စံးထီၣ်ပတြၢၤ 16
16
တၢ်နာ်န့ၢ်ယွၤအတၢ်ထုကဖၣ်
1ကစၢ်ယွၤဧၢ, အံးက့ၤကွၢ်က့ၤလၢ်ယၤတက့ၢ်. အဂ့ၢ်ဒ်အံၤ, ယသန့ၤယသးလၢနၤလၢတၢ်ပူၤဖျဲးအဂီၢ်လီၤ.
2ယစံးဘၣ်ယွၤ, “နမ့ၢ်ယကစၢ်လီၤ.
တၢ်ဂ့ၤလၢအအိၣ်ဒီးယၤခဲလၢာ်န့ၣ်
ဟဲဒၣ်လၢနအိၣ်လီၤ.”
3ယွၤအပှၤဂီၢ်မုၢ်လၢအသးတီသ့ၣ်တဖၣ်န့ၣ်
ဂ့ၤဆံးဒိၣ်လဲၣ်.
ယတၢ်သးခုအဒိၣ်ကတၢၢ်န့ၣ်
မ့ၢ်ဝဲယကအိၣ်ဘၣ်ဒီးအဝဲသ့ၣ်န့ၣ်လီၤ.
4ပှၤလၢအမၤတၢ်ချ့ချ့လၢယွၤအဂၤတဖၣ်အဂီၢ်န့ၣ်,
အတၢ်ကိၢ်တၢ်ဂီၤအါထီၣ်လၢအဂီၢ်ဒၣ်ဝဲလီၤ.
ယတလုၢ်ထီၣ်ပာ်ထီၣ်ဃုာ်တၢ်ဒီး
အဝဲသ့ၣ်ဘၣ်,
ယတကိးထီၣ်စ့ၢ်ကီးအယွၤတဖၣ်အမံၤန့ၣ်ဘၣ်.
5နဲဒၣ်, ယွၤဧၢ, နမ့ၢ်ယတၢ်န့ၢ်သါ
ဒီးနဟ့ၣ်ယၤတၢ်လၢယလိၣ်ဘၣ်ခဲလၢာ်လီၤ.
ယတၢ်အိၣ်မူဆူညါအိၣ်လၢနစုပူၤလီၤ.
6နတၢ်ဟ့ၣ်သါယၤသ့ၣ်တဖၣ်အံၤလီၤလးဆံးဒိၣ်လဲၣ်.
မ့ၢ်အဂ့ၤဆံးဒိၣ်လဲၣ်.
7ယစံးထီၣ်ပတြၢၤယွၤ,
မ့ၢ်လၢအဝဲဒၣ်နဲၣ်လိယၤအဃိလီၤ.
ဒီးလၢမုၢ်နၤန့ၣ်, ယသးလၢအသ့ၣ်ညါဒၣ်တၢ်
ဟ့ၣ်ပလီၢ်ယၤလီၤ.
8ယသ့ၣ်ညါထီဘိလၢယွၤအိၣ်ဒီးယၤန့ၣ်လီၤ.
အဝဲဒၣ်အိၣ်ဘူးဒီးယၤအဃိ,
တၢ်လၢကမၤဟူးဝးယၤတအိၣ်နီတမံၤဘၣ်.
9လၢတၢ်န့ၣ်အဃိ, ယသးပှဲၤဒီးတၢ်စံးဘျုးစံးဖှိၣ်
ဒီးယသူၣ်ခုယသးခုယဲလီၤ.
ဒီးယသ့ၣ်ညါလၢယပူၤဖျဲးလၢလၢပှဲၤပှဲၤလံန့ၣ်လီၤ.
10အဂ့ၢ်ဒ်အံၤ, နကဟုကယာ်ယၤလၢ
တၢ်သံအစိကမီၤလံန့ၣ်လီၤ. ယမၤနတၢ်လၢ တၢ်ကလုာ်တီ,
ဒီးနတစူးကွံာ်ညိကွံာ်ပှၤလၢအအဲၣ်နၤ,
ဆူတၢ်သံအကီၢ်ပူၤန့ၣ်ဘၣ်.
11နကဒုးနဲၣ်ယၤလၢတၢ်မူအကျဲ,
နတၢ်အိၣ်ဒီးယၤမၤလၢပှဲၤယတၢ်သးခု
ဒီးဟဲစိာ်န့ၢ်ယၤတၢ်အမုာ်ထီဘိန့ၣ်လီၤ.
Valgt i Øjeblikket:
စံးထီၣ်ပတြၢၤ 16: KSWC
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
Sgaw Karen Common Bible © Bible Society of Myanmar, 1992.