Matio 3
3
Chɔɔn bla̍ Nyɔsoa-a tìh
(Maɛ 1.1-8; Luu 3.1-9, 15-17; Chɔɔn 1.19-28)
1Sɔ̀nᵻ gbɔ̍ sì-aɛ, wɛ̀ Chɔɔn ɔ̀ po̍-a nyɔ̍ nǐ dlǔ-ɛ ji̍, iě ɔ̍ bla̍ Nyɔsoa-a tìh dě kwlǎslò we̍, dě Judia fɔɔ. 2Ɔ̍ la̍a̍, “Mɔ̀ bǐi i̍, mɔ̀ iě gblɛ̍n sɔ̀ɛ̀n kɛ̍n i̍ poe. Dɛ̍nu̍ɛ, Nyɔsoa-a kmɔ̌ wlu̍ i̍ kɔn ti̍ kɔǎn we̍ wɛ̀.” 3Chɔɔn la ɔ̍ kɔn tìh bo Nyɔsoa-a tu̍owli po̍ nyɔ̍ Asaia sà-a. Ɔ̍ la̍a̍,
“Nyɔ̍-a we̍le-e dě kwlǎslò we̍, ɔ̍ la̍a̍,
‘Mɔ̀ po̍ wìè gba̍a̍ dǒ Joi we̍,
mɔ̀ slɛ̌-ɛ ɛ̍ i̍ dǒ ɔ̍ we̍.’ ”
4Jliɛ̍ ɛ̀ Chɔɔn chlɛɛ-aɛ, gbo̍ kɛ̍ɛ̍n bli-a mǐ bo u̍h nui ɛ̍, wɛ̀ ɔ̍ tù dɛ̍ku-a wlu̍h we̍. Nɛ̀ ɔ̍ di̍ gbaunᵻ ke du̍h. 5Wɛ̀ nyɔ̍ sɔ dǒ Juluslɛn, iě duuh sɔ dě Judia fɔɔ, wɛ̀ nyɔ̍ sɔ bloa̍ kli̍hgbɛ̍ nɛ-a Jɔɔdɛn nǐ wɔ̍i̍n-ɛ di̍i̍ i̍, u̍h mu̍ dě ɔ̍ we̍. 6Dě u̍h sà-ɛ u̍h-a gblɛ̍n sɔ̀ɛ̀n gbɔ̀ i̍, wɛ̀ ɔ̍ po̍ u̍h nǐ dlǔ dǒ Jɔɔdɛn nǐ kɛ̍n.
7Jɛ Chɔɔn jě Fɛlesii nyɔ̍ ke Sadiusii nyɔ̍ dɔu-a ji̍ dǒ ɔ̍ we̍ u̍h iě nǐ dlǔ po̍. Wɛ̀ ɔ̍ la̍a̍ dě u̍h we̍, “Mɔ̀ na̍a̍ mɔ̀ flɔn di̍i̍ i̍ kǎ mɔ̀ dǎ. Nyɔ̍ kàn gbɛ̍n-ɛ ɛ̀ Nyɔsoa-a mu̍-a dbo̍-ɛ, mɔ̀ jajeɛ̍ mɔ̀-a mu̍ ɛ̍ i̍ pǔh de ae? 8Mɔ̀ nu̍ dɛ̍ᵻ i̍h iě ɛ̍ to ka mɔ̀ poe-a gblɛ̍n sɔ̀ɛ̀n kɛ̍n i̍ wɛ̀-ɛ. 9Mɔ̀ bɔ̌ ka nu̍, ‘Àɔ̀ Eblaɛɛn-a nynuu̍, nɛ̀ Nyɔsoa se̍ à kàn gbɛ̍n mu̍,’ ɛ̍ nɔ̀ɔ̍, mɔ̀ bɔ̌ ɛ̍ dě di̍i̍ i̍ po̍-ɛ, dɛ̍nu̍ɛ, Nyɔsoa bɛ̌ɛ sɔɔ̌ᵻ la Eblaɛɛn-a nynuu̍ we̍i̍ nu̍-ɛ. Ɛ̍ kɔn ǎn sèàɛ̍ mɔ̀ wlùh, 10tòɛ̀-a chɛ̀ jě ti̍ wɛ̀ kaka ɛ̍ iě tu̍ᵻ bloɔ̍ gblǔn i̍. Ɛ̍ tìh-ɛ, tu̍ jɛ se̍-a buǒᵻ chɛ̀ po̍-ɛ, nɛ̀ ɛ̍ mu̍ dba̍-ɛ, wɛ̀ u̍h iě ɛ̍ jlǐh po̍. 