तोलिङ्सोमु 34
34
दिनान् फे़त्मे़लाःन्दु
1याकुब नु लिआरे़ खुन्छिॽ सा दिनान् थिक्ये़न् खे़न् लाजेॽओबा मे़न्छुमाहाॽ तुम्मासि फाॽआङ् पे॥ 2खे़न् ते़ङ्गप्पोबा हाङ् हिब्बि हामोरे़ल्ले़ कुस्सा सकेमे़ल्ले़ दिनान् निसु, हे़क्क्याङ् उःक्खु तेॽरुआङ् मेःत्मे़त्तु॥ 3खे़ब्याङ् खे़ल्ले़ कुनिङ्वान् याकुबरे़ कुस्सा दिनान् ले़प्माङ् हिसिङ्॥ हे़क्क्याङ् खे़ल्ले़ खे़न् मे़न्छ्यान् लुङ्माॽ तुक्तुआङ् खे़न् नुःब्नुबा पाःन्हाॽ मे़त्तु॥ 4हे़क्क्याङ् सकेमे़ल्ले़ कुम्बा हामोरे़न् मे़त्तु, “खे़न् सिसादिङ् मे़न्छ्यान् आङ्गाॽ आहिम्सामा पोङ्से़ ताराङ् पिराङ्ङे़ॽ॥”
5याकुबरे़ कुस्सा दिनान् सकेमे़ल्ले़ फे़त्लाःन्दुबा पाःन्निन् खे़प्सु॥ कर खुने़ॽ कुस्साहाॽ पित् कम्से़ मे़बेआङ् मे़वये़बाल्ले़ चोगुल्ले़ खे़ङ्हाॽ हिम्मो मे़न्नुःङ् मे़न्दाए थारिक् खुने़ॽ स्वाःत् युङे़॥
6खे़ब्याङ् सकेमे़ल्ले़ कुम्बा हमोरे़न् याकुबरे़ कुहिम्मो ताॽजे़ङ्से़ फे़रे़॥ 7आल्ल याकुबरे़ कुस्साहाॽरे़ थे पोःक्खे़ के़लॽबा पाःन्निन् मे़घे़प्सुनुमे़ःन्ने पित् चाराम्मा ते़न्नोलाम् मे़नुःक्खे़ मे़द्ये़॥ खे़ङ्हाॽरे़ खुनिॽ निङ्वाॽ तुगे़आङ् खुन्छिॽ सिक् पोगे़आङ् वये़, थेआङ्भे़ल्ले़ सकेमे़ल्ले़ याकुबरे़ कुस्सान् फे़त्लाःन्दुआङ् के़रे़क् इस्राइलिहाॽरे़ खुन्छिॽ ने़बो तेसुआङ् वये़॥ अक्तङ्बा याःम्बक् चोःक्मा मे़न्नुॽमनाबा वये़॥
8कर हमोरे़न् खे़ङ्हाॽनु अक्खेलॽरिक् ताॽजे़क्खे़, “आस्सा सकेमे़ल्ले़ कुनिङ्वाॽइन् खे़ने़ॽ के़स्सा मे़न्छुमान् ले़प्माङ् इगेःक्काङ् पत्॥ आस्सान् दिनाःन्नु मेःक्खिम् मे़प्मा आभाःक्ते़ॽ॥ 9खिनिॽ आनिगे़नु ते़न्धाम् मेःक्खिम् चोगे़म्मे़ॽ॥ खिनिॽ मे़न्छुमा साहाॽ आनिगे आबिरे़ॽ हे़क्क्याङ् आनिगे मे़न्छुमा साहाॽ खिनिॽ लागि तेॽराम्सिम्मे़ॽ॥ 10खिनिॽ आनिगे़नु युङ्मा के़सुक्तिॽ, हे़क्क्याङ् कन् लाजेन् खिनिॽ ओगप् चोगे़म्मे़ॽ॥ खिनिॽ कप्मोए युङे़म्मे़ॽ, कप्मोए ले़ङ्हङ् चोगे़म्मे़ॽ हे़क्क्याङ् लाजेॽसिङ्बुङ् इङाम्मे़ॽ॥”
11खे़ब्याङ् सकेम्मे़ल्ले़आङ् दिनारे़ कुम्बा नु कुम्भुॽसि मे़त्तुसि, “खिनिॽ याप्मि लुङ्माॽ आदुक्ते़म्मे़ॽ, हे़क्क्याङ् खिनिॽ च्या के़नाःक्तुम्साङ् आङ्गाॽ पिनिङ्॥ 12मेःक्खिम्ले़ लागि आभ्यारिक् याङ् के़सिक्सुम्साङ् आङ्गाॽ पिनिङ्॥ खे़न् सिसादिङ् मे़न्छ्याःन्नु मेःक्खिम् चोःक्मारक् आबिरे़ॽओ॥”
