Nimlivolivon 21
21
Mangay si Pawlo do Yelosaleng
1Mateyka namen sira taitaiden am somakay namen rana do avang a mangay do Kese a pongso. Ikadwa na araw am makaranes namen do Lotaw a ikatlo na araw am mangay namen do Patala. 2Amyan namen do Patala am masazi namen o asa ka avang a mangay do Vongnise. So nipacisakay namen jira. 3O angayan namen am masngen do Saypolose a pongso. Niliklik namen o Saypolose a pongso a mangay do Sidiya a pongso a kapeygegcin namen do Tayar a ili. Ta mapagcigcin sira dang so warawara. 4Nimakacita namen dang so sinjya. Ori o nisan namen dang so kapito araw. Mangay rana si Pawlo am pakeken da si Pawlo a jyangay do Yelosaleng, ta amyan dang so nipanci na no Seyzi a ikanginanawa na ni Pawlo. 5Karwan namen rana sira am macihza sira jyamen o sinjya a kapalolo da so katovong da do vahay a kano anak da mangay a tomaitaid jyamen. So nikalovot namen a meylilitod do pasalan a meynozi ji Ama ta do to, 6a kataitaid namen rana sira kavang namen rana do avang. O sinjya am mangay rana sira do kavahayan da.
7So nisongay na rana no avang apo do Tayar a mangay do Todimay. Makaranes namen do dang am mangay namen itazogaw sira o sinjya a kapacisan namen jira so kasahep. 8Ikadwa na araw am karwan namen rana dang a mangay do Kaysadiya. So nirateng namen do vahay ni Veydipo. Iya rana am vazay na o kapeylimwang na no Mapasaray a Ciriciring na ni Ama ta do to. Iya rana am ikapapito da no nipamnekan da a somidong so vazay do kyokay do Yelosaleng no kakwa. Karahan am misan namen do dang. 9Amyan so papat a mavakes a anak na a jya nimacivahavahay pa. Sira rana am mamimin sira mateneng a mangononong so ciriciring na ni Ama ta do to.
10Asa ka peywalam no tao o nisan namen dang. Amyan so asa ka tao a meyngaran si Acyapo a panoyonoywan na so ciring ni Ama ta do to apo do Yotay. 11Nimai a tomita jyamen. Mai ori am ahapen na o abtek na ni Pawlo a kato na ngonangan do lima na kano ai na a vaoden. Maniring am, “Yamaniring o Seyzi am, ‘O mapeyyabtek rana so sya am vaoden da no tao do Yotay do Yelosaleng a katoro da nya do beken a tao do Yotay.’ ” 12Mamizing namen o akman sang a ciring na am ji namen novoya si Pawlo a mangay do Yelosaleng. 13Am maniring si Pawlo am, “Ikongo nyo lavyan jyaken a ko ikarahet no onowned. Cyaha, ta ko ahapen o vazay ni Yeso a Panirsirngen ta. Tana vaoden da yaken do Yelosaleng a mawakwak do dang am cyaha, ta nakenakem ko an.” 14Ji namen a pasovoy si Pawlo am to namen rana a macipanadngi. Maniring namen am, “Inaoy no si mangononong o ahahapan na sya ni Ama ta do to.”
15Meyratateng am ahapen namen rana o apzapzatan namen a mangay do Yelosaleng. 16Amyan so apo do Kaysadiya a sinjya a macilolo jyamen a kangay da nyamen do vahay na ni Nason a tao do Saypolose pongso. Iya rana am nimeycicinda amraralay ni Yeso Kizisto.
Mey na ipanangangay ni Pawlo si Yake
17Makaranes namen do Yelosaleng am aro dang o sinjya a magaga a tomaotao jyamen. 18Ikadwa na araw am macihza namen ji Pawlo a mangay tomita si Yake. O panipanirsirngen rana do kyokay am amyan sira dang. 19So nipeyminaminasyan na nira ni Pawlo a kapanci na no vazay na ni Ama ta do to jya do beken a tao do Yotay, do mina kapeylimwang na no ciriciring na ni Ama ta do to jira. 20Mamizing da no akma nameney kakteh do cinai am isaray da ji Ama ta do to. Am maniring sira ji Pawlo am, “Mo kakteh, do namen naknakman sya am ala sira rana amlaksa o tao a omanoyong ji Yeso Kizisto a tao do Yotay. Sira rana ori am makdeng sira mahap so iwawalam na ni Moyse. 21Mamizing da imo a nimangnanao so tao do Yotay a meyili do beken a ili da no tao do Yotay am nipanci mo kono o kataosya da so iwawalam ni Moyse. Nipanci mo kono o kataosya da rana so kayongkad do kanakan. 22No si mamizing da imo no tao do Yotay a nimai do jya a kai da do jya mapacici jyamen am ikongo ipasapa namen jira. 23Hapen mo o ciring namen jimo an. Amyan so papat a ka tao a nimyan so ciring ji Ama ta do to. 24Palolwen mo sira a macihza jimo a mangay omahap so iwawalam ta tao do Yotay a katoro mo so nizpi do akdawan da jira. Golgolan da o oo da. Ta yongkad no kapangononong no mina ciring da si Ama ta do to. Ta si makman kamo sang am panoyngen da rana imo no tao a jya nimanci no akman sang a vazay, do kapacyanoyong mo do iwawalam no tao do Yotay. 25Yamen rana am nipeyteygami namen sira o yaomanoyong ji Yeso Kizisto a beken a tao do Yotay, do kaji da nganan so nipazos da, kaji da nganan so rala no vinyay kano nivitkeh da vinyay a nimazakat a jya nimvoyog so rala. Taosya o kapangzakza da so icyatatao da.”
