atomi kun tẹ ịn kẹ Damasịkọsị ḅo ḅọ ḅe. Ọ̀ pịkị ọ̀ kẹ Izirẹlị ḅẹ amadaḅọ ḅe ḅara-ḅio sunm, oriḅe tẹ gburo-gburoma kịnị ḅaa kẹ ọ̀ nẹngịma ḅọ ḅe. 6Kẹ gotẹ ọkọ ḅẹẹarị, Pẹka Rẹmalaya owiḅọtụḅọ ḅe kpọkpọ gbọrụ ene ḅụ kịnị jei puku (120,000) ḅaam Juda ḅụ, inimgba ḅiokpọtẹ ọmụgbin ḅara-ḅaatẹ apụ famam, anị kẹ gotẹ ọkọ mịẹ ye, in KỊNỊNYANAḄỌ ịna aḍapụ ma Tamụnọ ḅe sịkịm. 7Tẹ Zikiri, Iferemu ḅụ kụrọtẹ opu tomḅọ ḅe nwẹnị Masẹya, amadaḅọ owiḅọtụḅọ ḅe na, Azirikamu ama-da opu warị mẹ ḅẹ ḅẹrẹtọnḅọ ḅe na, Ẹlịkena amadaḅọ ḅe palị tẹ ḅẹrẹtọn-arị ḅọ ḅe na ḅaa. 8Izirẹlịapụ ma nwẹnị pịkị ịna mịnapụ ma ḅụụ kịnị si sọnọ apuku finji (200,000) ereme na, owiapụ-awọmẹ na, eremịna-awọmẹ na kun ọkị; in pịkị ye ḅụ ḅẹ tọnwa aị fọịn ọkị Sameriya mum.
Odẹdị Ịkịankoroḅọ Ḅẹ Koro Ịkịan
9Kụma gbọrụ ịkịankoroḅọ anịjụ simem, ịn kẹ Odẹdị sịn ḅọ ḅe: ọ̀ nwẹnị paka Sameriya ḅo ọmụ-ogbo mẹ na bịama ḅẹ mu, tẹ nwẹnị in ḅẹẹ, “ḍikii, KỊNỊNYANAḄỌ ọmịna aḍapụ ma Tamụnọ ḅe kọn Juda pịrị ịganị ẹrẹsị, ori ịn kẹ ọmịna ḅara-ḅio sunm, kụma ó ḅio fụkụ-fụkụ kẹ in ḅaa tẹ ọ́ kẹ in ḅaa ḅara mẹ mu so la tẹ. 10Mịọkụ ọ́ pịkị Juda na Jeruselemu na ḅẹ apụ ma ḅụ owiapụ na, ereme na kẹ ọmịna suku-ḅio suu tẹ kẹ omoniapụ sọma ḅẹ-ḅiiarị. KỊNỊNYANAḄỌ ọmịna Tamụnọ ḅe ḅụụ ọmịna soku-ḅẹ si tẹ ọ̀ mịẹ ye ofori? 11Mịọkụ ọmịnị ị̀ pọkọ naa, tẹ ọmịna mịnapụ ma tẹ ó kuun-ọkị tẹ apụ ma fịrịma pịkịị, kẹ gotẹ ọkọ ḅẹẹarị, KỊNỊNYANAḄỌ ḅe ḅalafama ịganị ọmịna ọgọnọ gbana tẹ.” 12Iferemu ḅẹ apụ ma ḅẹ ja alapụ Azaraya, Johananị owiḅọtụḅọ ḅe na, Bẹrẹkaya, Mẹsịlẹmọtị owiḅọtụḅọ ḅe na, Jehizikaya, Salumu owiḅọtụḅọ ḅe na, Amasa, Hadilayị owiḅọtụḅọ ḅe na so ọmụ mẹ ḅio ḅoarị apụ ma ẹngbẹsẹ, 13tẹ in ḅẹẹm, “ọmịnị ó kun apụ ma kẹ mị yọ so ḅo ḅịa, kẹ gotẹ ọkọ ḅẹẹarị, ọ́ KỊNỊNYANAḄỌ ḅe ḅụụ ḅẹrẹ-ḅarasii ọkị-ḅo mịọkụ wa mịẹ tẹ asi na, nyana wararị ḅẹrẹ-ḅarasii na ḅụ sụa ḅẹ tẹ. Kẹ gotẹ ọkọ ḅẹẹarị, mịọkụ mẹ sọ wa nyana tẹ ḅẹrẹ-ḅarasii gburo-gburo tẹẹ, tẹ ḅalafama ịganị sime Izirẹlị pịrị wararị.” 14Anieḅụ ọmụapụ ma nwẹnị in kun apụ ma na, in fọịn wararị aị ma na kẹ sịḅịdapụ ma na kobiri-ogbo mamgba na tọrọkọ koroma so. 15Tomi ma tẹ ini ẹrẹ go apụ ma nwẹnị in kun apụ ma ọkị tẹ in fọịn ḅo aị ma ḅụ kapa kẹ ịna ḅio ḅụ paụ wararị apụ mamgba sụa; in kapa na, okuro na kẹ in pịrị sụam; in fịye na, iru na kẹ in pịrịm, pịkị olo kẹ in ọmbịm; ịn nwẹnị yedogi-anama ọgọnọ ḅụ ịna ḅio ḅụ ịnyọ lọkọ lama tẹ apụ mamgba sẹịn Jeriko, eneme akụrọ ḅin wararị opu ama mẹ ḅụ ịna mịnapụ pịrị. Anịtẹrẹmẹ in pịkịma-so Sameriya mum.