13सकेमे़ल्ले़ खुन्छिॽ नुसाॽ दिनान् फे़त्लाःन्दुबाल्ले़ चोगुल्ले़ याकुबरे़ कुस्साहाॽ सकेम हे़क्क्याङ् खे़ल्ले़ कुम्बा हमोरे़न्नु इङ्ले़क् पान् मे़बारे़॥ 14खे़ङ्हाॽरे़ मे़मे़त्तुसि, “हर्दो मे़न्हे़क्केबा मनान् आनिगे नुसाॽइन् पिमा मे़सुक्तुम्बे़न्॥ थेआङ्भे़ल्ले़ हे़क्के चोगुम्बे़ल्ले़ग आनिगे चाःत्थि पेक्॥ 15कर खे़ने़ॽ के़बाःत्तुबा पाःन्निन् आनिगे लत्छा पाःन्नोरक् ते़न्दिगे़, खिनिॽआङ् ये़म्बित्छा के़रे़क्ले़ आनिगे हे़क्के हर्दो के़हे़गुम्लए पोङ्॥ 16खे़ब्याङ्लक् आनिगे मे़न्छुमा साहाॽ खिनिॽ पिने़त्छिगे़॥ हे़क्क्याङ् आनिगे खिनिॽ मे़न्छुमा साहाॽ तेॽरुम्सिम्बे़आङ् खिनिॽनु लत्छा सुवाङ् पोःक्खिगे़आङ् खिनिॽनु सोरिक् युङिगे़॥ 17कर आनिगे पाःन्निन् के़ङ्घे़प्सुम्मिन्नाङ् हर्दो हे़क्मा के़न्दे़न्दिन्ने़फाग्र आनिगे नुस्साॽइन् तेॽरुम्बे़आङ् पेगिगे़॥”
18हमोर नु सकेमरे़ खे़ङ्हाॽरे़ खुन्छिॽ पाःन्निन् खे़म्मा ते़न्दे़त्छि॥ 19खे़न् थाङ्बे़न्निल्ले़ खे़ङ्हाॽरे़ मे़बाःत्तुबा हे़क्के चोःक्मा मिसाक्काङ् मे़सुसे़न्, थेआङ्भे़ल्ले़ खुने़ॽ याकुबरे़ कुस्सा दिनान् नानुॽरुआङ् वये़॥ खुने़ॽग कुम्बारे़ कुहिम्सयङ्ङो के़रे़क्नुःल्ले़ इङ्धाङ्साबा चोगे़॥ 20खे़ल्ले़चोगुल्ले़ हमोरे़न् नु कुस्सा सकेम्मिन् ये़क्यक्कोबा मा लाम्धेःप्पो पेसि हे़क्क्याङ् खुन्छिॽ ये़क्यक्को के़युङ्बाहाॽ अक्खे मे़त्ते़छुसि, 21“कङ् मनाहाॽ आनिॽनु आदङ्दङ्बा मे़जोक्॥ खे़ङ्हाॽ आनिॽ लाजेॽओ मे़युङ्ङाङ् ले़ङ्हङ् मे़जोःक्ल॥ खे़ङ्हाॽरे़ खुन्छिॽ लागि योॽबा सिङ्बुङ्आङ् ने़ःॽ॥ खे़ङ्हाॽरे़ खुन्छिॽ सा मे़न्छुमाहाॽ आनिॽ तेॽरुम्सिम् हे़क्क्याङ् आनिॽ सा मे़न्छुमाहाॽ खुन्छिॽ पिरुम्सिम्॥ 22कर खे़न् मनाहाॽ आनिॽनु लत्छा सुवाङ् हे़क्के पोङ्माआङ् युङ्मारे़ लागि लत्छा पाःन्नोरक् मे़दे़न्, खे़ङ्ग खे़ङ्हाॽ हे़क्के आनिॽओ के़रे़क् ये़म्बिछाहाॽरे़ हर्दो मे़हे़गुरए पोङ्॥ 23खे़ङ्हाॽरे़ खुनिॽ पित्मे़ःन्दाहाॽ हे़क्क्याङ् खुन्छिॽ याङ्साकुन्धेहाॽ हे़क्क्याङ् खे़ङ्हाॽरे़ मे़गत्तुसिबा वेॽ थक्साहाॽ आनिॽइन् मे़बोङ्ने़न्बि? खे़ङ्हाॽरे़ मे़बाःत्तुबा पाःन्निन्लक् चोःक्मा ते़न्दि, हे़क्क्याङ् खे़ङ्हाॽ आनिॽनु मे़युङ्॥”
