2 Paka-aị 1
1
Amadaḅọ Sọlọmọnị Tẹkẹ Tẹ Nimi Ḅiim
(1 Ama 3.1-15)
1Sọlọmọnị, Devidi owiḅọtụḅọ ḅe ori ama-da ye-yọ ḅụ ọ̀ ḅụụ mịẹ pakamam, tẹ KỊNỊNYANAḄỌ ọ̀ Tamụnọ ḅe ori na simem tẹ ḍuko ḅẹ ọkụ ofori ḅara kẹ ọ̀ mịẹ gburo-gburomam.
2Sọlọmọnị ẹkwẹn Izirẹlị mẹmgba na, ḅẹrẹtọn kịnị maa ẹndẹ oyia asi finji-finji na kịnị sonioa si sonioa si pịrịarị apụ ma na, ḅẹrẹkọn-apụ ma na, Izirẹlị mẹmgba ḅụ tọrọkọ tarị apụ mamgba na, ḍa awarị daarị apụ mamgba na pịrịm. 3Kobiri ogbo mẹmgba nwẹnị Sọlọmọnị ḅụụ sọ tẹ ori na Gibiyọnị ḅụ sime gele ye-yọ mẹ mu; gbala Akpụrụ-warị mẹ tẹ Mozizi KỊNỊNYANAḄỌ fịrịmẹnjịḅọ ḅe ịkpa mẹ ḅio pike tẹ Tamụnọ na bịamarị anga mẹ anịjụ emi ẹrẹsị 4#2 Sam 6.1-17; 1 Pkị 13.5-14; 15.25—16.1(Kụma Kiriyati-jeharimụ ḅụ Devidi Tamụnọ Ọḅọkụ-Igbe mẹ ọkị-ḅo tẹ kẹ ọ̀ tẹlẹma anị pịrị anga ḅụ koroma tẹ, ọ̀ gbala Akpụrụ-warị pike anị pịrị tẹ ẹrẹsị Jeruselemu ḅụ). 5#Pks 38.1-7Anie sikima, ojo agbamịẹ-anga mẹ tẹ Bẹzalẹlị Uri owiḅọtụḅọ, pịkị Họ taa-owiḅọtụḅọ ḅẹ KỊNỊNYANAḄỌ ḅe Ọḅọkụ-Igbe mẹ wẹrị Akpụrụ-warị mẹ tọrọkọ tẹmẹ agbamịẹ-anga mẹ sọ anịjụ simem, tẹ Sọlọmọnị na kobiri-ogbo mẹ na nwẹnị KỊNỊNYANAḄỌ ḅe ḅịḅị ḅii. 6Sọlọmọnị nwẹnị anịjụ sọma KỊNỊNYANAḄỌ ḅe tọrọkọ simearị ojo agbamịẹ-anga mẹ mu, aniemẹ tẹ kobiri anga ḅẹ Akpụrụ-warị mẹ anga ḅụ sime ye mẹ tẹ anị ọgọnọ dọkịma agba maa ẹndẹ oyia asi finji mịẹm.
7Anị ḅẹ ḍin ḅụ Tamụnọ amịna ḅụụ kẹ Sọlọmọnị ḍie tẹ ọ̀ ḅẹẹm, “À kẹ ị́ pịrị ḅẹ ye ḅii.”