26Ikadwa na araw am palolwen na sira o papat a ka tao ang ni Pawlo a mangay mahap so iwawalam da no tao do Yotay. So nyangay ni Pawlo do rako a panaralayan a mapaziman sya do mapatanatanang so nakem da si Ama ta do to a mapatanang na nira so nakem da si Ama ta do to no papat a kararay na.#21:26 O akman sya a patanangen da ji Ama ta do to am ney yapya na kagling da kano kanekanen da (Vo Ci Ci 6:14-15).
Nirakep da si Pawlo do rako a panaralayan
27Makeykai rana komavos o ikapito na araw am amyan so tao do Yotay apo do Yasiya a nimakacita si Pawlo do rako a panaralayan. Karahan am manara sira so aro a tao a kapeyvonag da sira. Ori o nirakpan da si Pawlo. 28Maniring sira am, “Inyo rana Isedi a tao am sidongen nyo yamen an. Ta si Pawlo rana am yaro na nipanci a macisala do iwawalam ta, na niraherahet yaten a Isedi a tao a na kapazagom pa sya a yarehrehten so iwawalam na ni Moyse a kano rako a panaralayan ta. Ta sicyaikwa rana ya am na todey rara sira a yasomdep o beken a tao do Yotay do rako a panaralayan ta. So ikanoyong na nya ya meyraraten.” 29O pancyan da no akman sang am nimacita da si Pawlo a kano asa ka tao do Ivoso a meyngaran si Teloveymo do Yelosaleng. Am ori o nipatolinan da sya ji Pawlo a nimapalolo sya somdep do rako a panaralayan.
30Meyratateng am meyvonag sira o asa ka ili a karanes da mai no aro a tao amrakep si Pawlo. Karahan am powboten da do rako a panaralayan a kaslet da rana jya. 31To da ji wakwaka si Pawlo am keyyan no asa ka panirsirngen no itaysang no Loma a nimakamizing sya. 32Karahan am mapalolo so aro a itaysang a mangay do meyvonag a tao. Macita da no aro a tao o panirsirngen da no itaysang a kano aro a itaysang am iptad da rana o kabakbak da ji Pawlo, 33kangay na omrakep si Pawlo no panirsirngen da no itaysang kavaod da sya no nipeylalin da adwa ka vahalang. Maniring am, “Sino ka ya. Ikongo vazay mo ang.” 34Maniring sira o aro a tao a amlololos am, “Ori a ori o kakwan na no vazay no nya.” Ikongo do meysaksaklang o ipanci da, am ori o ji na makatenngi jya no panirsirngen no itaysang so niyapoyapwan no vazay ang. Meyratateng am ipanci na o itaysang a somdep nya do sahad. 35Amyan sira do zazakdangan am ikongo do tey masosozi sira o aro a tao, am ori o nikasamosamozongan da ji Pawlo no aro a itaysang a isdep do sahad. 36Am macilolo pa sira o aro a tao a amlololos. Maniring sira am, “Zakaten ta si Pawlo!”
Ononongan na ni Pawlo o kanoyngan na
37Toda jindep sira do vahay da no itaysang am maniring si Pawlo do panirsirngen da am, “Apyahen mo keyyan no asa ka ciring ko?” Tovisan na no panirsirngen am, “Mo katenngan o ciring no tao do Sila? 38Beken a tao ka do Ayci asyo a nimraherahet so seyvo a nimapalolo so kakapatan a ranaw (4000) a mararahet so nakenakem a tao a nitomayo do kabwan no nihakawan no tao?” 39Maniring si Pawlo am, “Yaken rana am tao do Yotay ko a nimatazak a tao do Tasose a rako a ili do Cidicya. Apyahen mo yaken a macisirsiring do aro a tao?” 40So nipyan na sya no panirsirngen no itaysang. Meyratateng am meytatanek si Pawlo do zazakdangan a mapatala so lima na do aro a tao. Am ori o ji da nimeykazyazyaki no aro a tao. Karahan am sirsirngen na sira ni Pawlo no ciring da no Sipolay. Maniring si Pawlo am,
Valgt i Øjeblikket:
Nimlivolivon 21: snt
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
The Bible Society in Taiwan