1 Samụẹlị 7
7
1 #
2 Sam 6.2-4; 1 Pkị 13.5-7 Kiriyati-jeharimụ ḅẹ apụ ma nwẹnị ḅo tẹ KỊNỊNYANAḄỌ ḅe Ọḅọkụ-Igbe mẹ ọkị iwo, tẹ anị kẹ tụndụ mẹ ọgọnọ ḅụ Abinadabụ warị ḅo; tẹ ịn nwẹnị ori owiḅọtụḅọ Ẹlịyeza mịẹ fịafịama, mịẹ tẹ ọ̀ KỊNỊNYANAḄỌ ḅe Ọḅọkụ-Igbe mẹ ḍikiḍiki ḅẹ ḅara.
Samụwẹlị Ḅẹrẹtọn Izirẹlị Pịrịm
2Anị ene mẹ ḅụ ọkị mu, Ọḅọkụ-Igbe mẹ Kiriyati-jeharimụ ḅụ nangwọ sakị angam, si kụra pembe ye, tẹ Izirẹlị warị mẹmgba KỊNỊNYANAḄỌ ḅe ḍọkị gotẹ kururum.
3Anịtẹso Samụwẹlị nwẹnị Izirẹlị warị mẹmgba ḅẹẹ, “Ọ́ nwẹnị ọmịna ḅioḅẹngbọ mẹmgba kẹ pịkịma KỊNỊNYANAḄỌ ḅe ḍọkụma-ḅoarị ḅẹḅẹ, ọmịnị ọmịna ogbo-ḅio igoni oru-atamụnọ ma na, Asịtarọtị ẹrẹḅọ-oru ma na kẹ-ngumaa, tẹ ọmịna ḅioḅẹngbọ kẹ da-da KỊNỊNYANAḄỌ ḅe daa, tẹ fịrịmẹnjị ori ngẹrị pịrịị, anịsakị ò Filisiteniapụ ma ḅara ḅụ ọ́ ḍụa-ḅọrọma ḅa.” 4Anieḅụ Izirẹlị Balị ma na, Asịtarọtị ẹrẹḅọ-oru ma na kẹ ngumam, tẹ fịrịmẹnjị KỊNỊNYANAḄỌ ḅe ngẹrị pịrịm.
5Anịtẹso Samụwẹlị nwẹnị ḅẹẹ, “Ọmịnị Izirẹlị mẹmgba kobirii Mizipa ḅụ, anịsakị à KỊNỊNYANAḄỌ ḅe tẹkẹ ọ́ pịrị ḅa.” 6Anieḅụ ịn Mizipa ḅụ kobirim, tẹ minji ḍuu tẹ anị kẹ KỊNỊNYANAḄỌ ḅe tọrọkọ sara pakamam, tẹ anị ene mẹ ḅụ ḅuru-ịmọm, tẹ anịjụ ḅẹẹm, “Wa KỊNỊNYANAḄỌ ḅe ḅụụ si mịẹ tẹ.” Tẹ Samụwẹlị, Mizipa ḅụ ḅẹrẹkọn Izirẹlịapụ ma pịrịm.
7Mịọkụ Filisiteniapụ ma naam mịnẹ Izirẹlịapụ ma Mizipa ḅụ kobiri tẹ ḅẹẹ ye ḅụ, Filisiteniapụ ma kịnịnyanapụ ma nwẹnị iwo mu Izirẹlị da-paka. Tẹ Izirẹlịapụ ma anị ḅẹ ye naa tẹso, ịn nwẹnị Filisiteniapụ ma ḍiki-ḅalafa. 8Izirẹlịapụ ma nwẹnị Samụwẹlị ḅẹẹ, “Owu KỊNỊNYANAḄỌ wamịna Tamụnọ ḅe pịrị wa pịrị mẹ dasịẹma ma, mịẹ tẹ ò Filisiteniapụ ma ḅara-ḅio wa ḅọrọma ḅẹ ḅara.” 9Anieḅụ Samụwẹlị ndo ndoarị gbọrụ anana tụḅọ ọkị tẹ anị kẹ bebe tẹ dọkịma-agba mịẹ kẹ KỊNỊNYANAḄỌ ḅe pịrịm; tẹ Samụwẹlị Izirẹlị gotẹ owu KỊNỊNYANAḄỌ ḅe pịrịm, tẹ KỊNỊNYANAḄỌ ḅe nwẹnị ọ̀ pakịrị. 10Samụwẹlị dọkịma-agba mẹ mịẹ KỊNỊNYANAḄỌ ḅe pịrịarị ogbo, Filisiteniapụ ma nwẹnị owu kẹ Izirẹlị paka ḅẹ sọma kpeki; kụma KỊNỊNYANAḄỌ ḅe anị eneḅaka mẹ ḅụ kụrọ-nyanatẹ opu pọkọ kẹ nwẹnị so-alagba kẹ Filisiteniapụ ma tẹịn tẹ ịn kẹ ḅịḅị-kẹ-ogbosọ-a ḅio gbin suu; tẹ ịn nwẹnị Izirẹlị tọrọkọ ḅụ mangị. 11Izirẹlị ḅẹ owiapụ ma nwẹnị Mizipa ḅụ saakị paka, tẹ Filisiteniapụ ma ḍuka tẹ ịn ḅaa ma mu Bẹtịka jụjụ-ḅio la.
12Anịtẹso Samụwẹlị nwẹnị gbọrụ ḍụḅarị ọkị tẹ anị saakị sịẹma Mizipa na, Sẹni na ogboku, tẹ nwẹnị Ebeniza kẹ ẹrẹ kẹ anị koro; gbala ori mẹẹ, “KỊNỊNYANAḄỌ ḅe mịanga ḅụ ḅarasụa wa pịrị tẹ.” 13Anieḅụ ịn mịẹ tẹ Filisiteniapụ ma sịḅị-tuum, tẹ ḅarị siin jen-maaịn kẹ Izirẹlị ye-yọ sọ-ḅoa. Anịsakị Samụwẹlị ene mamgba ḅụ KỊNỊNYANAḄỌ ḅe ḅara mẹ Filisiteniapụ ma da-pakam. 14Ẹkịrọnị ḅụ ọkị mu Gati la, opu ama ma tẹ Filisiteniapụ Izirẹlị ḅara ḅụ ọkị aị ma ini arị pịkịma Izirẹlị pịrịm; tẹ Izirẹlị ịna ye-yọ ḍụa-ḅọrọmam Filisiteniapụ ma ḅara ḅụ. Izirẹlị na, Amọrayịtị apụ ma na ogboku ḅụ sọ dein pakam.
15Samụwẹlị ò ḍumo-ene mamgba ḅụ ḅẹrẹkọn Izirẹlị pịrịm. 16Kụra-kụra ḅụ ọ̀ mẹnjị Bẹtẹlị na, Giligalị na, Mizipa na mu, tẹ ḅẹrẹkọn Izirẹlị pịrịm mịna anga mamgba ḅụ. 17Anịtẹrẹmẹ ori ọḅụ pịkị-so Rama mu ḅa, gbala anịjụ mẹ anie ori ama ẹrẹsị, tẹ anịjụ mẹ ḅụ sọ ọ̀ karakara ḅẹrẹkọn Izirẹlị pịrịm. Tẹ ori anịjụ gbọrụ agbamịẹ-anga nama KỊNỊNYANAḄỌ ḅe pịrịm.
(C) The Bible Society of Nigeria