24ये़क्यक्किल्ले़ मा लाम्धेःप्पो के़जुम्बा के़रे़क् मनाहाॽरे़ हमोरे़न् नु कुस्सा सकेम्मे़ल्ले़ मे़त्ते़छुसिबा पाःन्निन् खे़म्मा मे़दे़न्दे़॥ हे़क्क्याङ् ये़क्यक्कोबा के़रे़क् ये़म्बिछासाहाॽरे़ हर्दो मे़हे़गु॥
25सुम्ये़न् एगाङ् हर्दो मे़हे़गुबा याम् तुक्माल्ले़ खे़ङ्हाॽ चाॽरिक् याःन्दुसिआङ् मे़ने़स्से़, हे़क्केःल्ले़ याकुबरे़ कुस्साहाॽ, दिनारे़ कुम्भुॽ ने़प्फु सिमियोन नु ले़बिःल्ले़ आबाङे खुन्छिॽ ताभेहाॽ याङ्ने़छिआङ् स्वाःत्ताङ् ये़क्यक्को लासे़छि हे़क्क्याङ् के़रे़क् ये़म्बित्छाहाॽ च्ये़प्तु से़रे़छुसि॥ 26खे़न् ने़प्फुरे़ हमोरे़न् नु खुने़ॽ कुस्सा सके़म्मिन्नाङ् ताभेःल्ले़ च्ये़प्ते़छु से़रे़छुसि, हे़क्क्याङ् सकेम्मिल्ले़ कुहिम्मोलाम् दिनान् लःत्ते़छु तेॽरे़छु॥ 27हे़क्क्याङ् याकुबरे़ वेॽ कुस्साहाॽ के़सिबाहाॽरे़ खुनिॽ ये़क्यक्को मे़बेआङ् खे़ङ्हाॽरे़ खुनिॽ चिगक्वाहाॽ स्याक् वयाक् मे़नाप्तुसि थेआङ्भे़ल्ले़ खे़ङ्हाॽरे़ खुन्छिॽ नुस्साॽइन् फे़त्मे़लाःन्दुआङ् वये़॥ 28खे़ङ्हाॽरे़ पित् मे़ःन्दा, थक्सालुप्हाॽ, अदङ्हाॽ मे़देॽरुसि हे़क्क्याङ् ये़क्यक्कोबा नु लाःक्कात् प्याङ्सिओबा थेआङ् मे़न्नन्छुन्॥ 29खे़ङ्हाॽरे़ खुन्छिॽ के़रे़क् याङ्साकुन्धेहाॽ हिम्धाःङ्हाॽ मे़नाप्तुसि॥ हे़क्क्याङ् खे़ङ्हाॽरे़ खुनिॽ हिन्जाॽबित्छाॽहाॽ नु मेःत्हाॽआङ् पुङ्लाधाबा हे़क्के मे़दे़म्सु मे़देॽरुसि॥
30खे़ब्याङ् याकुबरे़ सिमियोन नु ले़बिन् मे़त्तुसि, “आनिॽ आयुङ्बा कनानि नु परिज्जिहाॽरे़ खुनिॽ कन् लाजेॽओ आङ्गाॽ ताप्फे़ःम्बा पोःक्खाङ्ल के़जोगे़छुआङ् आङ्गाॽ के़साक्पो थ्याङ्ल याप्मि के़याःन्दे़छि॥ आङ्गाॽ आमनाहाॽ मिसाक्लक् मे़वाॽ॥ खे़ङ्हाॽ के़रे़क् मे़भुङ्सिङ्ङाङ् आङ्गाॽ मे़सॽआआङ् ते़न्धङ् मे़जोगुल्ले़ग आङ्गाॽ आहिम्मोबा के़रे़क् थाप्पु थ्यःङ् मे़जोगिगे़रो॥”
31कर खे़ङ्हाॽरे़ नोगप् पिरे़छु, “खे़ल्ले़ आनिगे नुसाॽइन् ये़म्बा के़गोःप्मा हे़क्के के़त्निमा चोःक्मा नुॽबि?”
Valgt i Øjeblikket:
तोलिङ्सोमु 34: LIF
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2009, 2023, Wycliffe Bible Translators, Inc. All rights reserved.