11Ǎn po̍ mɔ̀ nǐ dlǔ dǒ nǐ we̍ ɛ̍ iě ɛ̍ to ka mɔ̀ poe-a mɔ̀-a gblɛ̍n sɔ̀ɛ̀n kɛ̍n i̍-ɛ. Jɛ jɔ mu̍-a ǐn kɛ̍n i̍ ji̍-ɛ, ɔ̍ gbǐh bɛ̌ i̍ ɛ̍ sìì naɛ̍. Ǎn chɛ̀ ǐn se̍ i̍ blaɛ iě ɔ̍ bu̍hdih-a chɛ̀ kwa̍ blě. Ɔ̍ nɔ̀ɔ̍, ɔ̍ mu̍ mɔ̀ nǐ dlǔ po̍ dǒ Nyɔsoa-a Sùù ke nɛ̍ we̍. 12Ɔ̍ blě dɛ̍ i̍ bla̍ tu̍ kwa̍ wɛ̀ ɔ̍ iě dɛ̍ i̍ bla̍, nɛ̀ ɔ̍ mu̍ ɔ̍ kwǐ kɛnɛ̌-a chɛ̀ dě slǎ po̍. Jɛ ɔ̍ mu̍ i̍h-a fli̍h dě nɛ̍ ɛ̀ se̍-a mɔ̌ la̍ kɔn-ɛ di̍i̍ po̍.”
Jusu-a nǐ dlǔ po̍-ɛ
(Maɛ 1.9-11; Luu 3.21-22)
13Dǒ ti̍ laa̍ di̍i̍ Jusu sɔ Kaladii bloa̍ kɛ̍n ɔ̍ ji̍ dǒ Chɔɔn we̍ Jɔɔdɛn nǐ wɔ̍i̍n Chɔɔn iě ɔ̍ nǐ dlǔ po̍. 14Sɔ Chɔɔn-a pɔ̀n ɔ̍ iě ɔ̍ bɔ̌ i̍ po̍, iě Chɔɔn la̍a̍, “Mɔ̀ jɔ iě-a ǐn nǐ dlǔ po̍-ɛ, wɛ̀ àn ji̍ nɔ̌ ǐn we̍ iě ìn nǐ dlǔ po̍ ae?”
15Jɛ Jusu la̍a̍, “Kaka la̍ kǎ ɛ̍ iě nɛ. Dɛ̍nu̍ɛ, pò à nu̍ la̍a̍n-ɛ, nɛ̀ dɛ̍ᵻ kli̍hgbɛ̍ Nyɔsoa-a pɔ̀n-a bo à nu̍-a.” Wɛ̀ Chɔɔn dǔ wɔ̌n-ɛ.
16Ti̍ Chɔɔn wɔ̀-a Jusu nǐ dlǔ po̍-ɛɛ, Jusu naɛ àn jǎ dǒ tlu̍h kɛ̍n ka-a, sɔ ja̍u̍n pɔ̀ni wɔ̍i̍n dǒ ɔ̍ we̍ sǔh, iě ɔ̍ jě Nyɔsoa-a Sùù-a ji̍ wlù dǒ ɔ̍ we̍ ka gbɔ̀lǐh-a ji̍ gbǎ la̍-ɛ. 17Dǒ wlu̍ sɔ-ɛ dě ja̍i̍wlɔ̀. Ɛ̍ la̍a̍, “Ɔ̀ la ǎn tìh kma Jǔ bo, ǎn wlùh tè i̍ dǒ ɔ̍ we̍.”
Valgt i Øjeblikket:
Matio 3: KDNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
The New Testament in Western Krahn published as KU̍O̍ DELEE © The Bible Society in Liberia, 1999.