8Sọlọmọnị nwẹnị Tamụnọ ḅẹẹ, “Í gburo-gburotẹ jike-a ḅẹlẹma nyana ị̀ ḍa Devidi pịrịm, tẹ ò kiri ḅụ ị̀ kẹ amadaḅọ sọma tẹẹ. 9#Suk 13.16; 28.14Yei KỊNỊNYANAḄỌ Tamụnọ, yee ị́ kẹ ị̀ ḍa Devidi karịma ye mẹ mịọkụ mịẹ, kẹ gotẹ ọkọ ḅẹẹarị, ị́ ị̀ kẹ kiri-ḅio ḅẹ fọọn mẹ ḅin ḅara ḅintẹ atomi amadaḅọ sọma tẹ. 10Anịẹrẹsị nimi na yefieye naa na kẹ ị̀ pịrịị, kẹ gotẹ ọkọ ḅẹẹarị, tụḅọ inetẹ mie ị́ atomi ma gburo-gburo la ḅara ḅụ ḅẹrẹtọn ịn pịrị ḅẹ?” 11Tamụnọ nwẹnị Sọlọmọnị pakịrị, “Miemẹ ị́ ḅioḅẹngbọ ḅụ emi ẹrẹsị ị́ ị́ nyana ḅẹ aị na, ngọ na, kụn na, inina fịya-a apụ ḍumo na, jen-a jen-a nangwọ ḍumo na ḅii-a, kụma nimi na, yefieye naa na ḅii ị́ ḅụụ pịrị tẹ mịẹ tẹ ị́ inetẹ ḅẹrẹtọn ị̀ atomi tẹ arị ị́ kẹ amadaḅọ sọma pịrị tẹ apụ ma pịrị ḅẹ ḅara gotẹ 12À nimi na, yefieye naa na kẹ ị́ pịrị tẹ. À pịkị ngọ na, nyana na-iḅi aị na, kụn na kẹ ị́ pịrị ḅa ị́ tọrọkọ tarị amadapụ ma nyana-a ye, anịsakị ị́ ḅọrọtẹ so ḅo ḅarị apụ ḅụụ ọkọsime kụn nyana ḅẹ ḅọ ofori.”
Sọlọmọnị Nyana Kụrọ Na Ngọ Na
13Anieḅụ Sọlọmọnị nwẹnị Gibiyọnị ḅẹ gele yọ mẹ ḅụ kobiri anga ḅẹ Akpụrụ-warị mẹ simearị anga, tẹ so Jeruselemu mu. Tẹ ori Izirẹlị mẹ dam. 14#1 Ama 4.26Sọlọmọnị kirimẹnjị-ọmụarụ na, asụ-dọkụ-ọmụapụ na kobirim ò kirimẹnjị-ọmụarụ tẹra ẹndẹ, oyia asi finji (1,400) na, asụ-dọkụ-ọmụapụ gbọrụ puku, oyia ẹndẹ finji (12,000) na nyanam, ori ini ḅẹ apụ kẹ kirimẹnjị-ọmụarụ emi opu ama mẹ ḅụ koromam pịkị kẹ koroma amadaḅọ ḅe pịrịm Jeruselemu ḅụ. 15Amadaḅọ ḅe mịẹ tẹ seleḅa na golu na ḍụḅarị jua ḅara juam; ọ̀ pịkị mịẹ tẹ ịn kẹ sida sịn-arị sịn mẹ Sẹfẹla ḅụ ịn kẹ sịkamọ sịn-arị sịn mẹ ḅin ḅara ḅinm Jeruselemu ḅụ. 16#Dit 17.16Sọlọmọnị fịrịma, fịrịma ḅoarị asụ ma Ijiputi na, Kuwe (in kẹ Silisiya sịn-arị anga) na ḅụ mie arị ḅoarị ye tẹ amadaḅọ ḅe tuḅokọn apụ ma nwẹnị Kuwe ḅụ gbọrụ ḅịḅị kẹ arị da-da ḅoarị. 17Ịn kẹ Ijiputi ḅụ gbọrụ kirimẹnjị-ọmụarụ fịrịma ḅoarị ye seleḅa pakịrị ẹndẹ oyia asi finji, gbọrụ asụ anie seleḅa pakịrị sọnọma si, oyi finji; mị gbọrụ ḅara mẹ mie ịn kẹ ịna ḅụụ ḅọrọtẹ mịna aị ma kẹ Hitahiti ḅẹ amadapụ na Siriya ḅẹ amadapụ mamgba na fịrịmarị ye.
(C) The Bible Society of Nigeria