Ahazi Asiriya Ḅụ Ḅarasụa Ḅiim
(2 Ama 16.7-9)
16Anị sakị mẹ ḅụ Ahazi fịrịma mu Asiriya ḅẹ amadaḅọ ḅe ḅara ḅarasụa ḅiim. 17Gbala Idọmụ ḅẹ apụ ma pịkị siin owu kẹ Juda paka tẹ in nẹngịma tẹ kịnị kun so tẹ. 18Filisiteniapụ ma tẹịn-tẹịntẹ atụndụ ma ḅio ḅẹ ama ma na, Juda suku-jụ ḅẹ ama ma na gbaịn tẹ arị fọịnm. In nwẹnị pịkị Bẹtị-Semesi na, Ahijalọnị na, Gẹdẹrọtị na, Sọkọ na anị ḅẹ kala-ama na, Timina na anị ḅẹ kala-ama na pịkị Gimizo na anị ḅẹ kala-ama na ọkị tẹ arị anga ma ḅụ kuro anga. 19Anị kẹ gotẹ ọkọ mịẹarị, KỊNỊNYANAḄỌ ḅe Ahazi Izirẹlị ḅẹ amadaḅọ ḅe gotẹ Juda ọkị-ḅo iderima koroma tẹ, kẹ gotẹ ọkọ ḅẹẹarị, ò Juda ḅụ kuroma nyana-a ḅara mịẹm pịkị KỊNỊNYANAḄỌ ḅe ḅụụ minini nyana-a ḅara simem. 20Anieḅụ Asiriya ḅẹ amadaḅọ Tigilati-pilesa nwẹnị ḅo ò si anga sịẹ tẹ ḅụụ-fụka kẹ ọ̀ pịrị ori ịnyọ kẹ ọ̀ pịrị ḅẹ nakara. 21Ahazi nwẹnị KỊNỊNYANAḄỌ ḅe warị mẹ ḅio na, amadaḅọ ḅe warị mẹ ḅio na, sịḅịdapụ ma na ḅụụ ye ọkị tẹ kẹ Asiriya ḅẹ amadaḅọ ḅe pịrịm; kụma anị ḅarasụa ọ̀ pịrị-a.
Ahazi Mịẹ Asi Na Ọ̀ Fịị Na
22Mị gbọrụ Amadaḅọ Ahazi ḅe, ọ̀ ḅụụ-fụka sakị ḅụ sọ ọ̀ paa KỊNỊNYANAḄỌ ḅe ḅụụ minini nyana-a tarị ḅara nẹngịm. 23Kẹ gotẹ ọkọ ḅẹẹarị, ori agba mịẹ ọ̀ nẹngịma wararị Damasịkọsị ḅẹ atamụnọ ma pịrịm, tẹ ḅẹẹm, “Gbala Siriya ḅẹ amadapụ ma atamụnọ ma ḅarasụa in pịrịm ẹrẹsị, àrị agba mịẹ in pịrị ḅa mịẹ tẹ in ḅarasụa ị̀ pịrị ḅarị ḅara.” Kụma ini mie ori na Izirẹlị mẹmgba na ḅaa ịnyọ ḅinmarị ye. 24Ahazi nwẹnị Tamụnọ warị mẹ ḅẹ ẹfẹrẹ ma kobiri ḅo gboloma, tẹ Tamụnọ warị mẹ ḅẹ ẹfẹrẹ ma kẹ pakịrị-pakịrị pẹlẹ puu, tẹ ọ̀ nwẹnị KỊNỊNYANAḄỌ ḅe warị mẹ ḅẹ aḅọkọ ma ịkasị; anịsakị ọ̀ nwẹnị ḅarana Jeruselemu ḅẹ ịkọlị goyegoye ḅụ ebeka nama. 25Juda ḅụ opu ama goyegoye ḅụ ò gele ayeyọ pakamam kẹ kụnụaị dọkịma oru-tamụnọ pịrị ḅẹ ḅara, tẹ KỊNỊNYANAḄỌ ori aḍapụ ma Tamụnọ ḅe ịganị sịn saakị. 26Mịọkụ ori amịẹaị ḅụ kirikọn-aị na ori etela mamgba na tarịye ḅụ ọkị mu kunoma ye la, ḍikii, arị Juda na, Izirẹlị na ḅẹ Amadapụ ma ḍiri ḅio kẹẹ wararị. 27#Ayị 14.28Tẹ Ahazi fịịm, tẹ in Jeruselemu mẹ ḅio ò ḍiḅim, in gbala Izirẹlị ḅẹ amadapụ ma ḍiḅi-ḍiḅi aḍuḅu ma ḅio ò ḍiḅi-a ẹrẹsị. Ori owiḅọtụḅọ Hẹzịkaya nwẹnị ò kiri ḅụ ama-da.
(C) The Bible Society of Nigeria