စံးထီၣ်ပတြၢၤ 7
7
တၢ်ထုကဖၣ်လၢတၢ်တီတၢ်လိၤအဂီၢ်
1ယွၤ, ယကစၢ်ယွၤဧၢ, ယအိၣ်ကဒုယဲလၢနပူၤလီၤ.
အုၣ်က့ၤခီၣ်က့ၤယၤလၢကယဲၢ်
ပှၤလူၤမၤသံယၤအစုပူၤဒီးမၤပူၤဖျဲးယၤတက့ၢ်.
2ကအ့ၣ်ဖှီဘၣ်ဖုးယၤဒ်ခ့ယုၢ်အသိး,
ကတွံၢ်တြူာ်ယၤဆူ
တၢ်မၤပူၤဖျဲးတအိၣ်ဘၣ်အလီၢ်ဒီး ဖှီကွံာ်ယၤဆူ အက့အခီတဖၣ်န့ၣ်လီၤ.
3ယွၤယကစၢ်ယွၤဧၢ, ယမ့ၢ်မၤတ့ၢ်တၢ်အံၤ,
တၢ်တတီတလိၤမ့ၢ်အိၣ်လၢယစုပူၤ,
4ယမ့ၢ်မၤဆၢက့ၤယတံၤသကိးလၢ
တၢ်အၢတၢ်သီမ့တမ့ၢ်မၤတရီတပါယဒုၣ်ယဒါလၢ
တၢ်ကလီကလီအပူၤဒီး,
5မ်ယဒုၣ်ယဒါတဖၣ်လူၤယၤဒီးချုးန့ၢ်ယၤ,
မ်အယီၢ်တံၢ်မၤသံယၤဒီး
ပာ်တ့ၢ်ယစိၣ်လၢဟီၣ်ခိၣ်ကမူၣ်အလိၤတက့ၢ်. စ့လၤ
6ယွၤဧၢ, ဂဲၤဆၢထၢၣ်လၢနတၢ်သးထီၣ်အပူၤတက့ၢ်.
ဆၢထၢၣ်ထီဒါယဒုၣ်ယဒါသ့ၣ်တဖၣ်
အတၢ်သးကဲၤထီၣ်,
ဖုသံနီၣ်ဒီးမၤစၢၤလၢ်ယၤတက့ၢ်.
တၢ်တီတၢ်လိၤန့ၣ်မ့ၢ်တၢ်လၢ
နဃ့ဒီးမၤလိာ်အီၤန့ၣ်လီၤ.
7ဒုးအိၣ်ဖှိၣ်ရိဖှိၣ်ပှၤကလုာ်ခဲလၢာ်ဝးတရံးနၤ
ဒီးပၢအီၤလၢနလီၢ်ထီၣ်ထီန့ၣ်တက့ၢ်.
8ယွၤစံၣ်ညီၣ်ပှၤကလုာ်ခဲလၢာ်လီၤ.
ယွၤဧၢ, စံၣ်ညီၣ်ယၤဒ်ယတၢ်တီတၢ်လိၤ
ဒီးယသူးယသ့ၣ်အိၣ်ဒီးယၤအသိးန့ၣ်တက့ၢ်.
9ကစၢ်ယွၤလၢအတီအလိၤ ဒီးမၤကွၢ်
ပှၤကညီအသးအတၢ်ဆိကမိၣ်နၤဧၢ,
ဒုးကတၢၢ်ကွံာ်ပှၤတတီတလိၤအတၢ်အၢတၢ်သီ,
ဘၣ်ဆၣ်ပှၤတီပှၤလိၤန့ၣ်
ဒုးအိၣ်ဂၢၢ်ဆိးကျၢၤအီၤတက့ၢ်.
10ကစၢ်ယွၤမ့ၢ်ကတီၤလၢအကဟုဘံၣ်ကယာ်ဘၢယၤ
ဒီးမၤပူၤဖျဲးပှၤလၢအသူၣ်လိၤသးဘျၢန့ၣ်လီၤ.
11ကစၢ်ယွၤမ့ၢ်ပှၤစံၣ်ညီၣ်တၢ်အတီအလိၤ
ဒီးစံၣ်ညီၣ်ဃၣ်ပှၤအၢပှၤသီထီဘိန့ၣ်လီၤ.
12ပှၤမ့ၢ်တပီၢ်ယၢ်လီၤက့ၤအသးဘၣ်ဒီး
ကစၢ်ယွၤကကျ့ထီၣ်အနးလီၤ.
ဖ့ၣ်ထီၣ်လံအချံၣ်ဒီးကတဲာ်ကတီၤလံအီၤလံ.
13ဒီးကတဲာ်ကတီၤလံအစုကဝဲၤလၢအမၤသံတၢ်န့ၣ်လံ.
ပညိၣ်ထီၣ်အပျၢ်မ့ၣ်အူတဖၣ်လံ.
14ကွၢ်ကွၢ်ပှၤအၢပှၤသီတဖၣ်
ဆိကမိၣ်ထီၣ်တၢ်အၢတၢ်သီ,
ကူၣ်ကျဲၤတၢ်မၤကီမၤခဲတၢ်ဒီး
မၤတၢ်လီတၢ်ဝ့ၤအတၢ်မၤန့ၣ်လီၤ.
15ခူၣ်တၢ်ပူၤဒီးဘၢၣ်ဝဲ,
ဒီးလီၤတဲာ်နုာ်ဆူတၢ်ပူၤလၢအခူၣ်ဝဲန့ၣ်လီၤ.
16အတၢ်မၤကီမၤခဲတၢ်ကဘၣ်က့ၤဒၣ်အီၤ
ဒီးအတၢ်စုဆူၣ်ခီၣ်တကး
ကမၤဘၣ်ဒိက့ၤဒၣ်အီၤန့ၣ်လီၤ.
17ယကစံးထီၣ်ပတြၢၤယွၤဒ်အတၢ်တီတၢ်လိၤအသိး
ဒီးယကသးဝံၣ်စံးထီၣ်ပတြၢၤ
တၢ်ထီကတၢၢ်ယွၤအမံၤန့ၣ်လီၤ.
Valgt i Øjeblikket:
စံးထီၣ်ပတြၢၤ 7: KSWC
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
Sgaw Karen Common Bible © Bible Society of Myanmar, 1992.